ରାଜଧାନୀ ଆସୁଥିଲା ଗଞ୍ଜେଇ, ଓଲଟି ପଡ଼ିଲା ପିକ୍‌ଅପ୍‌ ଭ୍ୟାନ୍

ଭଞ୍ଜନଗର(ଓଡ଼ିଶା ରିପୋର୍ଟର): ଗଞ୍ଜାମ ଜିଲ୍ଲା  ଭଞ୍ଜନଗର ଥାନା ଅନ୍ତର୍ଗତ ଗୁଜୁରାଳି ଗାଁ ନିକଟରେ ଏକ ଗଞ୍ଜେଇ ଭର୍ତ୍ତି ପିକ୍‌ଅପ୍‌ ଭ୍ୟାନଟି ଭାରସାମ୍ୟ ହରାଇ କଲଭର୍ଟ ତଳକୁ ଓଲଟି ପଡ଼ିଛି। ଦୁର୍ଘଟଣାରେ କାହାର କିଛି କ୍ଷୟକ୍ଷତି ହୋଇନାହିଁ। ପୁଲିସ ପ୍ରାୟ ୧୧ କୁଇଣ୍ଟାଲ ଗଞ୍ଜେଇ ଜବତ କରିବା ସହ ଜଣଙ୍କୁ ଅଟକ ରଖିଛି।

ଆଜି ସକାଳେ ଭଞ୍ଜନଗର ଥାନା ଅନ୍ତର୍ଗତ ଗାଲେରି ଛକରେ ଅବକାରୀ ବିଭାଗ ପକ୍ଷରୁ ପେଟ୍ରୋଲିଂ କରାଯାଉଥିଲା। ଏହି ସମୟରେ ଏକ ପିକ୍‌ଅପ୍‌ ଭ୍ୟାନ୍‌ ଦ୍ରୁତ ଗତିରେ ଆସି ଗୁଜୁରାଳି ଗାଁ ଅଭିମୁଖେ ଚାଲିଯାଇଥିଲା। ଅବକାରୀ ବିଭାଗର କର୍ମଚାରୀଙ୍କ ସନ୍ଦେହ ହେବାରୁ ସେମାନେ ଗାଡ଼ିଟିକୁ ପିଛା କରିଥିଲେ। ଅବକାରୀ କର୍ମଚାରୀ ପିଛା କରୁଥିବା ଦେଖି ଡ୍ରାଇଭର ଗାଡ଼ିଟିକୁ ଦ୍ରୁତ ଗତିରେ ନେଇ ଖସି ଯିବାକୁ ଉଦ୍ୟମ କରିଥିଲେ।

ଏହି ସମୟରେ ଗୁଜୁରାଳି ଗାଁ ନିକଟରେ ଥିବା କଲଭର୍ଟ ତଳକୁ ଗାଡ଼ିଟି ଭାରସାମ୍ୟ ହରାଇ ଓଲଟି ପଡ଼ିଥିଲା। ଅବକାରୀ ବିଭାଗର କର୍ମଚାରୀ ସେଠାରେ ପହଞ୍ଚି ଗାଡ଼ି ସହ ଗଞ୍ଜେଇକୁ  ଜବତ କରିବା ସହ ଜଣଙ୍କୁ ଅଟକ ରଖିଥିଲେ। ଗାଡ଼ିରେ ଥିବା ଅନ୍ୟ ଦୁଇ ଜଣ ଅବକାରୀ ବିଭାଗ କର୍ମଚାରୀଙ୍କୁ ଚକମା ଦେଇ ଚମ୍ପଟ ମାରିଥିଲେ।

ଏହି ପିକ୍‌ଅପ୍‌ ଭ୍ୟାନରେ କନ୍ଧମାଳ ଜିଲ୍ଲାରୁ ଭୁବନେଶ୍ୱରକୁ ଗଞ୍ଜେଇ ଚୋରାଚାଲାଣ ହେଉଥିବା ଜଣାଯାଇଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।