ଥମୁନି ଜନନୀ ଯନ୍ତ୍ରଣା: ରାସ୍ତା କଡ଼ରେ ପିଲା ଜନ୍ମ କଲେ ଗର୍ଭବତୀ

କଲ୍ୟାଣସିଂହପୁର: ରାଜ୍ୟରେ ଜନନୀ ଯନ୍ତ୍ରଣା ଥମିବାର ନାଁ ଧରୁନି। ଗର୍ଭବତୀ କେତେ ବେଳେ ଭାରରେ ବୁହା ହେଉଛି ତ ଆଉ କେତେ ବେଳେ ଭେଳାରେ ନଦୀ ପାର ହେଉଛନ୍ତି। ବେଳେ ବେଳେ ଏମିତି ପରିସ୍ଥିତି ହୁଏ ଗର୍ଭବତୀ ଚାଲିଚାଲି ଡାକ୍ତରଖାନା ଯାଉଥିବା ବେଳେ ରାସ୍ତାରେ ପିଲା ଜନ୍ମ କରୁଛନ୍ତି। ଆଜି ଏମିତି ଏକ ଅଭାବନୀ ଘଟଣା ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ଅଞ୍ଚଳରେ ଘଟିଛି। ଏହି ବ୍ଲକରେ ଏପରି ଘଟଣା ପ୍ରଥମ ନୁହେଁ। ବାରମ୍ୱାର ଏପରୁ ଘଟୁଛି। ତଥାପି ପ୍ରଶାସନର ଚେତା ପଶୁନି।

କଲ୍ୟାଣସିଂହପୁର ବ୍ଲକ ସୁନାଖଣ୍ଡି ପଞ୍ଚାୟତ ଅନ୍ତର୍ଗତ ପଲ୍ଲୀ ଗାଁର ଜଣେ ଗର୍ଭବତୀ ଆଜି ଯନ୍ତ୍ରଣା ପାଉଥିଲେ। ପରିବାର ଲୋକଙ୍କଠାରୁ ଖବର ପାଇ ସ୍ଥାନୀୟ ଆଶା କର୍ମୀ ଆମ୍ୱୁଲାନ୍ସକୁ ଫୋନ୍‌ କରିଥିଲେ। ମାତ୍ର ଯୋଗାଯୋଗ ସମ୍ଭବ ହୋଇନଥିଲା। ପରେ ଆଶା କର୍ମୀ ଓ ପରିବାର ଲୋକେ ଗର୍ଭବତୀଙ୍କୁ ଏକ ଅଟୋରେ ୨୧ କିମି ଦୂର କଲ୍ୟାଣସିଂହପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ଗର୍ଭବତୀଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ଥିବାରୁ ରାୟଗଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟକୁ ଯିବା ପାଇଁ ଡାକ୍ତର ପରାମର୍ଶ ଦେଇଥିଲେ। ମାତ୍ର ଗର୍ଭବତୀ ଜଣକ ରାୟଗଡ଼ା ନଯାଇ ଅଟୋରେ ଘରକୁ ଫେରୁଥିଲେ। କଲ୍ୟାଣସିଂହପୁର ଡାକ୍ତରଖାନାରୁ ୫ କିମି ଗଲା ପରେ ଖସିଗୁଡ଼ା ନିକଟରେ ଗର୍ଭବତୀଙ୍କ ଯନ୍ତ୍ରଣା ଅସହ୍ୟ ହୋଇଥିଲା। ଫଳରେ ରାସ୍ତା ଗଡ଼ରେ ଗର୍ଭବତୀ ଜଣକ କନ୍ୟା ସନ୍ତାନ ଜନ୍ମ ଦେଇଥିଲେ। ପିଲା ଜନ୍ମ ହେଲା ପରେ ଆଶା କର୍ମୀ ପୁନର୍ବାରର ଆମ୍ୱୁଲାନ୍ସକୁ ଫୋନ୍‌ କରିଥିଲେ। ମାତ୍ର ଆମ୍ୱୁଲାନ୍ସ ନ ଆସିବାରୁ ସେହି ଅଟୋରେ ଜନନୀଙ୍କୁ କଲ୍ୟାଣସିଂହପୁର ଡାକ୍ତରଖାନାରେ ଭର୍ତ୍ତି କରାଯାଇଥିଲା। ନବଜାତ ଶିଶୁଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ଥିବାରୁ ରାୟଗଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା।

ଗର୍ଭବତୀଙ୍କୁ ଡାକ୍ତରଖାନା ନେବା ପାଇଁ କଲ୍ୟାଣସିଂହପୁର ବ୍ଲକକୁ ଏକ ବାଇକ୍‌ ଆମ୍ୱୁଲାନ୍ସ ଦିଆଯିବ ବୋଲି ଘୋଷଣା କରାଯାଇଥିଲା। ମାତ୍ର ଏପର୍ଯ୍ୟନ୍ତ ବାଇକ୍‌ ଆମ୍ୱୁଲାନ୍ସ ଯୋଗାଇ ଦିଆଯାଇନାହିଁ। ସେହିପରି ମା’ ଗୃହ କରିବା ପାଇଁ ଜିଲ୍ଲା ପ୍ରଶାସନ ଯୋଜନା ମଧ୍ୟ କରିଥିଲା। ହେଲେ ଏପର୍ଯ୍ୟନ୍ତ ମା’ ଗୃହର ପଦ ଚିହ୍ନ ନାହିଁ। ଯାହାଫଳରେ ଯନ୍ତ୍ରଣାରେ ଛଟପଟ ହେଉଛନ୍ତି ଜଜନୀ।