ମୃତ୍ୟୁର ଉପତ୍ୟାକା ‘ନଗଡ଼ା’ରେ ଶିଶୁ ଶ୍ରମିକ

<p>ଯାଜପୁର(ଓଡ଼ିଶା ରିପୋର୍ଟର): ଯାଜପୁର ଜିଲ୍ଲା ସୁକିନ୍ଦା ବ୍ଲକ ଚିଙ୍ଗୁଡିଆପାଳ ପଞ୍ଚାୟତର ନଗଡ଼ା ଅପପୁଷ୍ଟି ପାଇଁ ଦିନେ ସାରା ଦେଶରେ ନିନ୍ଦିତ ହୋଇଥିଲା ଓଡ଼ିଶା। ଏହି ଅଞ୍ଚଳର ସ୍ଥିତିକୁ ନେଇ ଦେଶ ବିଦେଶରେ ନଗଡ଼ା ଯେତିକି ଚର୍ଚ୍ଚିତ ହୋଇଥିଲା ହୁଏତ ଭାରତର କୌଣସି ସ୍ଥାନ ହୋଇ ନଥିବ। ଏହାପରେ ଅଞ୍ଚଳର ଉନ୍ନତି ପାଇଁ ସରକାର ବହୁ ପଦକ୍ଷେପ ନେଇଛନ୍ତି। ମୃତ୍ୟୁର ଉପତ୍ୟାକା ଭାବେ ପରିଚିତ ହୋଇଥିବା ନଗଡ଼ାକୁ ଏବେ ଲମ୍ବିଛି ପକ୍କା ସଡ଼କ। ନଳକୂପ ବି ବସିଛି। ଲୋକଙ୍କ ଆର୍ଥିକ ସ୍ଥିତିରେ ଉନ୍ନତି ଆଣିବା ସହ ସ୍ୱାସ୍ଥ୍ୟ, ଶିକ୍ଷା ଏବଂ ସାଧାରଣ ମୌଳିକ ସୁବିଧା ଯୋଗାଇ ଦେବାକୁ ଯୋଜନା କାର୍ଯ୍ୟକାରୀ ହେଉଛି। ହେଲେ ବାସ୍ତବରେ କ&rsquo;ଣ ସତରେ ଏହା କାର୍ଯ୍ୟକାରୀ ହେଉଛି ? ଯଦି ଯେଉଛି, ତେବେ ଏହି ଅଞ୍ଚଳର ନାବାଳକ କାହିଁକି ଶିଶୁ ଶ୍ରମିକ ହେବାକୁ ବାଧ୍ୟ ହେଉଛନ୍ତି ? ଏପରି କିଛି ପ୍ରଶ୍ନ ଉଙ୍କି ମାରିବାରେ ଲାଗିଛି।</p><p>ଏପରି କହିବାର କାରଣ ହେଲା, ନଗଡ଼ାରୁ ଉଦ୍ଧାର ହୋଇଛନ୍ତି ୫ ଜଣ ଶିଶୁ ଶ୍ରମିକ। ଗତକାଲି ଏକ ବିଶ୍ୱସ୍ତ ସୂତ୍ରରୁ ଖବର ପାଇ ଜିଲ୍ଲା ଶିଶୁ ସୁରକ୍ଷା ୟୁନିଟ୍&zwnj;ର ଏକ ଟାକ୍ସଫୋର୍ସ ଟିମ୍ ନଗଡ଼ା ଅଞ୍ଚଳରେ ଚଢାଉ କରିଥିଲା। ଏହି ଚଢାଉରେ ସ୍ଥାନୀୟ କାଳିଆପାଣି ଥାନା ପୋଲିସ ମଧ୍ୟ ସାମିଲ ଥିଲା। ଏହି ଟିମ୍ ଚଢାଉ କରି ଉପର ନଗଡ଼ା ଓ ତଳ ନଗଡ଼ାରୁ ୫ଜଣ ଶିଶୁ ଶ୍ରମିକ ଉଦ୍ଧାର କରିଛି। ଏହି ଶିଶୁ ଶ୍ରମିକମାନେ ଠିକାଦାରଙ୍କ ପାଖରେ ନିର୍ମାଣ କାର୍ଯ୍ୟ ଏବଂ ବନ ବିଭାଗ ଦ୍ୱାରା ନିଆଁ ଲିଭା କାର୍ଯ୍ୟରେ ନିୟୋଜିତ ହୋଇଥିଲେ। ଉଦ୍ଧାର ଶିଶୁମାନଙ୍କୁ ଡାକ୍ତରଖାନାରେ ସ୍ୱାସ୍ଥ୍ୟଗତ ଯାଞ୍ଚ ପରେ ଜିଲ୍ଲା ସିଡବ୍ଲ୍ୟୁସିକୁ ସ୍ଥାନାନ୍ତର କରାଯାଇଛି।