କାମାକ୍ଷାନଗର(ବିଦ୍ୟାଧର ବରାଳ): ଶିକ୍ଷାକେନ୍ଦ୍ରରେ ରହୁଥିବା ପିଲାଙ୍କୁ ଶିଶୁ ଶ୍ରମିକ ଭାବେ ଖଟାଯାଉଥିବା ଅଭିଯୋଗ ନେଇ ଆଜି ଢେଙ୍କାନାଳ ଜିଲ୍ଲା କାମାକ୍ଷାନଗରର ମହୁଲପାଳରେ ଥିବା ରାମକୃଷ୍ଣ ଶିକ୍ଷାକେନ୍ଦ୍ର ପରିସରରେ ପ୍ରବଳ ଉତ୍ତେଜନା ଦେଖାଦେଇଛି। ପିଲାଙ୍କୁ ଆବଶ୍ୟକ ମାତ୍ରାରେ ଖାଇବାକୁ ଦିଆଯାଉ ନ ଥିବା ବେଳେ ଶିଶୁ ଶ୍ରମିକ ଭାବେ ଖଟା ଯାଉଥିବା ଅଭିଭାବକମାନେ ଅଭିଯୋଗ କରିଛନ୍ତି।
ଏହାକୁ ନେଇ ସ୍କୁଲ କର୍ତ୍ତୃପକ୍ଷଙ୍କ ସହିତ ସେମାନଙ୍କର ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିବା ବେଳେ ଘଟଣାର ସମାଧାନ ନିମନ୍ତେ ପୁଲିସ୍ ଓ ଶିକ୍ଷାଧିକାରୀ ପହଞ୍ଚିଥିବା ଜଣାଯାଇଛି। ଅପରପକ୍ଷେ ବହୁ ଅଭିଭାବକ ନିଜ ପିଲାଙ୍କୁ ଧରି ଘରକୁ ପଳାଇଥିବା ଦେଖିବାକୁ ମିଳିଛି।
ମିଳିଥିବା ସୂଚନା ଅନୁଯାୟୀ, ମହୁଲପାଳରେ ଥିବା ରାମକୃଷ୍ଣ ଶିକ୍ଷାକେନ୍ଦ୍ର ୨୦୦୭-୦୮ରୁ ନିର୍ମାଣ ହୋଇଥିଲା। ଏଠାରେ ଦୂରଦୂରାନ୍ତରୁ ଆସି ପିଲାମାନେ ରହି ପାଠ ପଢ଼ୁଥିଲେ। ହେଲେ ସେମାନଙ୍କୁ ଏଠାରେ ଠିକ୍ ଭାବେ ଖାଇବାକୁ ଦିଆଯାଉ ନ ଥିବା ଓ ଶିଶୁ ଶ୍ରମିକ ଭାବେ ଖଟାଯାଉଥିବା ନେଇ ପିଲାମାନେ ପୂର୍ବରୁ ମଧ୍ୟ ଅଭିଭାବକଙ୍କ ନିକଟରେ ଜଣାଇ ଆସୁଥିଲେ।
ଏହାକୁ ପ୍ରଥମେ ପ୍ରଥମେ ଅଭିଭାବକମାନେ ବିଶ୍ୱାସ କରିପାରି ନ ଥିଲେ ମଧ୍ୟ କାଲିଠୁ ଶିକ୍ଷାକେନ୍ଦ୍ର ନିକଟରେ ପହଞ୍ଚି ବିଭିନ୍ନ ସ୍ଥାନରେ ଜଗି ରହିଥିଲେ। ଆଜି ସ୍କୁଲ ସମୟରେ କୌଣସି ଶିକ୍ଷକ ନ ଥିବା ବେଳେ ଅଭିଭାବକମାନେ ଗେଟ୍ ପାଖକୁ ଯାଇ ପିଲାଙ୍କୁ ଡାକି ଭିତରକୁ ଯାଇଥିଲେ। ଏହାପରେ ଅଭିଭାବକ ଓ ସ୍ଥାନୀୟ ଲୋକେ ହୋ ହଲ୍ଲା କରିବା ସହ ସ୍କୁଲ କର୍ତ୍ତୃପକ୍ଷଙ୍କୁ ଘେରାଉ କରିଥିଲେ । ଏହାକୁ କେନ୍ଦ୍ର କରି ଘଟଣାସ୍ଥଳରେ ପ୍ରବଳ ଉତ୍ତେଜନା ଦେଖାଦେଇଥିଲା ।
ପରିସ୍ଥିତି ଏତେ ଗମ୍ଭୀର ହେଲା ଯେ, କାମାକ୍ଷାନଗର ପୁଲିସ୍ ଓ ବ୍ଲକ ଶିକ୍ଷାଧିକାରୀ ପହଞ୍ଚି ତଦନ୍ତ କରିଛନ୍ତି । ବ୍ଳକ ଶିକ୍ଷାଧିକାରୀ କହିଛନ୍ତି, ପିଲାଙ୍କୁ ଖାଦ୍ୟ ଦିଆଯାଉଥିଲେ ମଧ୍ୟ ତାହା ଆବଶ୍ୟକ ଅନୁଯାୟୀ ହୋଇପାରୁ ନ ଥିବା ଜଣାଯାଇଛି। ଏହାର ତଦନ୍ତ ହେବ।
ଅପରପକ୍ଷେ ସ୍କୁଲ କର୍ତ୍ତୃପକ୍ଷ କହିଛନ୍ତି, ଏହା ସମ୍ପୂର୍ଣ୍ଣ ମିଥ୍ୟା। ଏନେଇ ପୂର୍ବରୁ ଅଭିଯୋଗ ହୋଇଥିବା ବେଳେ ତାହାର ସତ୍ୟତା ପ୍ରମାଣିତ ହୋଇପାରି ନ ଥିଲା। ଏବେ ମଧ୍ୟ ସେମାନଙ୍କ ବିରୋଧରେ ଷଡଯନ୍ତ୍ର କରାଯାଉଛି। ଗୋଟିଏ ଅସୁସ୍ଥ ପିଲାକୁ ନେଇ ସେ ମେଡିକାଲ ଯାଇଥିବା ବେଳେ ଏପରି କାଣ୍ଡ ଘଟି ଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
