ହସିଦେବାରୁ ଛୁରାମାଡ଼, ୪ ଯୁବକ ଗୁରୁତର

ପାରାଦୀପ (ରମାକାନ୍ତ ନାୟକ): ବାଇକ୍‌ରେ ଷ୍ଟଣ୍ଟ କରୁଥିବା ବେଳେ ପଡ଼ିଗଲେ। ଏହା ଦେଖି ହସିଦେବାରୁ ୪ ଯୁବକଙ୍କୁ ଛୁରା ମାଡ଼ କରାଯାଇଛି। ଏନେଇ ଥାନାରେ ଅଭିଯୋଗ ହୋଇନଥିଲେ ମଧ୍ୟ ଗୁରୁତର ଆହତ ଯୁବକମାନଙ୍କୁ ପାରାଦୀପ ପୋର୍ଟ ମେଡ଼ିକାଲ୍‌ରେ ଭର୍ତ୍ତି କରାଯାଇଛି। ଛୁରା ମାଡ଼ କରିଥିବା ଯୁବକଙ୍କ ପରିଚୟ ମିଳିପାରିନାହିଁ।

ପାରାଦୀପ ମେରାଇନ୍‌ ଥାନା ଅଞ୍ଚଳର ମେରାଇନ୍‌ ଡ୍ରାଇଭ୍‌ରେ ୪ ଜଣ ଯୁବକ ୨ଟି ବାଇକ୍‌ରେ ଷ୍ଟଣ୍ଟ କରୁଥିଲେ। ଫଳରେ ସେମାନେ ଭାରସାମ୍ୟ ହରାଇ ପଡ଼ିଯାଇଥିଲେ। ଏହି ସମୟରେ ସେହି ରାସ୍ତାରେ ଯାଉଥିବା ମଧୁବନ ଅଞ୍ଚଳର ବିକାଶ ଗୋଚ୍ଛାୟତ, ସତ୍ୟଜିତ ସାହୁ, କରଣ ଦାସ ଓ ସରୋଜ ସାହୁ ହସି ଦେଇଥିଲେ। ଏଥିରେ ଉତ୍‌କ୍ଷିପ୍ତ ହୋଇ ଷ୍ଟଣ୍ଟ କରୁଥିବା ଯୁବକମାନେ ସେମାନଙ୍କୁ ଛୁରାମାଡ଼ କରିଥିଲେ। ଫଳରେ ୪ ଜଣ ଯୁବକ ଗୁରୁତର ଆହତ ହୋଇଛନ୍ତି। ସେମାନଙ୍କୁ ପାରାଦୀପ ପୋର୍ଟ ହସ୍ପିଟାଲ୍‌ରେ ଭର୍ତ୍ତି କରାଯାଇଛି। ମାତ୍ର ଏନେଇ ଥାନାରେ ଅଭିଯୋଗ ହୋଇନାହିଁ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।