ଗଜପତି:ଗୁଣିଗାରେଡ଼ି ସନ୍ଦେହରେ ଦୁଇଜଣଙ୍କୁ ହତ୍ୟା ମାମଲାରେ ଆଉ ତିନି ଗିରଫ

ଗଜପତି: ଗଜପତି ଜିଲ୍ଲା ବାଡେଗୁଡ଼ା ପଞ୍ଚାୟତରେ ଗୁଣିଗାରେଡ଼ି ସନ୍ଦେହରେ ଦୁଇଜଣଙ୍କୁ ହତ୍ୟା ଅଭିଯୋଗ ଘଟଣାରେ ଆଉ ତିନି ଗିରଫ ହୋଇଛନ୍ତି। ଗିରଫଙ୍କ ମଧ୍ୟରେ ଡମ୍ୱାଗୁଡ଼ା ପଞ୍ଚାୟତ ସରପଞ୍ଚ ରମେଶ ମଲ୍ଲିକଙ୍କ ସମେତ ଜଣେ ୱାର୍ଡମେମ୍ୱର ପବିତ୍ର ମଲ୍ଲିକ ଅଛନ୍ତି। ଏମାନଙ୍କୁ ମିଶାଇ ଏହି ହତ୍ୟା ଘଟଣାରେ ମୋଟ୍ ୧୫ଜଣଙ୍କୁ ଗିରଫ କରାଯାଇ ସାରିଛି ବୋଲି ଅଡବା ଥାନା ଆଇଆଇସି ଅନାମ ଲାକ୍ରା । ଅଭିଯୋଗ ଅନୁସାରେ, ବାଡେ଼ଗୁଡ଼ା ଓ ପାଦେରିମା ଗାଁରେ କିଛି ଲୋକଙ୍କର ଅସ୍ୱାଭାବିକ ମୃତ୍ୟୁ ହୋଇଥିଲା। ଗୁଣିଗାରେଡ଼ି ସନ୍ଦେହରେ ଦୁଇ ଗାଁରେ ଲୋକେ ଗତ ୨୨ ତାରିଖରେ ଗୁଣିଆ ଡାକି ଖଟ ବୁଲାଇଥିଲେ। ଯାହା ଲାଗିଥିଲା ଗାଁର ସୁବାସ ମଳିକ, ପିତେଲା ମାଝୀ ଓ ସାମି ମଳିକଙ୍କ ଘରେ। ଲୋକେ ଏହି ୩ ଜଣଙ୍କୁ ଦୋଷୀ କରି ୬୦ ହଜାର ଟଙ୍କା ଲେଖାଏଁ ଜରିମାନା ପକାଇଥିଲେ। ସାମି ଜରିମାନା ଦେଇଥିଲେ। କିନ୍ତୁ ଅନ୍ୟ ୨ ଜଣ ଟଙ୍କା ଦେବାକୁ ରାଜି ହୋଇନଥିଲେ। ଫଳରେ ଗତ ୨୭ ତାରିଖରେ ଗାଁର କିଛି ଲୋକ ସୁବାସ ଓ ପିତେଲାଙ୍କୁ ପିଟିପଟି ହତ୍ୟା କରିବା ପରେ ଜଙ୍ଗଲରେ ପୋଡ଼ି ଦେଇଥିବା ଅଭିଯୋଗ ହୋଇଥିଲା।