ନୂଆପଡ଼ା(ମାୟାଧର ସରାଫ): ମଦ ପାଉଚ୍ରେ ଗାନ୍ଧୀ ଚଷମା। ନୂଆପଡ଼ା ଜିଲ୍ଲା ବୋଡ଼େନ୍ ଦେଶୀ ମଦଭାଟିରେ ପ୍ରସ୍ତୁତ ମଦ ପାଉଚ୍ରେ ଗାନ୍ଧୀ ଚଷମା ଚିହ୍ନ ଥିବାରୁ ସାଧାରଣରେ ପ୍ରବଳ ଅସନ୍ତୋଷ ପ୍ରକାଶ ପାଇଛି। ଗାନ୍ଧୀ ଚଷମା ଥିବା ସ୍ୱଚ୍ଛ ଭାରତ ଅଭିଯାନର ଲୋଗୋକୁ ଏହି ପାଉଚ୍ରେ ଛପା ଯାଇଥିବା ବେଳେ ଏହା ମହାତ୍ମା ଗାନ୍ଧୀଙ୍କ ପ୍ରତି ଅପମାନ ବୋଲି ଲୋକଙ୍କ ମଧ୍ୟ ମତ ପ୍ରକାଶ ପାଇଛି।
ମହାତ୍ମା ଗାନ୍ଧୀ ନିଶାମୁକ୍ତ ସମାଜ ପାଇଁ ସର୍ବଦା ଆହ୍ୱାନ ଦେଉଥିବା ବେଳେ ଚଳିତ ବର୍ଷ ତାଙ୍କର ୧୫୦ତମ ଜୟନ୍ତୀ ପାଳନ କରାଯାଉଛି। ହେଲେ ଦୁର୍ଭାଗ୍ୟର ବିଷୟ, ଗାନ୍ଧୀ ନିଶାକୁ ବିରୋଧ କରୁଥିବା ବେଳେ ତାଙ୍କ ଚଷମାକୁ ଦେଶୀ ମଦ ପାଉଚରେ ଦେଖିବାକୁ ମିଳିଛି। ଯାହାକୁ ସହଜରେ ଗ୍ରହଣ କରିପାରିନାହାନ୍ତି ସ୍ଥାନୀୟ ବୁଦ୍ଧିଜୀବୀ ଓ ମହିଳା। ସେଥିପାଇଁ ବିଭିନ୍ନ ସଂଗଠନ ପକ୍ଷରୁ ଏହାକୁ ବିରୋଧ କରାଯିବା ସହ ତୁରନ୍ତ ରୋକିବାକୁ ଦାବି କରିଛନ୍ତି। ଯଦି ପ୍ରଶାସନ ଏଥିପ୍ରତି ତିଳେ ମାତ୍ର ନଜର ନଦିଏ, ତାହାହେଲେ ଆଗାମୀ ଦିନରେ ଆନ୍ଦୋଳନ ତୀବ୍ରତର ହେବ ବୋଲି ଆନ୍ଦୋଳନକାରୀମାନେ ଧମକ ଦେଇଛନ୍ତି।
ଅନ୍ୟପକ୍ଷରେ ନୂଆପଡ଼ା ଅବକାରୀ ଅଧିକାରୀଙ୍କୁ ପଚରାଯିବାରୁ ସେ ଏସଂପର୍କରେ ଜାଣିନଥିବା କହିଛନ୍ତି।