ଭୁବନେଶ୍ୱର(ଓଡ଼ିଶା ରିପୋର୍ଟର): ସାଧାରଣ ନିର୍ବାଚନ ପ୍ରସ୍ତୁତି ମଧ୍ୟରେ କଂଗ୍ରେସ ଆସନ୍ତା ମାସକ ମଧ୍ୟରେ ପ୍ରତି ଜୋନସ୍ତରରେ ୫୦୦ ନୂଆ ସଦସ୍ୟ ସଂଗ୍ରହ କରିବ। ଏଥିପାଇଁ ଆଜି ଜୋନାଲ କମିଟି ସଭାପତିମାନଙ୍କୁ ଟାର୍ଗେଟ୍ ଦିଆଯାଇଛି। ଏହାସହିତ ବୁଥ କମିଟି ଗଠନ ପ୍ରକ୍ରିୟାକୁ ତୁରନ୍ତ ଶେଷ କରିବା ସହ ସମର୍ପିତ ହୋଇ ଦଳ ପାଇଁ ତୃଣମୂଳସ୍ତରରେ କାର୍ଯ୍ୟ କରିବାକୁ ପିସିସି ସଭାପତିି ନିରଞ୍ଜନ ପଟ୍ଟନାୟକ ଆହ୍ଵାନ କରିଛନ୍ତି।
ଆଜି ପ୍ରଦେଶ କଂଗ୍ରେସ ମୁଖ୍ୟାଳୟରେ ଦଳର ନେତା ଓ କର୍ମୀମାନେ ଦଳର ୧୩୪ତମ ପ୍ରତିଷ୍ଠା ଦିବସ ପାଳନ କରାଯିବା ପରେ ଆୟୋଜିତ ଜୋନାଲ ସଭାପତି ସମ୍ମିଳନୀରେ ପିସିସି ସଭାପତି ଶ୍ରୀ ପଟ୍ଟନାୟକ ଦଳରେ ସାମାନ୍ୟତମ ବିଶୃଙ୍ଖଳାକୁ ବରଦାସ୍ତ କରାଯିବ ନାହିଁ ବୋଲି କଡ଼ା ଭାଷାରେ ଶୁଣାଇ ଦେଇଛନ୍ତି। ମିଳିଥିବା ସୂଚନା ଅନୁସାରେ, ଶ୍ରୀ ପଟ୍ଟନାୟକ ଜୋନାଲ ସଭାପତିମାନଙ୍କୁ ପରାମର୍ଶ ଦେଇ କହିଛନ୍ତି ଯେ ତୃଣମୂଳସ୍ତରରେ ଦଳରେ ଯିଏ ବିଶୃଙ୍ଖଳା ସୃଷ୍ଟି କରୁଛି ତା’ପ୍ରତି କଠୋର ଆଭିମୁଖ୍ୟ ପୋଷଣ କରାଯାଉ। ବାକି ଥିବା ବୁଥ୍ କମିଟି ଜାନୁୟାରୀ ୫ତାରିଖ ସୁଦ୍ଧା ଗଠନ କରିବାକୁ ସେ ତାଗିଦ୍ ମଧ୍ୟ କରିଛନ୍ତି। ବୁଥ କମିଟି ଗଠନ କରି ଜୋନାଲ ସଭାପତିମାନେ ଗାଁ ଗାଁକୁ ବୁଲି କେନ୍ଦ୍ରର ବିଜେପି ଓ ରାଜ୍ୟର ବିଜେଡି ସରକାରର ବିଫଳତା ତଥା ଦୁର୍ନୀତିକୁ ପ୍ରଚାର କରିବାକୁ ପରାମର୍ଶ ଦେଇଛନ୍ତି।
ଜୋନାଲ ସଭାପତିମାନେ ପ୍ରତ୍ୟେକ ବୁଥ କମିଟିକୁ ସୁଦୃଢ଼ କରି ଲୋକଙ୍କ ନିକଟରେ ପହଞ୍ଚିବା ଉଚିତ ଓ ସେମାନଙ୍କ ମତାମତ ଆଧାରରେ ନିର୍ବାଚନମଣ୍ଡଳୀ ପାଇଁ ପ୍ରାର୍ଥୀ ସ୍ଥିରୀକୃତ ହେବ ବୋଲି ନେତାମାନେ ମତ ଦେଇଛନ୍ତି। ଲୋକଙ୍କ ନିକଟରେ ପହଞ୍ଚିବା ପାଇଁ ମଧ୍ୟପ୍ରଦେଶ, ଛତିଶଗଡ଼ ଓ ରାଜସ୍ଥାନର ଫର୍ମୁଲାକୁ ଓଡ଼ିଶାରେ ଦଳ ଆପଣାଇବ ଏବଂ କେବଳ ଏହି କାରଣରୁ ଜୋନାଲ ସଭାପତିମାନଙ୍କର ଗୁରୁଦାୟିତ୍ୱ ରହିଛି ବୋଲି ପିସିସି ସଭାପତି କହିଛନ୍ତି। ପ୍ରୋଜେକ୍ଟ ଶକ୍ତି ଓ ମୋ ବୁଥ୍ ମୋ ଗୌରବ କାର୍ଯ୍ୟକ୍ରମ ମାଧ୍ୟମରେ ନିର୍ଦ୍ଧାରିତ ୫୦୦ ନୂଆ ସଦସ୍ୟ ସଂଗ୍ରହ ଟାର୍ଗେଟକୁ ହାସଲ କରିବାକୁ ସେ ତାଗିଦ୍ କରିଛନ୍ତି ।ଏହି ଜୋନାଲ ସଭାପତି ସମ୍ମିଳନୀରେ ୮୫୨ଜଣ ସଭାପତି ଓ ୧୧୪ ପୌରା଼ଞ୍ଚଳ ସଭାପତିମାନେ ଯୋଗ ଦେଇଥିଲେ।