ଚୂନ ଲଗାଇଲେ ବିଦେଶିନୀ: ଭକୁଆ ବନିଗଲେ ଓଡ଼ିଆ ଅଫିସର

<p>ଭୁବନେଶ୍ୱର (ଓଡ଼ିଶା ରିପୋର୍ଟର): ଫେସ୍&zwnj;ବୁକ ଫେକ୍&zwnj; ଓ ଅପରାଧ ରୋକିବାକୁ ବହୁତ କିଛି ପଦକ୍ଷେପ ନେଉଛି। ନିଜ ସୋସିଆଲ ମିଡିଆ ଉପରେ ତୀକ୍ଷ୍ନ ନଜର ରଖିଛି। ତଥାପି ଫେସ୍&zwnj;ବୁକ ବ୍ୟବହାରକାରୀଙ୍କୁ ମଧ୍ୟ ସଚେତନ ହେବାକୁ ପଡ଼ିବ। ନିଜ ବନ୍ଧୁ ଓ ପରିଜନଙ୍କ ବ୍ୟତୀତ ଅନ୍ୟ କାହା ସହ ଗୁରୁତ୍ୱପୂର୍ଣ୍ଣ କଥା ଓ ଦ୍ରବ୍ୟ ଆଦାନପ୍ରଦାନ ସୋସିଆଲ ମିଡିଆରେ କରିବାରୁ ଦୂରେଇ ରହିବା ଉଚିତ। ଯାହାକୁ ଭୁଲି ଯାଇଥିଲେ, ରାଜଧାନୀ ଭୁବନେଶ୍ୱରର ଜଣେ ସରକାରୀ ବାବୁ। ଫେସ୍&zwnj;ବୁକ୍&zwnj;ରେ ଅପରିଚିତ ୟୁଜରଙ୍କ ସହ ବନ୍ଧୁତ୍ୱ କଲେ। ସେ ପୁଣି ବିଦେଶିନୀ। ଖାଲି ବନ୍ଧୁତ୍ୱରେ କଥା ଅଟକି ନଥିଲା। ବ୍ୟବସାୟର ପ୍ଲାନ କଲେ। ଏବେ ବିଦେଶିନୀ ବାନ୍ଧବୀ ଜଣଙ୍କ ଲଗାଇଛନ୍ତି ଲକ୍ଷଧିକ ଟଙ୍କାର ଚୂନ। ମୋଟା ଅଙ୍କର ଟଙ୍କା ନେଇ ସରକାରୀ ବାବୁଙ୍କ ହର୍ବାଲ ପାଉଡର କୋରିୟର କରୁଥିବା କହି ଦେଇଛନ୍ତି ଅଦରକାରୀ ଗୁଣ୍ଡ। ଏହାସହ କଷ୍ଟମ୍ ଅଧିକାରୀ କହିକି ବି ଲୁଟିଲେ। ଠକେଇର ଶିକାର ହେବା ପରେ ସରକାରୀ ବାବୁ ଜଣକ ଏନେଇ ସାଇବଲ ସେଲ୍&zwnj;ର ଦ୍ୱାରସ୍ଥ ହୋଇଛନ୍ତି।</p><p>ସରକାରୀ ବାବୁଙ୍କ ସହ ବନ୍ଧୁତା କରିଥିବା ବିଦେଶିନୀ ନାଁ କ୍ଲିଫଡ୍ ଜୋଫିଆ। ଘର ଇଂଲଣ୍ଡରେ। ଉଭୟଙ୍କ ମଧ୍ୟରେ ପ୍ରଥମେ ଫେସବୁକ୍&zwnj;ରେ ଫ୍ରେଣ୍ଡସିପ୍ ହେଲା, ଏହାପରେ ବ୍ୟବସାୟ ପାଇଁ ସରକାରୀ ବାବୁଙ୍କୁ ପ୍ରବର୍ତ୍ତାଇଲେ ବିଦେଶୀ ବାନ୍ଧବୀ। କ୍ୟାନସର ଓ ଡାଇବେଟିକ୍ ରୋଗୀଙ୍କ ପାଇଁ ମୁମ୍ବାଇର ଜଣେ ମହିଳାଙ୍କଠାରୁ ହର୍ବାଲ ପାଉଡର କିଣି ଏହାକୁ ପଠାଇଲେ ଅଧିକ ଟଙ୍କା ଦେବାକୁ ଜୋଫିଆ କହିଥିଲେ। ଏଥିପାଇଁ ପ୍ରଥମେ ୩ ଲକ୍ଷ ୬୯ ହଜାର ଟଙ୍କା ଦେଇଥିଲେ ସରକାରୀ ବାବୁ। ହେଲେ ହର୍ବାଲ ପାଉଡର୍ ବଦଳରେ କୋରିୟରରେ ଆସିଥିଲା ଅଦରକାରୀ ଗୁଣ୍ଡ। ଏତିକିରି ସରି ନଥିଲା ଏହି ଖେଳ। ହର୍ବଲ୍ ପାଉଡର୍ ବାବଦ ଟଙ୍କା ଫେରାଇବା ନାଁରେ ବିଦେଶିନୀ ଖେଳିଥିଲେ ଆଉ ଏକ ଚାଲ୍। ଏକ ଫେକ୍ ପାର୍ସଲ୍ ଓ ଫେକ୍ କଷ୍ଟମ୍ ଅଫିସର୍ ନାଁରେ ସରକାରୀ ବାବୁଙ୍କୁ ଫୋନ୍ କରିଥିଲେ। ପାର୍ସଲରେ ଡଲାର ଓ ସୁନା ଥିବା କହି ପାର୍ସଲ ନନେଲେ ମାମଲା ହେବ ବୋଲି ଧମକ ଦେଇଥିଲେ। ଡରରେ ସରକାରୀ ବାବୁ ପୁଣି ଲକ୍ଷାଧିକ ଟଙ୍କା ପଇଠ କରିବା ପରେ ଏସବୁ ଜାଲ୍ ବୋଲି ଜାଣିବାକୁ ପାଇଥିଲେ।</p><p>ସରକାରୀ ବାବୁ ଜଣଙ୍କ ସାଇବର ସେଲର୍ ଦ୍ୱାରସ୍ଥ ହେବା ପରେ ଘଟଣା ପଛରେ ବଡ଼ ଧରଣର ଇଣ୍ଟର ନ୍ୟାସନାଲ୍ ରାକେଟ୍ କାମ କରୁଥିବା ସନ୍ଦେହ କରାଯାଉଛି।</p>

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।