ଭୁବନେଶ୍ୱର(ଓଡ଼ିଶା ରିପୋର୍ଟର): ରାଜ୍ୟର ଅର୍ଥନୈତିକ ଅଭିବୃଦ୍ଧିର ହାର ବଢ଼ିଛି। ୨୦୧୮-୧୯ ଆର୍ଥିକ ବର୍ଷରେ ରାଜ୍ୟର ଅଭିବୃଦ୍ଧି ହାର ୮.୪ ପ୍ରତିଶତ ରହିଛି। ୨୦୧୯-୨୦ ଆର୍ଥିକ ବର୍ଷ ପାଇଁ ପୂର୍ଣ୍ଣାଙ୍ଗ ବଜେଟ୍ ଉପସ୍ଥାପିତ ହେବା ପୂର୍ବରୁ ଆଜି ପ୍ରକାଶ ପାଇଥିବା ରାଜ୍ୟ ଅର୍ଥନୈତିକ ସର୍ଭେ ରିପୋର୍ଟରେ ଏହା ଦର୍ଶାଯାଇଛି। ଗତ ଆର୍ଥିକ ବର୍ଷରେ ଅର୍ଥନୈତିକ ଅଭିବୃଦ୍ଧି ହାର ୭.୪ ପ୍ରତିଶତ ଥିବା ବେଳେ ୨୦୧୮-୧୯ରେ ଏହା ଆଉ ୧ ପ୍ରତିଶତ ବଢ଼ିଛି। ଏହା ଦର୍ଶାଉଛି ଯେ ପ୍ରତିବର୍ଷ ରାଜ୍ୟର କେବଳ ଅଭିବୃଦ୍ଧି ଘଟୁନି, ରାଜ୍ୟର ଅଭିବୃଦ୍ଧି ହାର ମଧ୍ୟ ବଢ଼ୁଛି।
ସର୍ଭେ ରିପୋର୍ଟରେ କୁହାଯାଇଛି, ଗତ ୫ ବର୍ଷର ଅର୍ଥନୈତିକ ଅଭିବୃଦ୍ଧି ହାରର ତର୍ଜମାରୁ ଜଣାପଡ଼ିଛି ରାଜ୍ୟର ଅଭିବୃଦ୍ଧି ହାର ହରିୟାଣା, ପଞ୍ଜାବ, କେରଳ, ଛତିଶଗଡ଼, ମଧ୍ୟପ୍ରଦେଶ, ମହାରାଷ୍ଟ୍ର ଓ ଝାରଖଣ୍ଡ ଭଳି ରାଜ୍ୟକୁ ପଛରେ ପକାଇ ଦେଇଛି। ସେହିପରି କୃଷି କ୍ଷେତ୍ରରେ ପାଖାପାଖି ୪୮ ପ୍ରତିଶତ ଶ୍ରମ ନିଯୁକ୍ତି ହୋଇଥିବା ରିପୋର୍ଟରେ ଉଲ୍ଲେଖ ରହିଛି। କୃଷିକ୍ଷେତ୍ରରୁ ଘର ପିଛା ମାସିକ ଆୟରେ ମଧ୍ୟ ବୃଦ୍ଧି ଘଟିଛି। ୨୦୧୨-୧୩ରେ କୃଷିକ୍ଷେତ୍ରରୁ ମାସିକ ଘରୋଇ ଆୟ ୪,୯୭୬ ଟଙ୍କା ଥିବା ବେଳେ ୨୦୧୬-୧୭ରେ ଏହା ୭,୭୩୧ ଟଙ୍କାକୁ ବୃଦ୍ଧି ପାଇଥିବା ରିପୋର୍ଟ ଦର୍ଶାଇଛି।
ସ୍ୱାସ୍ଥ୍ୟ, ଜୀବନଧାରଣର ମାନ ଓ ନିରାପତ୍ତା କ୍ଷେତ୍ରରେ ମଧ୍ୟ ବିକାଶ ହୋଇଛି। ଶିଶୁ ମୃତ୍ୟୁହାରରେ ଅନ୍ୟ ରାଜ୍ୟ ତୁଳନାରେ ଓଡ଼ିଶାରେ କମ୍ ରହିଛି। ୧୯୯୮-୯୯ରୁ ୨୦୧୫-୧୬ ମଧ୍ୟରେ ଏହା ୪୧ ପଏଣ୍ଟ ହ୍ରାସ ପାଇଛି। ଓଡ଼ିଶାରେ ସାକ୍ଷରତାର ହାର ବିଗତ ଦଶନ୍ଧିରେ ଦ୍ରୁତ ଗତିରେ ବଢ଼ିଛି। ପ୍ରାଥମିକ, ଉଚ୍ଚ ପ୍ରାଥମିକ ଓ ମାଧ୍ୟମିକ ଶିକ୍ଷାରେ ବ୍ୟାପକ ଉନ୍ନତି ଆସିଛି। ନୀତି ଆୟୋଗର ୨୦୧୮ ରିପୋର୍ଟରେ ଓଡ଼ିଶା ପରଫର୍ମର ଷ୍ଟେଟ୍ ଏବଂ ଷ୍ଟେଟ୍ ଇନ୍ ଗୋଲ୍-୧୫ରେ ଓଡ଼ିଶା ଆଚିଭର ଷ୍ଟେଟ୍ ତାଲିକାରେ ଅନ୍ତର୍ଭୁକ୍ତ ଥିବା ରିପୋର୍ଟରେ ଦର୍ଶାଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
