କଂଗ୍ରେସର ଲୋକପ୍ରିୟତା ବଜାୟ ରହିବ ବୋଲି ପ୍ରସାଦ ଆଶାବାଦୀ

ଭୁବନେଶ୍ୱର (ଓଡ଼ିଶା ରିପୋର୍ଟର): ପିସିସି ସଭାପତି ଭାବେ ୩ ବର୍ଷ ପୂରଣ କରିଛନ୍ତି ପ୍ରସାଦ ହରିଚନ୍ଦନ।  ୩ ବର୍ଷର କାର୍ଯ୍ୟାକାଳ ସମ୍ପର୍କରେ ସେ କହିଛନ୍ତି,“ ରାଜ୍ୟର ବିଭିନ୍ନ ଉପ ନିର୍ବାଚନରେ କଂଗ୍ରେସ ବେଶ୍‌ ସଫଳତା ହାସଲ କରିଥିଲା। ଏହାସହ  ସାଧାରଣ ଲୋକଙ୍କ ପାଇଁ କଂଗ୍ରେସ ରାସ୍ତାକୁ ଓହ୍ଲାଇ ଲଢ଼ିଛି। ରାସନ କାର୍ଡ ସମସ୍ୟା ହେଉ କି ଦୁର୍ନୀତିର କଥା ରାହୁଲ ଗାନ୍ଧି ନିଜେ ଆସି ଚାଷୀ ବଞ୍ଚାଅ ପଦଯାତ୍ରା କରିଛନ୍ତି। ପଞ୍ଚାୟତ ନିର୍ବାଚନରେ କଂଗ୍ରେସ ସଫଳତା ପାଇ ପାରି ନାହିଁ ସତ କିନ୍ତୁ ପଞ୍ଚାୟତ ନିର୍ବାଚନର ଶିକ୍ଷା ଆଗକୁ ବାଟ ଦେଖାଇବ। କଂଗ୍ରେସକୁ ପୁନର୍ବାର ମଜଭୁତ କରି ଲୋକଙ୍କ ପାଖରେ ପହଞ୍ଚାଇବା ଆମର ଦାୟିତ୍ୱ। ଆଗାମୀ ଦିନରେ ଦଳ ଲୋକଙ୍କ ଆସ୍ଥା ଭାଜନ ହେବ।”

ସେ ଆହୁରି କହିଛନ୍ତି,“ ବିଜେପୁରରେ ଉପ ନିର୍ବାଚନ ହେବାକୁ ଯାଉଛି। ଏହି ଉପ ନିର୍ବାଚନରେ କଂଗ୍ରେସ ସଫଳତାର ସହ ମୁକାବିଲା କରିବ। ବିଜେପୁର କଂଗ୍ରେସର ଏକ ଗଡ଼। ବିଜେପୁରର ସାଧାରଣ ଭୋଟର ସବୁବେଳେ କଂଗ୍ରେସ ପ୍ରତି ତାଙ୍କର ସମର୍ଥନ ପ୍ରକଟ କରି ଆସୁଛନ୍ତି। ଏଥର ମଧ୍ୟ ବିଜେପୁରର ସଚେତନ ମତଦାତା କଂଗ୍ରେସକୁ ସମର୍ଥନ ଦେବେ। ଏହି ଦୃଢ଼ ବିଶ୍ୱାସ ଆମର ରହିଛି।  ଆମେ ସବୁବେଳେ ‘ମୁଁ ନୁହେଁ ଆମେ’ ହୋଇ ମିଳିତ ନେତୃତ୍ୱରେ କଂଗ୍ରେସକୁ ସଙ୍ଗଠିତ କରୁଛୁ ଏବଂ ଆଗାମୀ ଦିନରେ ଏହା ଜାରି ରଖିବୁ।”

ସୂଚନାଯୋଗ୍ୟ, ଭୁବନେଶ୍ୱର ପ୍ରଦେଶ କଂଗ୍ରେସ କମିଟି କାର୍ଯ୍ୟାଳୟରେ ଆଜି କଂଗ୍ରେସର ୧୩୩ ତମ ପ୍ରତିଷ୍ଠା ଦିବସ ପାଳନ କରାଯାଇଛି।  ପିସିସି ସଭାପତି ପ୍ରସାଦ ହରିଚନ୍ଦନଙ୍କ ସମେତ ବହୁ ବରିଷ୍ଠ ନେତା ଏଥିରେ ସାମିଲ ହୋଇଛନ୍ତି।  ବରିଷ୍ଠ ନେତା ଶ୍ରୀକାନ୍ତ ଜେନା, ଜୟଦେବ ଜେନା ଓ ଚିରଞ୍ଜୀବ ବିଶ୍ୱାଳ ପ୍ରମୁଖ ଉପସ୍ଥିତ ଥିଲେ।