ସମ୍ୱଲପୁର ଆଇଆଇଏମ୍ ପ୍ରସଙ୍ଗ: ପ୍ରସ୍ତାବିତ ସ୍ଥାନ ବୁଲି ଦେଖିଲେ କେନ୍ଦ୍ରୀୟ ଅନୁଧ୍ୟାନକାରୀ ଦଳ

ସମ୍ୱଲପୁର: ସମ୍ୱଲପୁରରେ ପ୍ରସ୍ତାବିତ ଆଇଆଇଏମର ସ୍ଥାୟୀ ଓ ଅସ୍ଥାୟୀ କ୍ୟାମ୍ପସ୍ ପାଇଁ କ୍ଷେତ୍ର ପରିଦର୍ଶନ କରିଛନ୍ତି କେନ୍ଦ୍ରୀୟ ଅନୁଧ୍ୟାନକାରୀ ଦଳ। ସେମାନେ ଶନିବାର ବୁର୍ଲାରେ ପହଞ୍ଚିବା ପରେ ପ୍ରଥମେ ସମ୍ୱଲପୁର ବିଶ୍ୱବିଦ୍ୟାଳୟକୁ ଯାଇ ସମ୍ୱଲପୁର୍ ୟୁନିଭର୍ସିଟି ଇନଷ୍ଟିଚ୍ୟୁଟ୍ ଅଫ୍ ଇନଫରମେସନ୍ ଟେକ୍ନୋଲୋଜି ପରିସର ବୁଲି ଦେଖିଥିଲେ। ଏଠାରେ ଥିବା ଶ୍ରେଣୀ ଗୃହ, ହେଷ୍ଟଲ ଓ ଅନ୍ୟାନ୍ୟ ଭିତ୍ତିଭୂମିର ତଦାରଖ କରିଥିଲେ। ପରେ କେନ୍ଦ୍ରୀୟ ଦଳ ଗୋଶାଳା ନିକଟ ବସନ୍ତପୁରର ପ୍ରସ୍ତାବିତ ସ୍ଥାୟୀ କ୍ୟାମ୍ପସ ଅଂଚଳକୁ ଯାଇ ବୁଲି ଦେଖିଥିଲେ। ଏହାପରେ ଟିମ୍ ରେଙ୍ଗାଲି ସ୍ଥିତ ସରକାରୀ ପଲିଟେକନିକ ବିଲ୍ଡିଂ ବୁଲି ଦେଖିଥିଲେ। ଏଥିସହିତ ସେମାନେ ଜିଲ୍ଲାସ୍ତରୀୟ ଅଧିକାରୀଙ୍କ ଠାରୁ ଆବଶ୍ୟକ ତଥ୍ୟ ସଂଗ୍ରହ କରିଥିଲେ। ପ୍ରତିନିଧି ଦଳରେ କେନ୍ଦ୍ର ମାନବସମ୍ୱଳ ବିକାଶ ମନ୍ତ୍ରାଳୟର ଡିରେକଟର ଅଫ୍ ମ୍ୟାନେଜମେଣ୍ଟ ଶୈଳେନ୍ଦ୍ର କୁମାର ଏବଂ ଆଇଆଇଏମ୍ ଇନ୍ଦୋରର ପ୍ରଫେସର ପବନ କୁମାର ସିଂଙ୍କ ସହ ଓଡ଼ିଶାର ସିପିଡବ୍ଲୁଡି ମୁଖ୍ୟଯନ୍ତ୍ରୀ ଉମେଶ ମିଶ୍ର ଏବଂ ବୈଷୟିକ ଶିକ୍ଷା ଓ ତାଲିମ୍ ସଚିବ ଅସିତ୍ ତ୍ରିପାଠୀ ରହିଛନ୍ତି ।