ଭୁବନେଶ୍ୱର (ଓଡ଼ିଶା ରିପୋର୍ଟର): ଭାରତୀୟ କ୍ରିକେଟ ଟିମର ପୂର୍ବତନ ସଦସ୍ୟ ଭିଭିଏସ ଲକ୍ଷ୍ମଣ ଟୁଇଟ୍ କରି ଭଦ୍ରକର ଜିଲ୍ଲାର ଜଣେ ମହିଳା ଚାଷୀଙ୍କୁ ପ୍ରଶଂସା କରିଛନ୍ତି। ତାଙ୍କ ନାମ ଛାୟାରାଣୀ ସାହୁ। ତାଙ୍କ ଘର ବାସୁଦେବପୁର ବ୍ଲକର କୁରୁଦା ଗାଁର। କରୋନା ଭଳି ସଂକଟ ଯୋଗୁଁ ଲକଡାଉନ୍ ଲାଗୁ ହୋଇଥିବା ବେଳେ ଛାୟାରାଣୀ ଗାଁ ଗାଁ ବୁଲି ମାଗଣାରେ ଲୋକଙ୍କୁ ପରିବା ବାଣ୍ଟୁଛନ୍ତି। ସେ କେବଳ ଗରିବ ନୁହେଁ, ସମସ୍ତଙ୍କୁ ମାଗଣାରେ ପରିବା ଦେଉଛନ୍ତି।
https://twitter.com/VVSLaxman281/status/1256443732590641157
ଛାୟାରାଣୀ ନିଜ ଗାଁ ସହିତ ଆଖ ପାଖ ପନ୍ଦରଟି ଗାଁର ଲୋକଙ୍କୁ ପରିବା ବାଣ୍ଟୁଛନ୍ତି। ସେ ବ୍ରାହ୍ମଣୀ ପଞ୍ଚାୟତର ୪ଟି ଗାଁ, ବିନାୟକପୁର ୫-୬ଟି ଗାଁ, ବାସୁଦେବପୁରର ୨-୩ଟି ଓ୍ୱାର୍ଡ ଓ ଇରମର ଗୋଟିଏ ଗାଁରେ ଦେଉଛନ୍ତି ପରିବା। ଆଉ ତାଙ୍କର ଏହି ନିଃସ୍ୱାର୍ଥପରତା ଭିଭିଏସ ଲକ୍ଷ୍ମଣଙ୍କୁ ଖୁବ୍ ପସନ୍ଦ ଆସିଛି। ତେଣୁ ସେ ଟୁଇଟ୍ କରି ଲେଖିଛନ୍ତି, ଯେତେବେଳେ ଲୋକେ ବହୁତ କଷ୍ଟରେ ଅଛନ୍ତି, ସେତେବେଳେ ଏମିତି ବି ଲୋକ ଅଛନ୍ତି, ଯେଉଁମାନେ ମାନବିକତା ଓ ନିଃସ୍ୱାର୍ଥପରତା ଦେଖାଇଛନ୍ତି। ଛାୟାରାଣା ସାହୁ ନିଜ ଉତ୍ପାଦିତ ପରିବାକୁ ସ୍ୱତଃପ୍ରବୃତ୍ତ ଭାବରେ ଆଖପାଖର ପନ୍ଦରଟି ଗାଁର ଲୋକଙ୍କୁ ବାଣ୍ଟିଛନ୍ତି।
ଆଜି ସକାଳେ ଲକ୍ଷ୍ମଣ ଏହି ଟୁଇଟ୍ କରିବା ପରେ ଅନେକ ଲୋକ ଛାୟାରାଣୀଙ୍କୁ ପ୍ରଶଂସା କରୁଛନ୍ତି। ଏ ନେଇ ଛାୟାରାଣୀଙ୍କ ପୁଅ ମାନସ ସାହୁ କହିଛନ୍ତି, ଆମ ପରିବାର ୭-୮ ଏକର ଜମିରେ ବିଭିନ୍ନ ପ୍ରକାରର ପରିବା ଚାଷ କରେ। ଭେଣ୍ଡି, ବାଇଗଣ, ବିଲାତି, ଅଦା, କଞ୍ଚା ଲଙ୍କା, କଖାରୁ ଓ ବିଭିନ୍ନ ପ୍ରକାରର ଶାଗ ସହିତ ଅନ୍ୟାନ୍ୟ ପନିପରିବା ଚାଷ କରେ। ଏବେ ଲକଡାଉନ୍ ପାଇଁ ବ୍ୟବସାୟୀଙ୍କୁ ଆଉ ଆମେ ପରିବା ବିକ୍ରି କରୁନାହୁଁ। ସେହି ପରିବାକୁ ଆମେ ଗାଁ ଗାଁ ବୁଲି ଲୋକଙ୍କୁ ପ୍ୟାକେଟ କରି ବାଣ୍ଟି ଦେଉଛୁ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
