ପୁରୀରେ ପହଞ୍ଚିଲା ଅହମ୍ମଦାବାଦ-ପୁରୀ ଏକ୍ସପ୍ରେସ: ବିନା ଇଞ୍ଜିନରେ ଟେନ୍‌ ବଗି ଗଡ଼ିବା ଘଟଣାର ତଦନ୍ତ ଆରମ୍ଭ

ଟିଟିଲାଗଡ଼ (ଓଡ଼ିଶା ରିପୋର୍ଟର): ପୁରୀରେ ପହଞ୍ଚିଛି ଅହମ୍ମଦାବାଦ-ପୁରୀ ଏକ୍ସପ୍ରେସ। ଗତକାଲି ବିନା ଇଞ୍ଜିନରେ ଟିଟିଲାଗଡ଼ ଷ୍ଟେସନରୁ ଟ୍ରେନ୍‌ର ୨୨ଟି ବଗି ୧୫ କିଲୋମିଟର ଗଡ଼ିଯାଇଥିଲା। ଏବେ ଏହି ଘଟଣାରେ ତଦନ୍ତ ଚାଲିଛି। ରେଲେଓ୍ୱର ଏକ ଟିମ୍ ଘଟଣାର ତଦନ୍ତ କରୁଛି। ତିନି ଦିନ ଭିତରେ ରିପୋର୍ଟ ଦେବାକୁ ତଦନ୍ତକାରୀ ଟିମ୍‌କୁ ନିର୍ଦ୍ଦେଶ ଦିଆଯାଇଛି। ତଦନ୍ତ ପରେ ଦାୟିତ୍ୱରେ ଅବହେଳା କରିଥିବା କର୍ମଚାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସମ୍ବଲପୁର ଡିଆରଏମ୍ ଜୟଦୀପୁ ଗୁପ୍ତା ସୂଚନା ଦେଇଛନ୍ତି।

ଏହାସହ ଡିଆରମଙ୍କ ସମେତ ରେଲେଓ୍ୱର ବରିଷ୍ଠ ଅଧୀକାରୀମାନେ ଟିଟିଲାଗଡ଼ ରେଲେଓ୍ୱ ଗେଷ୍ଟ ହାଉସରେ ଗତକାଲି ରାତିରେ ଟ୍ରେନ ସହ ସଂପୃକ୍ତ ଥିବା କର୍ମଚାରୀଙ୍କୁ ଡାକି ପଚରାଉଚରା କରୁଛନ୍ତି। ଏଭଳି ତ୍ରୁଟି ପଛରେ କାରଣ କ’ଣ ଓଏଥିପାଇଁ କିଏ ଦାୟୀ ସେ ନେଇ ତର୍ଜମା ଚାଲିଛି। ସେପଟେ ପ୍ରାଥମିକ ତଦନ୍ତ ପରେ ଘଟଣା ପାଇଁ ଦାୟୀ ୨ ଜଣ ଇଞ୍ଜିନ୍ ଡ୍ରାଇଭରଙ୍କ ସମେତ ମୋଟ ୭ ଜଣଙ୍କୁ ନିଲମ୍ବିତ କରାଯାଇଛି।

