ଜିଦ୍‌ରେ ଅଟଳ ଏନ୍‌ଏଚ୍‌ଏମ୍‌ ଅଧୀନରେ କାର୍ଯ୍ୟରତ ଠିକା ନର୍ସ

ଭୁବନେଶ୍ୱର(ଓଡ଼ିଶା ରିପୋର୍ଟର): ସପ୍ତାହେ ପୂରିଲା ଏନ୍‌ଏଚ୍‌ଏମ୍‌ ଅଧୀନରେ କାର୍ଯ୍ୟରତ ଠିକା ନର୍ସଙ୍କ ଆନ୍ଦୋଳନ। ପ୍ରଥମେ ଦାବି ପୂରଣ ହେଉ, ତା’ପରେ ରୋଗୀସେବା ଏଭଳି ଚେତାବନୀ ଦେଇ କାର୍ଯ୍ୟବନ୍ଦ ଆନ୍ଦୋଳନ ଜାରି ରଖିଛନ୍ତି ନର୍ସିଂ କର୍ମଚାରୀ।  ଲିଖିତ ପ୍ରତିଶ୍ରୁତି ନଦେଲେ ଆନ୍ଦୋଳନରୁ ହଟିବେ ନାହିଁ ବୋଲି କହିଛନ୍ତି ଆନ୍ଦୋଳନରତ ନର୍ସିଂ କର୍ମଚାରୀ।  ସଂଘର ସଭାପତି ଏବଂ ସମ୍ପାଦିକା ଓହରିଯିବା ପରେ ଏବେ ନୂଆ କର୍ମକର୍ତ୍ତା ଚୟନ କରିବାକୁ ଯୋଜନା ଥିବା ଆନ୍ଦୋଳନକାରୀ କହିଛନ୍ତି। ୨୪ ଘଣ୍ଟା ଭିତରେ କାର୍ଯ୍ୟରେ ଯୋଗନଦେଲେ  ଚୁକ୍ତି ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବ ବୋଲି ଚେତାବନୀ ଶୁଣାଇଛନ୍ତି ଏନ୍ଏଚ୍ଏମ୍ ପରିଚାଳନା ନିର୍ଦ୍ଦେଶିକା।

ଜଣେ ଆନ୍ଦୋଳନରତ ନର୍ସ କହିଛନ୍ତି,“ ଯେ ପର୍ଯ୍ୟନ୍ତ ଆମକୁ ଲିଖିତ ପ୍ରତିଶ୍ରୁତି ନ ମିଳିଛି ଆମେ ରାଜ ରାସ୍ତାରୁ ହଟିବୁ ନାହିଁ। ରୋଗୀ ସେବା ବ୍ୟାହତ ହେଉଛି ହେଲେ ସରକାର ତାଙ୍କ ଜିଦ୍‌ରେ ଅଟଳ। ଆନ୍ଦୋଳନ ୭ ଦିନରେ ପହଞ୍ଚିଲାଣି, କୌଣସି ପ୍ରତିନିଧି ଆମକୁ ଦେଖା କରି ନାହାନ୍ତି।”

ସୂଚନାଯୋଗ୍ୟ, ଗତ ୬ ଦିନ ହେଲାଣି ସ୍ଥାୟୀ ନିଯୁକ୍ତି ଓ ଗ୍ରେଡ୍ ପେ ବୃଦ୍ଧି ଆଦି ପ୍ରମୁଖ ଦାବି କରି ଲୋୟର ପିଏମ୍‌ଜିରେ ଧାରଣାରେ ବସିଛନ୍ତି ଏନ୍‌ଏଚ୍‌ଏମ୍‌ ଅଧୀନରେ କାର୍ଯ୍ୟରତ ଠିକା ନର୍ସ।