ବେଙ୍ଗଲୁରୁ: ଅଧିନାୟକ ମିଥାଲି ରାଜଙ୍କ ଅପରାଜିତ ୮୧ ରନ ଓ ସ୍ମୃତି ମନ୍ଧାନାଙ୍କ ୬୬ ରନ ବଳରେ ଭାରତୀୟ ମହିଳା କ୍ରିକେଟ ଟିମ୍ ସୋମବାର ଜିତିଯାଇଛି ନ୍ୟୁଜିଲ୍ୟାଣ୍ଡ ବିପକ୍ଷ ଚତୁର୍ଥ ଦିନିକିଆ ମ୍ୟାଚ। ନ୍ୟୁଜିଲ୍ୟାଣ୍ଡକୁ ୮ଟି ୱିକେଟରେ ହରାଇ ଭାରତୀୟ ଟିମ୍ ଏହି ୫ ଟିକିଆ ଦିନିକିଆ ସିରିଜରେ ସ୍ଥିତିକୁ ବରାବର କରିଦେଇଛି। ଉଭୟ ଦଳ ଦୁଇଟି ଲେଖାଏଁ ମ୍ୟାଚ ଜିତିଛନ୍ତି। ତେଣୁ ଶେଷ ମ୍ୟାଚଟି ଉଭୟଙ୍କ ପାଇଁ ଗୁରୁତ୍ୱପୁର୍ଣ୍ଣ।
ଟସ ଜିତି ପ୍ରଥମେ ବ୍ୟାଟିଂ କରିଥିଲା ନ୍ୟୁଜିଲ୍ୟାଣ୍ଡ। ୪୯.୫ ଓଭରରେ ସମସ୍ତ ୱିକେଟ ହରାଇ ଦଳ ୨୨୦ ରନ ସଂଗ୍ରହ କରିଥିଲା। ଦଳ ପକ୍ଷରୁ ଏସଏଫ୍ଏମ ଡିଭାଇନଙ୍କ ୮୯ ଓ ଏଇ.ସାଟ୍ଟରର୍ଥୱାଇଟଙ୍କ ୪୩ ରନ କରିଥିଲେ। ଭାରତ ପକ୍ଷରୁ ଝୁଲଣ ଗୋସ୍ୱାମୀ ୧୦ ଓଭରରେ ୩୧ ରନ ଦେଇ ୧ଟି ୱିକେଟ ନେଇଥିବା ବେଳେ ଏନ.ନିରଞ୍ଜନା ୫.୫ ଓଭରରେ ୩୫ ରନ ଦେଇ ୩ଟି ୱିକେଟ ଓ ଆରଏସ ଗାଏକ୍ୱାଡ ୧୦ ଓଭରରେ ୨୫ ରନ ଦେଇ ୩ଟି ୱିକେଟ ହାସଲ କରିଥିଲେ।
୨୨୧ ରନର ବିଜୟ ଲକ୍ଷ୍ୟକୁ ଭାରତୀୟ ମହିଳା ଦଳ ମାତ୍ର ଦୁଇ ୱିକେଟ ହରାଇ ୪୪.୨ ଓଭରରେ ହାସଲ କରିନେଇଥିଲା। ଅଧିନାୟକ ମିଥାଲି ରାଜଙ୍କ ଅପରାଜିତ ୮୧(୮୮ ବଲ,୧୦ ଚୌକା) ଓ ଓପନର ସ୍ମୃତି ମନ୍ଧାନାଙ୍କ ୬୬(୯୯ ବଲ,୮ଚୌକା) ବଳରେ ଭାରତୀୟ ଦଳ ବେଶ ସହଜରେ ଏହି ମ୍ୟାଚ ଜିତିଯାଇଥିଲା। ଓପନର ଏମଡିଟି କାମିନି ୫୪ ବଲରୁ ୩୧ ରନ ସଂଗ୍ରହ କରିଥିଲେ। ସେହିଭଳି ଏଚ.କାଉର ୨୭ଟି ବଲରେ ୩୨ ରନ କରି ଶେଷ ପର୍ଯ୍ୟନ୍ତ ମିଥାଲି ରାଜଙ୍କ ସହିତ ଅପରାଜିତ ଥିଲେ।