</p><p>ଗୁରୁତ୍ୱପୂର୍ଣ୍ଣ କଥା ହେଲା ସରକାର କହୁଛନ୍ତି ନଗଡ଼ା ଅଞ୍ଚଳର ରୂପରେଖ ବଦଳୁଛି। ଲୋକଙ୍କ ଜୀବନଧାରଣ ମାନରେ ଉନ୍ନତି ପାଇ ବହୁତ କିଛି କରାଯାଉଛି। ହେଲେ ସରକାରଙ୍କର ନିଜ ବନ ବିଭାଗ ଅଞ୍ଚଳର ଶିଶୁଙ୍କୁ ନିଆଁ ଲିଭା କାମରେ ଲଗାଉଛି। ସାରା ବିଶ୍ୱର ନଜର ନଗଡ଼ା ଉପରେ ରହିଥିବା ବେଳେ ଅଞ୍ଚଳର ଶିଶୁ ଠିକାଦାର ଓ ବନ ବିଭାଗ ଅଧୀନରେ କାମ କରୁଥିବା କିପରି ସ୍ଥାନୀୟ ପ୍ରଶାସନ ଜାଣିପାରୁ ନଥିଲା ତାହା ପ୍ରଶ୍ନବାଚୀ ସୃଷ୍ଟି କରିବାରରେ ଲାଗିଛି।</p><p>ଅଞ୍ଚଳରୁ ଶିଶୁ ଶ୍ରମିକ ଉଦ୍ଧାର ହେବା ସରକାରୀ ବାବୁଙ୍କ ବଡ଼ ବଡ଼ କଥା ଉପରେ ମଧ୍ୟ ପ୍ରଶ୍ନବାଚୀ ସୃଷ୍ଟି କରିଛି। ଯଦି ସରକାରଙ୍କର ନଗଡ଼ାବାସୀ ପ୍ରତି ଏତେ ଦରଦ, ତେବେ ଉନ୍ନୟନ ଯୋଜନା ସେଠାରେ ପହଞ୍ଚୁଛି କି ନାହିଁ ତାହାର କେବେ ତଦାରଖ କରୁଛନ୍ତି କି ବୋଲି ପ୍ରଶ୍ନ ହେଉଛି। ଯଦି ଯୋଜନାର କାର୍ଯ୍ୟକାରୀତା ଉପରେ ନଜର ରଖାଯାଇଛି, ତେବେ କେଉଁ କାରଣ ପାଇଁ ଛୋଟ ଛୋଟ କୋମଳମତି ଶିଶୁ ଶ୍ରମିକ ସାଜିବାକୁ ବାଧ୍ୟ ହେଉଛନ୍ତି ତାହାର କେବେ ଖୋଜ ଖବର ନେଇଛନ୍ତି କି ?</p><p>ଏହି ଘଟଣା ପଦାକୁ ଆସିବା ପରେ ପୁଣି ଥରେ ନଗଡ଼ା ଚର୍ଚ୍ଚାକୁ ଆସିଯାଇଛି। ପକ୍କା ରାସ୍ତାଟିଏ ପକାଇ ଦେଇ ନଳକୂପ ଖୋଳି ଦେଇ ସରକାର ନଗଡ଼ାର ଉନ୍ନତୀକରଣ କରି ଦେଇଥିବା ଅଭିଯୋଗ ହେଉଛି।</p>

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।