‘ଯୁବଶକ୍ତିକୁ ଆତ୍ମନିର୍ଭର ଓ ସଶକ୍ତ କରିବା ପାଇଁ ଦେଢ଼ ବର୍ଷରେ ମିଶନ ମୋଡରେ କରାଯିବ ୧୦ ଲକ୍ଷ ନିଯୁକ୍ତି’

ମୋଦି ସରକାରଙ୍କ ୮ ବର୍ଷର ସଫଳତାର ହିସାବ ଦେଲେ କେନ୍ଦ୍ରମନ୍ତ୍ରୀ

Edited By OdishaReporter Bureau | By Manoranjan Sial
Angul
ଦୁଇ ମନ୍ତ୍ରୀଙ୍କୁ ଭବ୍ୟ ସ୍ୱାଗତ କରାଯାଉଛି
Photo: Facebook

ଅନୁଗୋଳ (ଓଡ଼ିଶା ରିପୋର୍ଟର): କେନ୍ଦ୍ରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱାଧୀନ ସରକାର ୮ ବର୍ଷ ପୂରଣ କରିଛି। ଏହି ଅବସରରେ ଅନୁଗୋଳ ଜିଲ୍ଲା ବଳରାମପ୍ରସାଦଠାରେ ‘ଗରିବ କଲ୍ୟାଣ ସମ୍ମିଳନୀ’ ଆୟୋଜିତ ହୋଇଯାଇଛି। ଏଥିରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ଶ୍ରମ ଓ ନିଯୁକ୍ତି ରାଷ୍ଟ୍ର ମନ୍ତ୍ରୀ ରାମେଶ୍ୱର ତେଲି ଯୋଗଦେଇ ମୋଦି ସରକାରଙ୍କ ୮ ବର୍ଷର ସଫଳତାର ହିସାବ ଦେଇଥିଲେ।

ସେ କହିଥିଲେ, ମୋଦି ସରକାରଙ୍କ ସେବା ଓ କଲ୍ୟାଣ ମନ୍ତ୍ରରେ ଆଜି ବଳରାମପ୍ରସାଦରେ ୧୦୦ ଶଯ୍ୟା ବିଶିଷ୍ଟ ଇଏସ୍‌ଆଇ ଡ଼ାକ୍ତରଖାନା ଓ ଝାରସଗୁଡ଼ାରେ ଇଏସ୍‌ଆଇର ଉପ-ଆଞ୍ଚଳିକ କାର୍ଯ୍ୟାଳୟ ଲୋକାର୍ପଣ କରାଯାଇଛି। ଏହି ଡ଼ାକ୍ତରଖାନା ଓ ଉପ-ଆଞ୍ଚଳିକ କାର୍ଯ୍ୟାଳୟ ଦ୍ୱାରା ହଜାର ହଜାର ଶ୍ରମିକ ଏବଂ କର୍ମଚାରୀ ଉପକୃତ ହେଉଛନ୍ତି ବୋଲି ଶ୍ରୀ ପ୍ରଧାନ କହିଛନ୍ତି।

ସେ ଆହୁରି କହିଛନ୍ତି, ଦେଶର ଯୁବଶକ୍ତିକୁ ଆତ୍ମନିର୍ଭର ଓ ସଶକ୍ତ କରିବା ପାଇଁ ଆସନ୍ତା ଦେଢ଼ ବର୍ଷ ମଧ୍ୟରେ ମିଶନ ମୋଡରେ ୧୦ ଲକ୍ଷ ନିଯୁକ୍ତିର ଘୋଷଣା କରାଯାଇଛି। ସେନାବାହିନୀରେ ନିୟୋଜିତ ହୋଇ ଦେଶ ସେବା କରିବା ପାଇଁ ‘ଅଗ୍ନିପଥ ଯୋଜନା’ ଆରମ୍ଭ ହୋଇଛି। ଏହି ଯୋଜନା ଦ୍ୱାରା ଅନୁଗୋଳ, ଓଡ଼ିଶା ସମେତ ଦେଶର ଲକ୍ଷାଧିକ ଯୁବବର୍ଗ ନଯୁକ୍ତିର ସୁଯୋଗ ପାଇବେ। ଦେଶର ଗରିବ, ଚାଷୀ ଭାଇ, ମାଆ ଭଉଣୀ, ଶ୍ରମଶକ୍ତି, ଜନଜାତି, ବଞ୍ଚିତ ବର୍ଗର ଲୋକଙ୍କର ଯେଭଳି କିଛି ଅସୁବିଧା ନହୁଏ, ସେଥିପାଇଁ ବିଭିନ୍ନ କଲ୍ୟାଣକାରୀ ଯୋଜନା ପ୍ରଣୟନ କରାଯାଇଛି। ପ୍ରାଥମିକତା ଭିତ୍ତିରେ ସମାଜର ଅନ୍ତିମ ଶ୍ରେଣୀରେ ଥିବା ନାଗରିକଙ୍କ ଜୀବନଶୈଳୀରେ ସମ୍ପନ୍ନତା ଆଣିବା ପାଇଁ ବିଶେଷ ଧ୍ୟାନ ଦିଆଯାଇଛି ବୋଲି ଶ୍ରୀ ପ୍ରଧାନ କହିଛନ୍ତି। 

ପ୍ରଧାନମନ୍ତ୍ରୀ ଆବାସ ଯୋଜନାରେ ଘର, ସ୍ୱଚ୍ଛ ଭାରତ ଯୋଜନାରେ ଶୌଚାଳୟ, ଉଜ୍ଜ୍ୱଳା ଯୋଜନାରେ ଗ୍ୟାସ, ଜଳ ଜୀବନ ମିଶନରେ ଘରକୁ ପାନୀୟ ଜଳ, କିଷାନ ସମ୍ମାନ ନିଧିରେ ଚାଷୀଙ୍କୁ ଟଙ୍କା, ଗରିବ କଲ୍ୟାଣ ଅନ୍ନ ଯୋଜନାରେ ମାଗଣା ଚାଉଳ, କୋଭିଡ୍‌ ସମୟରେ ଜନଧନ ଯୋଜନାରେ ସିଧା ଟଙ୍କା, ମାଗଣା ଟିକାକରଣ ଆଦି ମୋଦି ସରକାରରେ ବଡ଼ ଉପଲବ୍ଧି ଶ୍ରୀ ପ୍ରଧାନ କହିଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
You might also like More from author