ୱାଶିଂଟନ୍: ଅତି ଭୟଙ୍କର ସାମୁଦ୍ରିକ ଝଡ଼ 'ଫୋନି'କୁ ନେଇ ଆମେରିକାର ଜଏଣ୍ଟ ଟାଇଫୁନ୍ ୱାର୍ଣ୍ଣିଂ ସେଣ୍ଟର ତା’ର ପୂର୍ବାନୁମାନ କରିଛି। ଏହି ସଂସ୍ଥାର ପୂର୍ବାନୁମାନ ଅନୁଯାୟୀ, 'ଫୋନି' ପୁରୀ ରେ ସବୁଠାରୁ ଅଧିକ କ୍ଷତି ଘଟାଇବ।
ବୁଧବାର ସନ୍ଧ୍ୟା ପର୍ଯ୍ୟନ୍ତ ଫୋନି ଅତି ଭୟଙ୍କର ରୂପ ଧାରଣ କରି ଉତ୍ତର ତାମିଲନାଡୁ ଏବଂ ଦକ୍ଷିଣ ଆନ୍ଧ୍ର ପ୍ରଦେଶ ଦେଇ ଗତି କରିବ। ଏହାପରେ ଏହା ଦିଗ ବଦଳାଇ ଉତ୍ତର-ଉତ୍ତରପୂର୍ବ ଦିଗରେ ଗତି କରି ଓଡ଼ିଶା ମୁହାଁ ହେବ। ଏହା ଶୁକ୍ରବାର ମଧ୍ୟାହ୍ନ ସୁଦ୍ଧା ଗୋପାଳପୁର ଓ ପୁରୀ ଉପକୂଳ ଅତିକ୍ରମ କରି ଦକ୍ଷିଣ ଦିଗରେ ଗତି କରିବ। ଏହି ସମୟରେ ପ୍ରବଳରୁ ଅତି ପ୍ରବଳ ବର୍ଷା ହେବ।
ସେହିପରି ପବନର ବେଗ ଘଣ୍ଟାପ୍ରତି ସର୍ବାଧିକ ୨୧୨ କିମି ରହିବ। ବେଳେ ବେଳେ ପବନର ଗତି ୨୬୦ କିମି ମଧ୍ୟ ଛୁଇଁପାରେ। ତେଣୁ ଏହାଦ୍ୱାରା ବ୍ୟାପକ କ୍ଷତି ହେବାର ଆଶଙ୍କା ରହିଛି। କିନ୍ତୁ ଏହା ସୁପର ସାଇକ୍ଲୋନରେ ପରିଣତ ହେବା ଆଗରୁ ଦୁର୍ବଳ ହୋଇଯିବ ବୋଲି କୁହାଯାଇଛି।