କାନ୍ଥ ଭୁଶୁଡ଼ି ମା’ଝିଅଙ୍କ ମୃତ୍ୟୁ, ବାପପୁଅ ଗୁରୁତର

ଫୁଲବାଣୀ (ତ୍ରିନାଥ ସାହୁ) : ଲଗାଣ ବର୍ଷା ଯୋଗୁ ଭୁଶୁଡିଲା କାନ୍ଥ। ମାଟି କାନ୍ଥ ତଳେ ଚାପି ହୋଇ ମାଆ ଓ ଝିଅଙ୍କ ମୃତ୍ୟୁ ଘଟିଥିବା ବାପ-ପୁଅ ଗୁରୁତର ଆହତ ହୋଇଛନ୍ତି। ଆଜି ଏପରି ହୃଦୟବିଦାରକ ଘଟଣା ଫୁଲବାଣୀ ଟାଉନ୍‌ରେ ଘଟିଛି।

ଆଜି ସକାଳଠାରୁ ଫୁଲବାଣୀ ସହରରେ ପ୍ରବଳ ବର୍ଷା ହେଉଛି। ବର୍ଷା ଯୋଗୁ ନାରାୟଣୀ ପାହାଡ଼ ନିକଟସ୍ଥ ତ୍ରିଦେବ ନଗରରେ ରହୁଥିବା ବ୍ରଜବନ୍ଧୁ ମାଝୀ ଓ ତାଙ୍କ ପୂରା ପରିବାର ଘରେ ଥିଲେ। ବର୍ଷା ଯୋଗୁ ଅପରାହ୍ନରେ ହଠାତ୍‌ ତାଙ୍କ ମାଟି କାନ୍ଥଟି ଭୁଶୁଡି ପଡ଼ିଥିଲା। ମାଟି କାନ୍ଥ ତଳେ ପୂରା ପରିବାର ଚାପି ହୋଇଯାଇ ଥିଲେ।

ସାହି ପଡ଼ିଶା ଉଦ୍ଧାର କାର୍ଯ୍ୟରେ ଲାଗି ପଡ଼ିଥିଲେ। ଘଟଣାସ୍ଥଳରେ ବ୍ରଜବନ୍ଧୁଙ୍କ ପତ୍ନୀ ସୁରଥୀ ମାଝୀ ଓ ୫ ବର୍ଷର ଝିଅ ସୁନିତା ରାଣୀଙ୍କ ମୃତ୍ୟୁ ଘଟିଥିଲା। ବ୍ରଜବନ୍ଧୁ ଓ ତାଙ୍କ ଦୁଇ ବର୍ଷର ପୁଅ ଗୁରୁତର ଆହତ ହୋଇଥିଲେ। ସେମାନଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ଏବେ ମଧ୍ୟ ସେମାନଙ୍କ ସ୍ୱାସ୍ଥ୍ୟ ଅବସ୍ଥା ଉଦ୍‌ବେଗ ଜନକ ରହିଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।