ହଳଦିଆପଡାରେ ପୋଲିସକୁ ମାଡ ଘଟଣା: ମୁଖ୍ୟ ଅଭିଯୁକ୍ତ ଶୈଳ ଗିରଫ

ଭୁବନେଶ୍ୱର: ଭୁବନେଶ୍ୱର ହଳଦିପଡ଼ିଆରେ ପୋଲିସ ଉପରେ ହୋଇଥିବା ମାଡ଼ ଘଟଣାର ମୁଖ୍ୟ ଅଭିଯୁକ୍ତ ଶୈଳ ରଣସିଂକୁ ଗିରଫ କରାଯାଇଛି । ଏହାସହ ଶୈଳଙ୍କ କିଛି ସହଯୋଗୀଙ୍କୁ ମଧ୍ୟ ଧରାଯାଇଥିବା ଡିସିପି ସତ୍ୟବ୍ରତ ଭୋଇ ସୂଚନା ଦେଇଛନ୍ତି । ପୂର୍ବରୁ ପୋଲିସ ଏହି ଘଟଣାରେ ୩ଜଣଙ୍କୁ ଗିରଫ କରିଥିଲା ।

ଗତ ୮ ତାରିଖରେ ଝାରପଡ଼ା ଅଞ୍ଚଳରେ ଥିବା ହଳଦିପଡ଼ିଆ ବସ୍ତିରେ ସନ୍ତୋଷ ଜେନା ନାମକ ଜଣେ ଯୁବକଙ୍କୁ କିଛି ବସ୍ତିବାସୀ ଏକ ଗଛରେ ବାନ୍ଧି ମାଡ ମାରୁଥିବା ସୂଚନା ପାଇ ପୋଲିସ ସେଠାରେ ପହଞ୍ଚି ଉଦ୍ଧାର କରିବାକୁ ଚେଷ୍ଟା କରିଥିଲା । ତେବେ ପୋଲିସକୁ ସ୍ଥାନୀୟ ବସ୍ତିବାସୀ ବିରୋଧ କରିବା ସହ ଘଟଣା ଉଗ୍ର  ରୂପ ନେଥିଲା । ଏପରି କି ବସ୍ତିର କିଛି ଲୋକ ପୋଲିସକୁ ମାଡ ମାରିଥିଲେ । ଘଟଣା ପରେ ପୋଲିସ ୩ଜଣଙ୍କୁ ଗିରଫ କରିଥିବା ବେଳେ ଶୈଳ ଫେରାର ହୋଇଯାଇଥିଲେ । ସେବେଠାରୁ ପୋଲିସ ତାଙ୍କୁ ଧରିବାକୁ ବିଭିନ୍ନ ସ୍ଥାନରେ ଚଢାଉ ଜାରି ରଖିଥିଲା । ଶେଷରେ ୧୧ ଦିନ ପରେ ଲକ୍ଷ୍ମୀସାଗର ପୋଲିସ ତାଙ୍କୁ ଗିରଫ କରିବାକୁ ସକ୍ଷମ ହୋଇଛି ।