ଭୁବନେଶ୍ୱର(ଓଡ଼ିଶା ରିପୋର୍ଟର): ବିଜେଡି ସରକାରର କୁମ୍ଭୀର କାନ୍ଦଣା ଓ ଲୋକଦେଖାଣିଆ ଚାଷୀ ପ୍ରୀତିକୁ ନବନିର୍ମାଣ କୃଷକ ସଂଗଠନ ତୀବ୍ର ସମାଲୋଚନା କରିବା ସହ ଆସନ୍ତାକାଲି ରାଜଭବନ ସମ୍ମୁଖରେ ସତ୍ୟାଗ୍ରହ କରିବ ବୋଲି ଘୋଷଣା କରିଛି।
ସଂଗଠନର ରାଷ୍ଟ୍ରୀୟ ସଂଯୋଜକ ଅକ୍ଷୟ କୁମାର ଏକ ପ୍ରେସ୍ ରିଲିଜରେ କହିଛନ୍ତି ଯେ, ପ୍ରାଇସ୍ , ପ୍ରେଷ୍ଟିଜ୍ ଓ ପେନସନ୍ ଦାବିରେ ଦୀର୍ଘ ୯ବର୍ଷ ହେଲା ନବନିର୍ମାଣ କୃଷକ ସଂଗଠନ ଆନ୍ଦୋଳନ ଜାରି ରଖିଛି। ଚାଷୀ ସମସ୍ୟାକୁ ନେଇ ସରକାର ଛଳନାର ନାଟକ କରି ଚାଲିଛନ୍ତି। ରାଜ୍ୟରେ କ୍ଷମତାସୀନ ବିଜେଡି ଧାନ କ୍ୱିଣ୍ଟାଲ ପିଛା ୨୯୩୦ଟଙ୍କା ଦାବିରେ ଆସନ୍ତାକାଲି ଏକ ବିକ୍ଷୋଭ କରିବା ପାଇଁ ଦିଲ୍ଲୀ ଯାଇଛି। ଛତିଶଗଡ଼ ସରକାର ଧାନ କ୍ୱିଣ୍ଟାଲ ପିଛା ୭୫୦ଟଙ୍କା ବୋନସ ଘୋଷଣା କରି ୨୫୦୦ଟଙ୍କାରେ ଧାନ କିଣିବାକୁ ନିଷ୍ପତ୍ତି ନେଇଥିବାବେଳେ ଓଡ଼ିଶାରେ ରାଜ୍ୟ ସରକାର କାହିଁକି ନିଜେ ମାନିଥିବା ୨୯୩୦ଟଙ୍କା ଚାଷୀଙ୍କୁ ଦେବାକୁ ବୋନସ ଘୋଷଣା କରୁନାହାନ୍ତି ବୋଲି ସେ ପ୍ରଶ୍ନ କରିଛନ୍ତି।
ସଂଗଠନ ଦାବି କରୁଥିବା ଚାଷୀ ସୁରକ୍ଷା ଭତ୍ତା ଉପରେ କୌଣସି ନିଷ୍ପତ୍ତି ନନେଇ ଦିଲ୍ଲୀ ଯାଇ ଚାଷୀଙ୍କ ପାଇଁ କାନ୍ଦୁଥିବାର ନାଟକ କରୁଛନ୍ତି। ଏହି କାରଣରୁ ନବନିର୍ମାଣ କୃଷକ ସଂଗଠନ ଆସନ୍ତାକାଲି ରାଜଭବନ ସମ୍ମୁଖରେ ୨ହଜାର ଚାଷୀଙ୍କୁ ଧରି ସତ୍ୟାଗ୍ରହ କରିବାକୁ ନିଷ୍ପତ୍ତି ନେଇଛି ବୋଲି ଶ୍ରୀ କୁମାର ସୂଚନା ଦେଇଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
