କେନ୍ଦ୍ରାପଡ଼ାରେ ପୋଲିସର ମାତ୍ରାଧିକ କାର୍ଯ୍ୟାନୁଷ୍ଠାନ: କଟକରେ ରାସ୍ତାରୋକ କଲା ବିଜେପି

କଟକ: ବାବା ସାରଥୀ ପ୍ରସଙ୍ଗରେ କେନ୍ଦ୍ରାପଡ଼ାରେ ବିକ୍ଷୋଭକାରୀଙ୍କ ଉପରେ ପୋଲିସର ମାତ୍ରାଧିକ କାର୍ଯ୍ୟାନୁଷ୍ଠାନକୁ ବିରୋଧ କରି ଆଜି କଟକରେ ବିଜେପି ରାଜରାସ୍ତାକୁ ଓହ୍ଲାଇଥିଲା। କଟକ ବିଜେପି ଶାଖା ପକ୍ଷରୁ ଶିଖରପୁରଠାରେ ରାସ୍ତାରୋକ କରାଯାଇଥିଲା। ପୂର୍ବତନ ମନ୍ତ୍ରୀ ତଥା ବରିଷ୍ଠ ବିଜେପି ନେତା ସମୀର ଦେ ଓ ରାଜ୍ୟ ବିଜେପି ସାଧାରଣ ସଂପାଦକ ନୟନ ମହାନ୍ତିଙ୍କ ନେତୃତ୍ୱରେ ବହୁ ଦଳୀୟ କର୍ମୀ ଦୀର୍ଘ ସମୟ ଧରି ୫ ନମ୍ବର ଜାତୀୟ ରାଜପଥକୁ ଅବରୋଧ କରିଥିଲେ। କେନ୍ଦ୍ରାପଡ଼ାର ପୂର୍ବତନ ଏସପି ସତୀଶ ଗଜଭିୟେଙ୍କୁ ତୁରନ୍ତ ଗିରଫ କରିବା ପାଇଁ ସେମାନେ ଦାବି କରିଥିଲେ। ପୋଲିସ୍ ଘଟଣାସ୍ଥଳରେ ପହଞ୍ଚି ବିକ୍ଷୋଭକାରୀମାନଙ୍କୁ ଗିରଫ କରିଥିଲା ଓ ପରେ ଛାଡ଼ି ଦେଇଥିଲା। ସୂଚନାଯୋଗ୍ୟ, ଗତକାଲି ବିକ୍ଷୋଭ ପ୍ରଦର୍ଶନ ବେଳେ କେନ୍ଦ୍ରାପଡ଼ାର ଜଣେ ଓକିଲ ଓ ଜିଲ୍ଲା ବିଜେପି ସଭାପତିଙ୍କୁ ମଧ୍ୟ ପୋଲିସ୍ ଅମାନୁଷିକ ଭାବେ ମାଡ଼ ମାରିଥିଲା।