ଭୁବନେଶ୍ୱର (ଓଡ଼ିଶା ରିପୋର୍ଟର): ରାଜ୍ୟ ସରକାର କେଉଁ ବିଭାଗରେ କ’ଣ ନିଷ୍ପତ୍ତି ନେଉଛନ୍ତି? କେଉଁ ଅଫିସରଙ୍କ ନିକଟକୁ ଗଲା କେଉଁ ବିଭାଗର ଫାଇଲ୍? ଲୋକଙ୍କୁ ତା’ର ସବିଶେଷ ସୂଚନା ଦେବା ଲାଗି ‘ଓଡ଼ିଶା ସେକ୍ରେଟାରିଏଟ୍ ଓ୍ୱାର୍କ ଫ୍ଲୋ ଅଟୋମେସନ ସିଷ୍ଟମ୍-ଓ ସ୍ୱାସ୍’ ବ୍ୟବସ୍ଥା କରାଯାଇଛି। ଏଥିରେ ଇ-ଡେସ୍ପାଚ୍ରେ ସମସ୍ତ ଫାଇଲ୍ର ତଥ୍ୟ ଦେବାକୁ କୁହାଯାଇଛି। ହେଲେ ଅଧିକାଂଶ ବିଭାଗ ଇ-ଡେସ୍ପାଚ୍ରେ ଚିଠି ମାସ ମାସ ଧରି ଅପଲୋଡ୍ କରୁନାହାନ୍ତି। ଏମିତିକି ବହୁ ବିଭାଗର ୱେବସାଇଟ୍ ଘଣ୍ଟା ଘଣ୍ଟା ଧରି ମଧ୍ୟ ଖୋଲୁନି।
ବାଣିଜ୍ୟ ଓ ପରିବହନ ବିଭାଗର ୱେବସାଇଟ୍ରେ ଆଦୌ ରେକର୍ଡ ନାହିଁ। ସେହିଭଳି ରାଜ୍ୟ ପ୍ରଶାସନର ପ୍ରାଣ କୁହାଯାଉଥିବା ଅର୍ଥ ବିଭାଗ ୱେବସାଇଟରେ ଗତ ୧୫ ତାରିଖରୁ ଗୋଟିଏ ମଧ୍ୟ ନୂଆ ତଥ୍ୟ ଦିଆଯାଇନି। କମ୍ବଳରୁ ବାଳ ବାଛିଲା ଭଳି ପ୍ରାୟ ସବୁ ବିଭାଗର ଅବସ୍ଥା ଉଣା ଅଧିକେ ସମାନ ରହିଛି।
ଏମିତିକି ଇ-ଡେସପାଚ୍ କ୍ଷେତ୍ରରେ ଅଚଳାବସ୍ଥାର କାରଣ ଜାଣିବାକୁ ଗତ ବିଧାନସଭାରେ ଖୋଦ୍ ଶାସକ ଦଳର ବିଧାୟକ ଦେବାଶିଷ ନାୟକ ବିଧାନସଭାରେ ଏକ ଅଣତାରକା ପ୍ରଶ୍ନରେ ମୁଖ୍ୟମନ୍ତ୍ରୀଙ୍କଠାରୁ ଉତ୍ତର ଚାହିଁଥିଲେ। ଆଉ ମୁଖ୍ୟମନ୍ତ୍ରୀ ଉତ୍ତର ଦେଇଥିଲେ, "ସବୁ ଠିକ୍ ଚାଲିଛି।"
ଏହି ସମସ୍ୟା ନେଇ ମୁଖ୍ୟ ଶାସନ ସଚିବଙ୍କୁ ଆମେ ପଚାରିବାକୁ ଚେଷ୍ଟା କରିଥିଲେ ମଧ୍ୟ ସେ ଆମ ପ୍ରଶ୍ନକୁ ଏଡ଼ାଇ ଯାଇଥିଲେ।