ନୟାଗଡ଼(ଆର୍ତ୍ତତ୍ରାଣ ପ୍ରଧାନ):ଲୁଟେରା ଗ୍ୟାଙ୍ଗକୁ ଧରିବାକୁ ଯାଇଥିବା ପୁଲିସ୍ ଉପରକୁ ଅତର୍କିତ ଗୁଳି ଚଳାଇଲେ ଲୁଟେରା । ଏହି ଫାୟାରିଂରେ କେହି ପୁଲିସ୍ କର୍ମୀ ଆହତ ହୋଇ ନ ଥିବା ବେଳେ ୩ ଲୁଟେରାଙ୍କୁ କାବୁ କରିବାରେ ସଫଳ ହୋଇଛି ପୁଲିସ୍ । ସେମାନଙ୍କ ନିକଟରୁ ୫ଟି ବାଇକ୍, ୫ଟି ମୋବାଇଲ୍ ଏବଂ ୧ଟି ଦେଶୀ ପିସ୍ତଲ ଜବତ ହୋଇଛି। ଏପରି ଘଟଣା ଆଜି ଭୋରରୁ ନୟାଗଡ଼ ଜିଲ୍ଲା ଶରଣକୁଳ ଥାନା ଅଞ୍ଚଳରେ ଘଟିଛି। ଗିରଫ ୩ ଜଣ ହେଲେ ଖଇରପଟି ଗ୍ରାମର ରମେଶ ବେହେରା, ଚାନ୍ଦପୁର ଦାଣ୍ଡସାହିର ସୋମନାଥ ସାହୁ , କଇଁଫୁଲିଆ ଗ୍ରାମର ଅଶୋକ ସେନାପତି।
ସୂଚନା ଅନୁଯାୟୀ, ଏହି ୩ ଜଣ ଦୀର୍ଘ ଦିନ ହେଲା ବିଭିନ୍ନ ସ୍ଥାନରେ ଲୁଟ୍ ଓ ରାହାଜାନୀ ଚଳାଇ ଆସୁଥିଲେ। ଲୋକଙ୍କଠାରୁ ରାସ୍ତାରୁ ମୋବାଇଲ୍ ଏବଂ ବାଇକ୍ ଛଡ଼ାଇ ନେଉଥିଲେ । ଏମାନଙ୍କ ନାମରେ ବିଭିନ୍ନ ଥାନାରେ ମାମଲା ରହିଥିବାରୁ ଶରଣକୁଳ ପୁଲିସ୍ ସେମାନଙ୍କୁ ଧରିବା ପାଇଁ ଯୋଜନା କରିଥିଲା ।
ଏହି ୩ ଜଣ ଗୁରୁବାର ଭୋରରୁ ଖଇରପଟିରେ ଥିବା ରମେଶଙ୍କ ଅର୍ଦ୍ଧନିର୍ମିତ ଘରେ ଆଶ୍ରୟ ନେଇଥିବା ଖବର ପାଇ ଶରଣକୁଳ ପୁଲିସ୍ ସେଠାରେ ଚଢ଼ଉ କରିଥିଲା। ପୁଲିସ୍କୁ ଦେଖୁ ସେମାନେ ଗୁଳି ଚଳାଇଥିବା ବେଳେ ସୌଭାଗ୍ୟବଶତଃ ଗୁଳି କାହା ଦେହରେ ବାଜି ନ ଥିଲା। ଏହାପରେ ପୁଲିସ୍ ସେମାନଙ୍କୁ କାବୁ କରିବାରେ ସଫଳ ହୋଇଥିଲା।
ଏହି ୩ ଜଣଙ୍କୁ ପୁଲିସ୍ ଗିରଫ କରିଥିବା ବେଳେ ସେମାନଙ୍କ ଉପରେ ହତ୍ୟା ଉଦ୍ୟମ ମାମଲା ରୁଜୁ କରିଛି । ଜବତ ବାଇକ୍ଗୁଡ଼ିକ ଚୋରା କି ନୁହେଁ ତଥା କେଉଁ କେଉଁ ମାମଲାରେ ସେମାନେ ସମ୍ପୃକ୍ତ ତାହାର ତଦନ୍ତ ଆରମ୍ଭ କରିଛି ପୁଲିସ୍।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
