ପିସିସି ସଭାପତି ପରିବର୍ତ୍ତନ ସମ୍ଭାବନା; ରାହୁଲଙ୍କୁ ଭେଟିଲେ ନିରଞ୍ଜନ, ଭକ୍ତ ଓ ପ୍ରଦୀପ

ଭୁବନେଶ୍ୱର: ପ୍ରଦେଶ କଂଗ୍ରେସ କମିଟି ସଭାପତି ପରିବର୍ତ୍ତନ ନେଇ ବଢିଲା ସମ୍ଭାବନା।  ଅାଜି ନୂଅାଦିଲ୍ଲୀରେ କଂଗ୍ରେସ ଉପାଧ୍ୟକ୍ଷ ରାହୁଲ ଗାନ୍ଧିଙ୍କୁ ଭେଟିଛନ୍ତି ଦଳର ୩ ନେତା ନିରଞ୍ଜନ ପଟ୍ଟନାୟକ, ଭକ୍ତ ଚରଣ ଦାସ ଓ ପ୍ରଦୀପ ମାଝୀ। ରାହୁଲ ଗାନ୍ଧିଙ୍କୁ ତାଙ୍କ ସରକାରୀ ବାସଭବନରେ ଭେଟିଛନ୍ତି।  ବେଶ୍ କିଛି ସମୟ ଧରି ରାହୁଲ ଏମାନଙ୍କ ସହ ଅାଲୋଚନା କରିଛନ୍ତି।  ୩ ଜଣଙ୍କ ସହ ଏକାଠି କି ପୃଥକ ପୃଥକ ଭାବେ ରାହୁଲ  ଅାଲୋଚନା କରିଛନ୍ତି ତାହା ସ୍ପଷ୍ଟ ହୋଇନାହିଁ।

ବଡ଼କଥା ହେଉଛି ପିସିସି ସଭାପତି ପଦ ପାଇଁ ଏଇ ୩ ନେତାଙ୍କ ନାଁ ରେସ୍‌ରେ ଅାଗରେ ରହିଛି।

ଅାଲୋଚନା ପରେ ରାହୁଲଙ୍କ ବାସଭବନରୁ ୩ ନେତା ଏକାଠି ଗୋଟିଏ ଗାଡିରେ ଫେରିଥିଲେ।

ରାହୁଲଙ୍କୁ ଭେଟିବା ପରେ ଭକ୍ତ ଦାସ ‘ଓଟିଭି’କୁ କହିଛନ୍ତି ଯେ ଆସନ୍ତା ୬ ତାରିଖରେ ରାହୁଲ ଦିଲ୍ଲୀରେ ଏକ ବୈଠକ ଡକାଇଛନ୍ତି। ଏଥିରେ ଓଡ଼ିଶାର ସମସ୍ତ ଦଳୀୟ ବିଧାୟକଙ୍କୁ ଯୋଗ ଦେବାକୁ କୁହାଯାଇଛି। ତା’ ସହିତ କିଛି ବରିଷ୍ଠ ନେତାଙ୍କୁ ବି ଡକା ଯାଇଛି।

ପଞ୍ଚାୟତ ନିର୍ବାଚନ ପୂର୍ବରୁ ହିଁ ପ୍ରସାଦ ହଟାଅ ଅଭିଯାନ ଜୋରଦାର ହୋଇଥିଲା। ପିସିସି ଓ ବିଧାୟକଙ୍କ ମଧ୍ୟରେ ଫାଟ ସ୍ପଷ୍ଟ ହୋଇଥିଲା।  ତେବେ ପଞ୍ଚାୟତ ନିର୍ବାଚନରେ କଂଗ୍ରେସର ଫ୍ଲଫ୍ ସୋ ପରେ ପ୍ରସାଦଙ୍କ ସ୍ଥାନରେ ନୂଅା ମୁଖିଅା ନିଯୁକ୍ତି ନେଇ ଚର୍ଚ୍ଚା ଜୋର ଧରିଛି।