ଭୁବନେଶ୍ୱର (ଓଡ଼ିଶା ରିପୋର୍ଟର): ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେଉଁ ପଇସାରେ ଇଟାଲୀ ଗସ୍ତରେ ଯାଇଥିଲେ। ଯଦି ସରକାରୀ ପଇସାରେ ଯାଇଥିଲେ, ତାହାହେଲେ କ’ଣ କରିବାକୁ ଯାଇଥିଲେ? କ’ଣ ଉପଲବ୍ଧି କଲେ? ମୁଖ୍ୟମନ୍ତ୍ରୀ ଇଟାଲୀ ଯିବାର ୭ ଦିନ ପରେ ଆଜି ଏହି ପ୍ରଶ୍ନ ପଚାରିଛନ୍ତି ବରିଷ୍ଠ ବିଜେପି ବିଧାୟକ ଜୟନାରାୟଣ ମିଶ୍ର।
ଜୟନାରାୟଣ କହିଛନ୍ତି, ଲାଇନ୍ରେ ଛିଡ଼ା ହୋଇ ପୋପ୍ଙ୍କୁ ଭେଟିବାର କ’ଣ ଆବଶ୍ୟକତା ଥିଲା? ନବୀନବାବୁ କେବେ ତ ଶଙ୍କରାଚାର୍ଯ୍ୟଙ୍କୁ ଭେଟି ନାହାନ୍ତି। ଆଉ ଓଡ଼ିଶାକୁ ଯଦି ଖ୍ରୀଷ୍ଟିଆନ ରାଜ୍ୟରେ ପରିଣତ କରିବାକୁ ନବୀନ ପଟ୍ଟନାୟକ ଚାହୁଁଛନ୍ତି, ତାହାହେଲେ ଆମେ ତାକୁ ଘୋର ବିରୋଧ କରିବୁ। ନବୀନ ପଟ୍ଟନାୟକ ଓଡ଼ିଶାର ସଂସ୍କୃତି ଓ ପରମ୍ପରା ବ୍ୟାହତ କରିବାକୁ ଚେଷ୍ଟା କଲେ ବିରୋଧ କରିବୁ ବୋଲି ଶ୍ରୀ ମିଶ୍ର କହିଛନ୍ତି।
ଓଡ଼ିଶାକୁ ଖ୍ରୀଷ୍ଟିଆନ୍ ରାଜ୍ୟରେ ପରିଣତ କରିବାକୁ ନବୀନ ଚାହୁଁଛନ୍ତି ବୋଲି କେମିତି ଜାଣିଲେ ପ୍ରଶ୍ନରେ ଜୟନାରାୟଣ କହିଛନ୍ତି, ପୋପ୍ଙ୍କୁ ଭେଟିବାକୁ କାହିଁକି ଯାଇଥିଲେ? ପୋପ୍ଙ୍କ ସହିତ ତାଙ୍କର ସମ୍ପର୍କ କ’ଣ? ପୋପ୍ କୌଣସି ନ୍ୟାସନାଲ୍ ଲିଡର ନୁହଁନ୍ତି। ସେ ଲାଇନ୍ରେ ଛିଡ଼ା ହୋଇ ପୋପ୍ଙ୍କୁ ଭେଟିଛନ୍ତି। ପୋପ୍ଙ୍କୁ କ’ଣ ପାଇଁ ଭେଟିବାକୁ ଚାହିଁଥିଲେ? ଓଡ଼ିଶାର ବାସିନ୍ଦା ତଥା ବିରୋଧୀ ଦଳ ବିଧାୟକ ହିସାବରେ ସେ କଥା ଆମେ ଜାଣିବାକୁ ଚାହୁଁଛୁ। କାରଣ ସେ ସରକାରୀ ପଇସାରେ ଇଟାଲୀ ଯାଇଥିଲେ। ଏହି ପ୍ରସଙ୍ଗ ବିଧାନ ସଭାରେ ଉଠିବ। ତାଙ୍କର ଯଦି ଧର୍ମ ଉପରେ ଏତେ ବିଶ୍ୱାସ ରହିଛି, ତାହାହେଲେ କାହିଁତ ଦିନେ ଶଙ୍କରାଚାର୍ଯ୍ୟଙ୍କୁ ଦେଖା କରିବାକୁ ଗଲେନାହିଁ ବୋଲି ଶ୍ରୀ ମିଶ୍ର ପ୍ରଶ୍ନ କରିଛନ୍ତି।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୨୦ ତାରିଖରୁ ୧୦ ଦିନିଆ ବିଦେଶ ଗସ୍ତରେ ଯାଇଥିଲେ। ସେ ଇଟାଲୀର ରୋମରେ ୬ଦିନ ରହିଥିଲେ। ଜୁନ୍ ୨୨ ତାରିଖରେ ଭାଟିକାନସିଟିରେ ପୋପ୍ ଫ୍ରାନ୍ସିସଙ୍କୁ ଭେଟିଥିଲେ। ପୋପ୍ଙ୍କୁ ଭେଟିବା ପାଇଁ ମୁଖ୍ୟମନ୍ତ୍ରୀଙ୍କୁ ୪୦ ମିନିଟ୍ ଧରି ଖରାରେ ବସିବାକୁ ପଡ଼ିଥିଲେ। ତା’ପରେ ଧାଡ଼ିରେ ଯାଇ ପୋପ୍ଙ୍କୁ ଭେଟିଥିଲେ। ସେହିପରି ଜୁନ୍ ୨୪ ତାରିଖରେ ‘ୟୁଏନ୍ ୱାଲର୍ଡ ଫୁଡ୍ ପ୍ରୋଗ୍ରାମ(ୟୁଏନଡବ୍ଲ୍ୟୁଏଫପି)’ର ରୋମସ୍ଥିତ ମୁଖ୍ୟାଳୟକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଜର ପ୍ରତିନିଧି ଦଳ ସହ ଗସ୍ତ କରି ‘ଓଡ଼ିଶା ଖାଦ୍ୟ ସୁରକ୍ଷା ମଡେଲ’ ଓ ସଫଳତା ସମ୍ପର୍କରେ ୟୁଏନଡବ୍ଲ୍ୟୁଏଫପି ମୁଖ୍ୟ ଡେଭିଡ୍ ବାସଲେଙ୍କୁ ଅବଗତ କରାଇଥିଲେ। ମୁଖ୍ୟମନ୍ତ୍ରୀଙ୍କ ବିଦେଶ ଗସ୍ତ ସରକାରୀ ବୋଲି ଦର୍ଶା ଯାଇଛି।