ହୁସିଆର ! ରାତି ୧୦ଟା ପରେ ବାଣ ଫୁଟାଇଲେ ବନ୍ଧା ହେବେ

ଭୁବନେଶ୍ୱର (ଓଡ଼ିଶା ରିପୋର୍ଟର): ଆସନ୍ତା ରବିବାର ପଡ଼ୁଛି ଆଲୋକର ପର୍ବ ଦୀପାବଳି। ଏଥିପାଇଁ ରାଜ୍ୟବାସୀଙ୍କୁ ଆଗୁଆ ଶୁଭକାମନା ଜଣାଇଛି ଓଡ଼ିଶା ପୁଲିସ। ତା’ ସହିତ ଦ୍ୱୈତନଗରୀ ଭୁବନେଶ୍ୱର-କଟକ ପାଇଁ ବାଣଫୁଟା ସଂକ୍ରାନ୍ତିୟ ସତର୍କ ପରାମର୍ଶ ଜାରି କରିଛି। ଆସନ୍ତୁ ଏହି ନିୟମାବଳିଗୁଡ଼ିକୁ ଜାଣିବା।

୧: ଉଚ୍ଚତମ ନ୍ୟାୟାଳୟଙ୍କ ନିର୍ଦ୍ଦେଶ ମୁତାବକ ସନ୍ଧ୍ୟା ୮ଟାରୁ ରାତି ୧୦ ପର୍ଯ୍ୟନ୍ତ ବାଣ ଫୁଟାଇ ପାରିବେ।

୨: କେବଳ ଲାଇସେନ୍ସପ୍ରାପ୍ତ ବିକ୍ରେତାଙ୍କ ପାଖରୁ ବାଣ କିଣନ୍ତୁ।

୩: ପିଲାମାନଙ୍କୁ ଏକୁଟିଆ ବାଣ ଫୁଟାଇବାକୁ ଦିଅନ୍ତୁ ନାହିଁ। ପିଲାମାନେ ବାଣ ଫୁଟାଇଲା ବେଳେ ନଜର ରଖନ୍ତୁ।

୪: ୧୨୫ ଡେସିବଲ୍‌ରୁ ଅଧିକ ଶବ୍ଦ କରୁଥିବା ବାଣ ଫୁଟାଇବା ମନା।

୫: ରେଶମ ଓ ପଶମ ବସ୍ତ୍ର ପିନ୍ଧି ବାଣ ଫୁଟାନ୍ତୁ ନାହିଁ।

୬: ସାମୁହିକ ଭାବେ ବାଣ ଫୁଟାଉଥିଲେ ଜନବସତିଠାରୁ ଦୂରରେ ରହି ଖୋଲାପଡ଼ିଆରେ ବାଣ ଫୁଟାନ୍ତୁ।

୭: ଚାଇନା ବାଣର ମାଳ ଫୁଟାଇବା ସମ୍ପୂର୍ଣ୍ଣ ନିଷେଧ।

୮: ବାଣଫୁଟାଇବା ସମୟରେ ଆଶୁ ଚିକିତ୍ସା ବାକ୍ସ ପାଖରେ ରଖନ୍ତୁ।

୯: ବାଣଫୁଟାଇବା ପରେ ଅବଶେଷଗୁଡ଼ିକୁ ପାଣିରେ ବୁଡ଼ାଇ ଦିଅନ୍ତୁ।

୧୦: ହାତରେ ଧରି ବାଣ ଫୁଟାନ୍ତୁ ନାହିଁ। ବାଣରେ ଅଗ୍ନି ସଂଯୋଗ କଲାବେଳେ ଉପଯୁକ୍ତ ଦୂରତା ରଖନ୍ତୁ।

୧୧: ନିଷିଧ୍ୟାଞ୍ଚଳ ତଥା ଡାକ୍ତରଖାନା, କୋର୍ଟ, ଶିକ୍ଷାନୁଷ୍ଠାନ, ଧାର୍ମିକ ସ୍ଥାନ, ଯଥା କର୍ତ୍ତୃପକ୍ଷଙ୍କ ଦ୍ୱାରା ଘୋଷିତ ନୀରବ ଅଞ୍ଚଳ ଆଦି ସ୍ଥାନଗୁଡ଼ିକରେ ବାଣ ଫୁଟାନ୍ତୁ ନାହିଁ।

୧୨: ନୀରିହ ପଶୁଙ୍କ ଉପରେ ବାଣ ପ୍ରୟୋଗ କରନ୍ତୁ ନାହିଁ।

୧୩: ଜରୁରୀ ପରିସ୍ଥିତିରେ ପୁଲିସ୍‌ କଣ୍ଟ୍ରୋଲ୍‌ ରୁମ୍ (୧୦୦) କିମ୍ବା ଦମକଳ(୧୦୧)  ନମ୍ବରକୁ ସହାୟତା ପାଇଁ ଫୋନ୍‌ କରନ୍ତୁ।