ହାତ ଧରାଧରି ହୋଇ ଆସିଲେ, କାନ୍ଧ ଓ ପେଟ ଥାପୁଡ଼େଇ ମଜା କଲେ, ଏମିତି କଥା କହିଲେ ଯେ, ନବୀନ ବି ହସିଦେଲେ…

<p>ଭୁବନେଶ୍ୱର (ଓଡ଼ିଶା ରିପୋର୍ଟର): ନବୀନ ନିବାସରେ ତୀବ୍ବତୀୟ ଧର୍ମଗୁରୁ ଦଲାଇ ଲାମାଙ୍କ ଉପସ୍ଥିତି ଓ ନବୀନଙ୍କ ସହ ତାଙ୍କର ବନ୍ଧୁତାକୁ ନେଇ ଆଜି ସାରା ରାଜ୍ୟରେ ଚର୍ଚ୍ଚା। ଦଲାଇ ଲାମା ଓ ନବୀନଙ୍କ ଭିତରେ ଅତି ଖୋଲା ଢଙ୍ଗରେ କଥାବାର୍ତ୍ତା ଓ ହସଖୁସି ଦେଖିବାକୁ ମିଳିଥିଲା। ସାଧାରଣତଃ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସ୍ୱଭାବରେ ଟିକିଏ ଗମ୍ଭୀର। ଗଣମାଧ୍ୟମର କ୍ୟାମେରା ଆଗରେ ସେ ଯେତିକି ଆବଶ୍ୟକ ସେତିକି ହିଁ କଥା କହନ୍ତି ଓ ତା ପରେ &lsquo;ଥ୍ୟାଙ୍କ୍ ୟୁ&rsquo; କହି ଚାଲି ଯାଆନ୍ତି। ଇଚ୍ଛା ଥିଲେ ବେଳେବେଳେ ସେ ସାମ୍ବାଦିକ ମାନଙ୍କ ପ୍ରଶ୍ନର ଉତ୍ତର ଦେଇଥାନ୍ତି। କୌଣସି କେନ୍ଦ୍ରମନ୍ତ୍ରୀ କିମ୍ବା ଅନ୍ୟ ବିଶିଷ୍ଟ ବ୍ୟକ୍ତି ତାଙ୍କୁ ଦେଖା କରିବାକୁ ନବୀନ ନିବାସ ଗଲେ ସେ ତାଙ୍କୁ ବାଟେଇ ଦେବାକୁ ଦୁଆର ଯାଏଁ ଆସନ୍ତି ଓ ଗଣମାଧ୍ୟମ ଆଗରେ ଖୁବ୍ କମ୍ ସମୟ ଭିତରେ ପ୍ରତିକ୍ରିୟା ଦେଇ ଫେରି ଯାଆନ୍ତି। କିନ୍ତୁ ତୀବ୍ବତୀୟ ଧର୍ମଗୁରୁ ଦଲାଇ ଲାମାଙ୍କ &zwj;କ୍ଷେତ୍ରରେ ଦୃଶ୍ୟ ଥିଲା ଟିକେ ନିଆରା।</p><p>ସା&zwj;କ୍ଷାତ ଆଲୋଚନା ପରେ ନବୀନ ଓ ଦଲାଇ ଲାମା, ଉଭୟ ଘନିଷ୍ଠ ବନ୍ଧୁ ପରି ହାତ ଧରାଧରି ହୋଇ ନବୀନ ନିବାସରୁ ବାହାରି କରିଡରକୁ ଆସିଲେ। ପରସ୍ପର ପରସ୍ପରର ହାତକୁ ଏମିତି ଧରିଥିଲେ, ସେଇଥିରୁ ହିଁ ଅନୁମାନ କରିହେଉଥିଲା ସେମାନେ ଖୁବ୍ ଘନିଷ୍ଠ ବନ୍ଧୁ। ଭିତରେ ମଧ୍ୟ ଖୁବ୍ ସମୟ ବେଶ୍ ଖୋଲାରେ ବାର୍ତ୍ତାଳାପ କରିଛନ୍ତି ନିଶ୍ଚୟ। ଉଭୟଙ୍କ ବୟସ ଅଧିକ ହୋଇଥିଲେ ବି ଦେଖାଯାଇଥିଲା ଯେ, ନବୀନ ହୁସିଆର୍ ହୋଇ ଧର୍ମଗୁରୁଙ୍କ ହାତକୁ ଧରି ଧରି ତାଙ୍କୁ କରିଡରକୁ ଆଣିଥିଲେ। ଏହାପରେ ଦୁହେଁ ଗଣମାଧ୍ୟମ କ୍ୟାମେରା ଆଗରେ ଠିଆ ହୋଇଥିଲେ। ନବୀନ କିଛି କହିନଥିଲେ। କିନ୍ତୁ ଦଲାଇ ଲାମା ନିଜ ତରଫରୁ ହିଁ ଆରମ୍ଭ କରିଦେଇଥିଲେ ମନ୍ତବ୍ୟ ଦେବା। ସେ ତାଙ୍କ ବକ୍ତବ୍ୟରେ ଜୀବନ ଦର୍ଶନଠାରୁ ଆରମ୍ଭ କରି ଚୀନ୍ ଓ ଭାରତ ସଂପର୍କ ପର୍ଯ୍ୟନ୍ତ ସବୁକିଛିର ଉତ୍ତର ଦେଇଥିଲେ। ସାଧାରଣତଃ କେଉଁଠି ବେଶୀ ସମୟ ଠିଆ ହେଉନଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ପୂରା ସମୟ ତାଙ୍କ କଡ଼ରେ ଠିଆ ହୋଇ ରହିଥିଲେ। ବେଶୀ କୌତୂହଳପ୍ରଦ ଥିଲା, ଧର୍ମଗୁରୁ ଦଲାଇ ଲାମା ନିଜ ଉତ୍ତର ରଖିବା ମଝିରେ ମଝିରେ ନବୀନଙ୍କ ବିଷୟରେ କହି ତାଙ୍କ କାନ୍ଧକୁ ଓ ପେଟକୁ ହାଲୁକା ହାଲୁକା ଧକ୍କା ମାରୁଥିଲେ। ନବୀନ ମଧ୍ୟ ତାଙ୍କର ଏପରି ଆଚରଣରେ ମୁରୁକି ମୁରୁକି ହସୁଥିଲେ।</p><p>ଦଲାଇ ଲାମା ପ୍ରଥମେ କହିଥିଲେ- ଆମେ ସମସ୍ତେ ଆମ ମାଆର କୋଳରୁ ହିଁ ଆସିଛୁ ଓ ମାଆର &zwj;କ୍ଷୀର ହିଁ ପିଇଛୁ। ମୁଁ ବି ମୋ ମାଆଠାରୁ ଆସିଛି, ଆପଣଙ୍କ ମୁଖ୍ୟମନ୍ତ୍ରୀ ବି ତାଙ୍କ ମାଆଙ୍କଠାରୁ ଆସିଛନ୍ତି। ସେହିପରି ଆଉଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ସେ ଆଲୋକପାତ କରିଥିଲେ। କହିଥିଲେ, ଏବେ ମଣିଷ ନିଜର ସ୍ୱାସ୍ଥ୍ୟ ଉପରେ ବେଶୀ ଗୁରୁତ୍ୱ ଦେଉନି। ମେଡିସିନ୍ ଖାଇବାରେ ଲାଗିଛି। କିନ୍ତୁ ଆପଣଙ୍କ ଶରୀରର ସ୍ୱାସ୍ଥ୍ୟ ମେଡିସିନ୍&zwnj;ରେ ନାହିଁ, ଅଛି ମାନସିକ ଶାନ୍ତିରେ। ଏହା କହି ଦଲାଇ ଲାମା ନବୀନଙ୍କ କାନ୍ଧକୁ ଥାପୁଡେଇଥିଲେ ଓ ପୁଣି କହିଥିଲେ, ଏ ରାଜନୀତି ଫାଜନୀତି କିଛି ନୁହେଁ, ପାର୍ଟିଫାର୍ଟି କିଛି ନୁହେଁ, ଶରୀର ଆଗ। ଏହା ଶୁଣି ନବୀନ ସଶବ୍ଦରେ ହସି ଦେଇଥିଲେ। ସାମ୍ବାଦିକମାନେ ମଧ୍ୟ ହସିଥିଲେ।</p>

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।