ପୁରୀ (ଓଡ଼ିଶା ରିପୋର୍ଟର): ଶ୍ରୀକ୍ଷେତ୍ରରେ ମନଇଚ୍ଛା ଦରରେ କେହି ମହାପ୍ରସାଦ ବିକ୍ରି କରିପାରିବେ ନାହଁ। ଏଥିପାଇଁ ଦର ନିର୍ଦ୍ଧାରଣ ହେବ। ସୁଆରଙ୍କୁ ଚାଉଳ, ଡାଲି ଓ ଅନ୍ୟ ସାମଗ୍ରୀ ଯୋଗାଇ ଦେବ ଶ୍ରୀମନ୍ଦିର ପ୍ରଶାସନ। ପାରିଶ୍ରମିକ, ପରିବା ମୂଲ୍ୟ, ବୋଝ ମୂଲ୍ୟ, ହାଣ୍ଡି, କୁଡୁଆର ଦାମ ଓ ସୁଆରଙ୍କ ଲାଭାଂଶକୁ ମିଶାଇ ଏକ ନିର୍ଦ୍ଦିଷ୍ଟ ଦର ନିର୍ଦ୍ଧାରଣ କରାଯିବ।
ଆଜିର ଶ୍ରୀମନ୍ଦିର ପରିଚାଳନା କମିଟି ଓ ସୁଆର ମହାସୁଆର ନିଯୋଗ ମଧ୍ୟରେ ହୋଇଥିବା ବୈଠକରେ ଏହି ନିଷ୍ପତ୍ତି ହୋଇଛି।
ଏହା ସହିତ ଆନନ୍ଦ ବଜାର ସୁପରିଚାଳନା ପାଇଁ ଅଭିଯୋଗ କରିବାର ବ୍ୟବସ୍ଥା ରହିବ। ଅଭିଯୋଗ ଗ୍ରହଣ ପାଇଁ ଏକ ପ୍ରକୋଷ୍ଠ ଓ ହେଲ୍ପ ଡେକ୍ସ ପାଇଁ ଶ୍ରୀମନ୍ଦିର ପ୍ରଶାସନର ଜଣେ କର୍ମଚାରୀ ଓ ସୁଆର-ମହାସୁଆର ନିଯୋଗର ଜଣେ ସଦସ୍ୟ ଉପସ୍ଥିତ ରହିବେ। କୌଣସି ଅସୁବିଧା ହେଲେ ଭକ୍ତମାନେ ନିଜର ସମସ୍ୟା ଏମାନଙ୍କୁ ଜଣାଇ ପାରିବେ।
ଅନଧିକୃତ ଭାବେ କେହି ଆନନ୍ଦ ବଜାରରେ ମହାପ୍ରସାଦ ବିକ୍ରି କରିପାରିବେ ନାହିଁ। ସୁଆର -ମହାସୁଆର ତରଫରୁ ଏକ ୱେବ୍ ସାଇଟ୍ ମଧ୍ୟ ଖୋଲାଯିବ। ଏଥିରେ ମହାପ୍ରସାଦର ଚିତ୍ର ସହିତ ଦର ରହିବ। କେବେଠାରୁ ଏସବୁ ନିଷ୍ପତ୍ତି ଲାଗୁ କରାଯିବ, ତାହା ସ୍ଥିର ହୋଇ ନାହିଁ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
