ବର୍ମିଂହାମ୍: ବିଶ୍ୱ ଟେଷ୍ଟ ଚାମ୍ପିୟନଶିପର ଫାଇନାଲକୁ ଆଉ ମାତ୍ର ୪ ଦିନ ବାକି ରହିଲା। ଏହା ପୂର୍ବରୁ ଟିମ୍ ଇଣ୍ଡିଆକୁ ବଡ଼ ଝଟକା ଲାଗିଛି। ଆଇସିସି ଟେଷ୍ଟ ରାଙ୍କିଙ୍ଗରେ ଟିମ୍ ଇଣ୍ଡିଆର ଶୀର୍ଷ ସ୍ଥାନ ଛଡ଼ାଇ ନେଇଛି ନ୍ୟୁଜିଲ୍ୟାଣ୍ଡ। ଏଠାରେ ଖେଳାଯାଇଥିବା ଦ୍ୱିତୀୟ ଟେଷ୍ଟରେ ନ୍ୟୁଜିଲ୍ୟାଣ୍ଡ କ୍ରିକେଟ୍ ଟିମ୍ ଘରୋଇ ଇଂଲଣ୍ଡକୁ ୮ ୱିକେଟରେ ହରାଇ ଦୁଇମ୍ୟାଚ୍ ବିଶିଷ୍ଟ ସିରିଜକୁ ୧-୦ରେ ଜିତି ନେଇଛି। ଏହି ବିଜୟ ହିଁ ନ୍ୟୁଜିଲ୍ୟାଣ୍ଡକୁ ଆଇସିସି ଟେଷ୍ଟ ରାଙ୍କିଙ୍ଗରେ ଶୀର୍ଷ ସ୍ଥାନରେ ପହଞ୍ଚାଇବାରେ ସହାୟକ ହୋଇଛି।
ଏହା ପୂର୍ବରୁ ଭାରତୀୟ ଟିମ୍ ରାଙ୍କିଙ୍ଗର ଏକ ନମ୍ବର ସ୍ଥାନରେ ଥିଲା । କିନ୍ତୁ ଏବେ ନ୍ୟୁଜିଲ୍ୟାଣ୍ଡ ଭାରତକୁ ଗାଦିଚ୍ୟୁତ କରିଦେଇଛି। ଭାରତ ଓ ନ୍ୟୁଜିଲ୍ୟାଣ୍ଡ୍ ମଧ୍ୟରେ ସାଉଥାମ୍ପଟନରେ ବିଶ୍ୱ ଟେଷ୍ଟ ଚାମ୍ପିୟନଶିପର ଫାଇନାଲ୍ ମ୍ୟାଚ୍ ଜୁନ୍ ୧୮ ତାରିଖରେ ଖେଳାଯିବ। ଏହା ପୂର୍ବରୁ ଦୁନିଆର ଏକ ନମ୍ବର ଟିମ୍ ହେବା ନ୍ୟୁଜିଲ୍ୟାଣ୍ଡର ମନୋବଳକୁ ନିଶ୍ଚିତ ବଢ଼ାଇବ।
ଏଜବାଷ୍ଟନ ଟେଷ୍ଟରେ ନ୍ୟୁଜିଲ୍ୟାଣ୍ଡ୍ ଉଭୟ ବ୍ୟାଟିଂ ଓ ବୋଲିଂରେ କମାଲ୍ କରିଛି । ଇଂଲଣ୍ଡ ଟିମ୍ ଚତୁର୍ଥ ଦିବସରେ ଦ୍ୱିତୀୟ ଇନିଂସର ଅସମାପ୍ତ ସ୍କୋର ୯ ୱିକେଟରେ ୧୨୨ ରନରୁ ଖେଳ ଆରମ୍ଭ କରିଥିଲା। ଟ୍ରେଣ୍ଟ ବୋଲ୍ଟ ଦିବସର ପ୍ରଥମ ବଲରେ ଓଲି ଷ୍ଟୋନ୍ (୧୫)ଙ୍କୁ ଆଉଟ୍ କରି ଆୟୋଜନ ଦଳର ଇନିଂସ୍ ପରିସମାପ୍ତି ଘଟାଇଥିଲେ।
ନ୍ୟୁଜିଲ୍ୟାଣ୍ଡ୍ ପକ୍ଷରୁ ମ୍ୟାଟ୍ ହେନରୀ ଓ ନିଲ୍ ୱାଗନର୍ ୩ଟି ଲେଖାଏ ଏବଂ ବୋଲ୍ଟ ଓ ଏଜାଜ ପଟେଲ୍ ୨ଟି ଲେଖାଏ ୱିକେଟ୍ ନେଇଥିଲେ। ୩୮ ରନର ବିଜୟ ଲକ୍ଷ୍ୟକୁ ନ୍ୟୁଜିଲ୍ୟାଣ୍ଡ ୧ ୱିକେଟ୍ ହରାଇ ହାସଲ କରିନେଇଥିଲା। ଏହି ବିଜୟ ସହ ନ୍ୟୁଜିଲ୍ୟାଣ୍ଡ୍ ଗତ ୭ ବର୍ଷରେ ପ୍ରଥମ ଭ୍ରମଣକାରୀ ଟିମ୍ ଭାବେ ଇଂଲଣ୍ଡକୁ ତା’ ନିଜ ମାଟିରେ ଟେଷ୍ଟ ସିରିଜରେ ପରାସ୍ତ କରିଛି।
ଉକ୍ତ ମ୍ୟାଚରେ ନ୍ୟୁଜିଲ୍ୟାଣ୍ଡର ମ୍ୟାଟ୍ ହେନରୀ ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ ହୋଇଛନ୍ତି। ସେହିପରି ଏହି ସିରିଜ୍ ଜରିଆରେ ଡେବ୍ୟୁ କରିଥିବା ଡେଭନ୍ କନୱେ ପ୍ଲେୟର୍ ଅଫ୍ ଦି ସିରିଜ୍ ବିବେଚିତ ହୋଇଛନ୍ତି।