ନବୀନଙ୍କ କାରକେଡ୍‌କୁ ଅଣ୍ଡାମାଡ଼, ପୂର୍ବତନ ବିଧାୟକ ଅଟକ

ବଲାଙ୍ଗିର (ମନୋରଞ୍ଜନ ଯୋଶୀ/ଘଟେଶ୍ୱର ମିଶ୍ର): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ କାରକେଡ୍‌ ଉପରକୁ ଅଣ୍ଡାମାଡ଼ ହୋଇଛି। ବଲାଙ୍ଗିରରେ ରୋଡ୍‌ ଶୋ’ ସାରି ବରଗଡ଼ ଅଭିମୁଖେ ଯାଉଥିବା ବେଳେ ଲୋଇସିଂଘା ନିର୍ବାଚନମଣ୍ଡଳୀର ସାଲେଭଟାଠାରେ ମୁଖ୍ୟମନ୍ତ୍ରୀଙ୍କ କାର୍‌କେଡ୍‌ ଉପରକୁ ଅଣ୍ଡା ମାଡ଼ ହୋଇଛି। ମାତ୍ର ଅଣ୍ଡା ମୁଖ୍ୟମନ୍ତ୍ରୀଙ୍କ ହାଇଟେକ୍‌ ଗାଡ଼ିରେ ବାଜିଛି କି ନାହିଁ ତାହା ଜଣାପଡ଼ି ନାହିଁ। ହେଲେ ବସ୍‌ ପଛରେ ଯାଉଥିବା ଗାଡ଼ିରେ ଅଣ୍ଡା ମାଡ଼ ହୋଇଥିବା ଦେଖିବାକୁ ମିଳିଛି। ପୁଲିସ ଏହି ଘଟଣାରେ ପୂର୍ବତନ ବିଧାୟକ ବାଳଗୋପାଳ ମିଶ୍ର ଓ ତାଙ୍କ ସମର୍ଥକଙ୍କୁ ଅଟକ ରଖିଛି।

ବଲାଙ୍ଗିରରେ ରୋଡ୍‌ ଶୋ’ କରିବା ପାଇଁ ସନ୍ଧ୍ୟା ୭ଟା ବେଳେ ମୁଖ୍ୟମନ୍ତ୍ରୀ ପହଞ୍ଚିଥିଲେ। ସେଠାରେ ରୋଡ଼୍‌ ଶୋ’ ସାରି ମୁଖ୍ୟମନ୍ତ୍ରୀ ଲୋଇସିଂଘା ନିର୍ବାଚନମଣ୍ଡଳୀ ଅଭିମୁଖେ ଯାଇଥିଲେ। ସେଠାରେ ରୋଡ୍‌ ଶୋ କରିବା ପରେ ମୁଖ୍ୟମନ୍ତ୍ରୀ ବରଗଡ଼ ଯାଉଥିଲେ। ତେବେ ସାଲେଭଟାଠାରେ ୯ ପ୍ଲାଟୁନ୍‌ ପୁଲିସ ଫୋର୍ସ ସୁତୟନ ହୋଇଥିବା ସତ୍ତ୍ୱେ ଅଣ୍ଡା ମାଡ଼ ହୋଇଥିଲା। ଏପରିକି ପଥର ମାଡ଼ ହୋଇଥିବା ମଧ୍ୟ ଅଭିଯୋଗ ହୋଇଛି। ଏହି ଖବର ପ୍ରକାଶ ପାଇବା ପରେ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଛି। ପୁଲିସ ଲାଠି ଚାର୍ଜ କରିବା ସହିତ ଫ୍ଲାଗମାର୍ଚ୍ଚ କରିଛି।

ସୂଚନାରୁ ପ୍ରକାଶ, ସାଲେଭଟାଠାରେ ରୋଡ଼୍‌ ଶୋ’ ନକରିବାକୁ ବାଳଗୋପାଳ ମିଶ୍ର ଚେତାବନୀ ଦେଇଥିଲେ। ଯେଉଁଥିପାଇଁ ସେଠାରେ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା। ଏହା ସତ୍ତ୍ୱେ ଏଠାରେ ଅଣ୍ଡାମାଡ଼ ହୋଇଥିବା ଅଭିଯୋଗ ହୋଇଛି।