ଗତକାଲି ଏକ ବଡ଼ ଧରଣର ଦୁର୍ଘଟଣାରୁ ବର୍ତ୍ତିଯାଇଥିଲା ଅହମ୍ମଦାବାଦ-ପୁରୀ ଏକ୍ସପ୍ରେସ।  ନିଶ୍ଚିତ ମୃତ୍ୟୁମୁଖରୁ ବର୍ତ୍ତି ଯାଇଥିଲେ ଶହ ଶହ ଯାତ୍ରୀ। ଗତ ରାତି ପ୍ରାୟ ୧୦ଟା ୫ ମିନିଟରେ ଟିଟିଲାଗଡ଼ ଷ୍ଟେସଦରେ ଅହମ୍ମଦାବାଦ-ପୁରୀ ଏକ୍ସପ୍ରେସ୍‌ର ଇଞ୍ଜିନ ବଦଳ ହୋଇଥିଲା। ଏହାପରେ ବିନା ଇଞ୍ଜିନରେ ଟ୍ରେନର ୨୨ଟି ବଗି ପଛକୁ ଗଡିଥିଲା। ଟିଟିଲାଗଡରୁ କେସିଙ୍ଗା ଯାଏଁ ପ୍ରାୟ ୧୫ କିଲୋମିଟର ଟ୍ରାକରେ ବଗି ଗୁଡ଼ିକ ବିନା ବାଧାରେ ଗଡି ଚାଲିଥିଲା। ଏହା ଜଣାପଡ଼ିବା ପରେ କେସିଙ୍ଗା ନିକଟରେ ଗଡ଼ି ଚାଲିଥିବା ବଗିଗୁଡିକୁ ଅଟକାଯାଇଥିଲା। ସୌଭାଗ୍ୟବଶତଃ ସମସ୍ତ ଯାତ୍ରୀ ସୁରକ୍ଷିତ ରହିଥିଲେ। ଦୀର୍ଘ ୨ ଘଣ୍ଟା ପରେ ଆଉ ଏକ ଇଞ୍ଜିନ ଯୋଗେ କେସିଙ୍ଗାରୁ ବଗିଗୁଡିକ ଫେରାଇ ଆଣାଯାଇଥିଲା। ଟ୍ରେନର ସ୍କିଡ୍ ବ୍ରେକ୍ ବ୍ୟବହାର ନହେବାରୁ ଏପରି ଘଟିଥିବା ଇଷ୍ଟକୋଷ୍ଟ ରେଲେୱେ ପକ୍ଷରୁ କୁହାଯାଇଛି।

ଅନ୍ୟପକ୍ଷରେ ରେଳ ଦୁର୍ଘଟଣା ରୋକିବା ଲାଗି ସାରା ଭାରତରେ ସୁରକ୍ଷା ଅଭିଯାନ କରିବ ରେଲୱେ। ଏନେଇ ରେଲେୱେ ବୋର୍ଡ ଅଧ୍ୟକ୍ଷ ସୂଚନା ଦେଇଛନ୍ତି। ଦୀର୍ଘ ମାସେ ବ୍ୟାପୀ ଚାଲିବ ସେଫ୍ଟି ଡ୍ରାଇଭ୍। ବିଭିନ୍ନ ଷ୍ଟେସନରେ ହେବାକୁ ଥିବା ଏହି ଅଭିଯାନରେ ଅପରେଟିଂ ଏବଂ ଇଲେକ୍ରିକାଲ ବିଭାଗ କର୍ମଚାରୀ ସାମିଲ ହେବେ। ଲୋକୋ ପାଇଲଟ୍ ଓ ସଣ୍ଟର ମିଳିତ ଭାବେ ମନିଟର କରିବାକୁ ପରାମର୍ଶ ଦିଆଯାଇଛି। ରେଲେୱେର ମୁଖ୍ୟ ନିରାପତ୍ତା ଅଧିକାରୀ ସୁରକ୍ଷା ଅଭିଯାନର ତଦାରଖ କରିବେ। ଶେଷରେ ରେଳ ନିରାପତ୍ତା ନେଇ କ’ଣ ଅଧିକ ପଦକ୍ଷେପ ନିଆଯାଇପାରିବ, କ’ଣ କଲେ ଦୁର୍ଘଟଣାକୁ ରୋକାଯାଇ ପାରିବ, ଏନେଇ ଜିଏମ୍ ରିପୋର୍ଟ କରିବେ। ଜିଏମଙ୍କ ରିପୋର୍ଟ ଆଧାରରେ ଆଗାମୀ ପଦକ୍ଷେପ ନିଆଯିବ।