ଘୋଷଯାତ୍ରା: ବାଦାନୁବାଦ ମଧ୍ୟରେ ଦ୍ୱିତୀୟ ସମନ୍ୱୟ କମିଟି ବୈଠକ ଶେଷ

ପୁରୀ: ବାଦାନୁବାଦ ମଧ୍ୟରେ ଶନିବାର ଶେଷ ହୋଇଛି ମହାପ୍ରଭୁଙ୍କ ଘୋଷଯାତ୍ରା ଆୟୋଜନର ଦ୍ୱିତୀୟ ସମନ୍ୱୟ କମିଟି ବୈଠକ। ରାସ୍ତାଘାଟ ନିର୍ମାଣରେ ବିଳମ୍ୱ, ସ୍ୱାସ୍ଥ୍ୟ ଓ ପରିମଳ ବ୍ୟବସ୍ଥା ଆଦି ପ୍ରସଙ୍ଗକୁ ନେଇ ସଦସ୍ୟମାନେ ଉଦବେଗ ପ୍ରକାଶ କରିବା ସହ ହୋହାଲ୍ଲା କରିଥିଲେ। ବିଭିନ୍ନ ବିଭାଗ ମଧ୍ୟରେ ସମନ୍ୱୟ ଅଭାବରୁ କାମ ବିଳମ୍ୱ ହେଉଥିବା ସେମାନେ ଅଭିଯୋଗ କରିଥିଲେ। ତେବେ ନିର୍ଦ୍ଧାରିତ ସମୟରେ କାମ ଶେଷ କରିବାକୁ ନବକଳେବର ଭିତ୍ତିଭୂମି ବିକାଶ କମିଟି ଅଧ୍ୟକ୍ଷ ନିର୍ଦ୍ଦେଶ ଦେଇଛନ୍ତି। ଆଜିର ବୈଠକରେ ରଥ ନିର୍ମାଣ, ରଥ ଦଉଡ଼ି ଓ ଘୋଷଯାତ୍ରା ଲାଗି ଆବଶ୍ୟକ ଅନ୍ୟ ଆବଶ୍ୟକ ଜିନିଷ ସଂପର୍କରେ ଆଲୋଚନା କରାଯାଇଥିଲା। ଅନ୍ୟପକ୍ଷରେ ରଥଯାତ୍ରା ନୀତି ଯେପରି ଶୃଙ୍ଖଳିତ ଭାବେ ଶେଷ ହେବ ସେଥିଲାଗି ଦଇତାପତି ନିଯୋଗ ଓ ଅନ୍ୟ ସେବାୟତଙ୍କ ସହ ଆଲୋଚନା କରାଯାଉଥିବା ଜିଲ୍ଲାପାଳ କହିଛନ୍ତି।