ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
<p>ଭୁବନେଶ୍ୱର:ବହୁଚର୍ଚ୍ଚିତ ଟିକିରୀ ଶିକ୍ଷୟତ୍ରୀ ଇତିଶ୍ରୀ ପ୍ରଧାନ ହତ୍ୟା ଫାଇଲ ବନ୍ଦ ହୋଇଯିବା ପରେ ସିବିଆଇର ଭୂମିକାକୁ ନେଇ ଉଠିଛି ପ୍ରଶ୍ନ । ମାମଲାର ପ୍ରକୃତ ଅଭିଯୁକ୍ତ କିଏ ? ଖିଅ ଖୋଜିବାରେ ବିଫଳ ହେବା ପରେ ସିବିଆଇ ମାମଲାକୁ ବନ୍ଦ କରିଛି। ଏହାକୁ ନେଇ ରାଜନେତାଙ୍କ ଟାର୍ଗେଟରେ କେନ୍ଦ୍ରୀୟ ତଦନ୍ତ ଏଜେନ୍ସି। ମାମଲାକୁ ରି-ଓପନ୍ କରିବା ନେଇ ବି ଦାବି ଉଠିଛି।</p> <p>ଯେଉଁଭଳି ଭାବେ ମାମଲାକୁ ବନ୍ଦ କରାଗଲା ତାହା ଦୁର୍ଭାଗ୍ୟଜନକ ବୋଲି କହିଛନ୍ତି ବିଜେପି ନେତା ବିଜୟ ମହାପାତ୍ରା । ଏଭଳି ଲୋମହର୍ଷଣକାରୀ ଘଟଣାରେ ନ୍ୟାୟ ନ ମିଳିବା ଦ୍ୱାରା ସିବିଆଇ ଉପରୁ ଲୋକଙ୍କ ଭରସା ଉଠିଯିବ ବୋଲି ସେ ମତ ଦେଇଛନ୍ତି । ଏହା କଳଙ୍କିତ ଅଧ୍ୟାୟ ସୃଷ୍ଟି କରିଥିବା କହି ସିବିଆଇ ଉପରେ ବର୍ଷିଛନ୍ତି ବିଜୟ । ସେପଟେ ମାମଲାରେ ଛନ୍ଦି ହୋଇପଡିଥିବା ରାଜନେତା ଜୟରାମ ପାଙ୍ଗୀ ବିଜେପିରେ ମିଶିବା ପରେ ତାଙ୍କୁ ସୁରକ୍ଷା ଦେବାକୁ ଯାଇ ମାମଲାକୁ ବନ୍ଦ କରାଯାଇଥିବା ବିଜେଡି ଅଭିଯୋଗ କରିଛି।</p> <p>ମାମଲା ବନ୍ଦ ପ୍ରସଙ୍ଗରେ ସିବିଆଇକୁ ସମାଲୋଚନା କରିବାରେ ପଛରେ ପଡିନି କଂଗ୍ରେସ । ଦେଶର ସର୍ବଶ୍ରେଷ୍ଠ ତଦନ୍ତ ସଂସ୍ଥା ଯେଭଳି ଭାବେ ଇତିଶ୍ରୀ ମାମଲାକୁ ରଫାଦଫା କଲା ତାହା ସିବିଆଇର ଅପାରଗତାକୁ ପ୍ରମାଣିତ କରୁଛି ବୋଲି କହିଛନ୍ତି ବରିଷ୍ଠ କଂଗ୍ରେସ ନେତା ନିରଞ୍ଜନ ପଟ୍ଟନାୟକ। ପ୍ରକୃତ ନ୍ୟାୟ ପାଇଁ ମାମଲା ରିଓପନ୍ କରିବାକୁ ସେ ଦାବି କରିଛନ୍ତି ।</p> <p>୨୦୧୩ ଅକ୍ଟୋବର ୨୭ ତାରିଖରେ ରାୟଗଡ଼ା ଜିଲ୍ଲା ଟିକିରିରେ ନିଜ ରୁମରେ ଶୋଇଥିବା ବେଳେ କେହି ଦୁର୍ବୃତ୍ତ ଶିକ୍ଷୟିତ୍ରୀ ଇତିଶ୍ରୀ ପ୍ରଧାନଙ୍କ ଉପରେ କିରୋସିନ୍ ଢ଼ାଳି ନିଆଁ ଲଗାଇ ଦେଇଥିଲା। କାଶୀପୁର ସ୍କୁଲର ତତ୍କାଳୀନ ଏସ୍ଆଇ ନେତ୍ରାନନ୍ଦ ଦଣ୍ଡସେନା ଓ ଉକ୍ତ ସ୍କୁଲର ପ୍ରଧାନ ଶିକ୍ଷକ ତାଙ୍କୁ ହଇରାଣ କରୁଥିବା ନେଇ ଅଭିଯୋଗ ଆଣିଥିଲେ ଇତିଶ୍ରୀ। ଏହି ମାମଲାରେ ସ୍କୁଲ ଏସଆଇ ଦଣ୍ଡସେନା ଏବେବି ଜେଲରେ ଅଛନ୍ତି। ପ୍ରଥମେ କ୍ରାଇମ୍‌ ବ୍ରାଞ୍ଚ ଏହି ମାମଲାର ତଦନ୍ତ କରୁଥିବା ବେଳେ ପରେ ସିବିଆଇକୁ ତଦନ୍ତ ଦାୟିତ୍ୱ ଦିଆ ଯାଇଥିଲା।</p>
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
