ଭୁବନେଶ୍ୱର(ଓଡ଼ିଶା ରିପୋର୍ଟର): ନିର୍ଣ୍ଣାୟକ ସ୍ଥିତିରେ ଭାରତ-ଦକ୍ଷିଣ ଆଫ୍ରିକା ଦ୍ୱିତୀୟ ଟେଷ୍ଟ୍। ଆଜି ସେଞ୍ଚୁରିଅନ୍ ଟେଷ୍ଟର ପଞ୍ଚମ ତଥା ଅନ୍ତିମ ଦିନ ହୋଇଥିବା ବେଳେ ସଂକଟଜନକ ସ୍ଥିତିରେ ରହିଛି ଟିମ୍ ଇଣ୍ଡିଆ। ଗତକାଲି ଚତୁର୍ଥ ଦିନରେ ଦକ୍ଷିଣ ଆଫ୍ରିକା ପକ୍ଷରୁ ଭାରତକୁ ୨୮୭ ରନର ବିଜୟ ଲକ୍ଷ୍ୟ ଦିଆଯାଇଥିଲା। ହେଲେ ଏହି ଲକ୍ଷ୍ୟକୁ ପିଛା କରି ସଙ୍କଟରେ ପଡ଼ିଛି ଟିମ୍। ୪ର୍ଥ ଦିନର ଖେଳ ଶେଷ ସୁଦ୍ଧା ଭାରତ ୩ ଓ୍ୱିକେଟ୍ ହରାଇ ୩୫ ରନ୍ କରିଥିଲା। ବିଜୟ ପାଇଁ ଆଜି ଦଳକୁ ୨୫୨ ରନର ଆବଶ୍ୟକତା ରହିଛି। ଗତକାଲି ଦୁଇ ଓପ୍ନର୍ ମୁରଲି ବିଜୟ ୯, ଲୋକେଶ ରାହୁଲ ୪ ରନ କରି ଆଉଟ୍ ହୋଇଥିଲେ। ଅଧିନାୟକ ବିରାଟ କୋହଲିଙ୍କ ଉପରେ ଦଳ ନିର୍ଭର କରୁଥିବା ବେଳେ ସେ କିନ୍ତୁ ୫ରନ୍ କରି ଆଉଟ୍ ହୋଇଥିଲେ। ଚତୁର୍ଥ ଦିନ ଷ୍ଟମ୍ପ୍ ଅପସାରଣ ସୁଦ୍ଧା ଚେତେଶ୍ୱର ପୂଜାରା ୧୧ ଓ ପର୍ଥିବ ପଟେଲ୍ ୫ ରନରେ ଅପରାଜିତ ରହିଛନ୍ତି।
ଏହି ମ୍ୟାଚ୍ ଜିତିବାର ସମ୍ଭାବନା ଯଦିଓ ଭାରତ ପାଇଁ କମ ରହିଛି ତେବେ ଚେତେଶ୍ୱର ପୂଜାର କିମ୍ବା ରୋହିତ ଶର୍ମାଙ୍କ ପ୍ରଦର୍ଶନ ଉପରେ ସବୁକିଛି ନିର୍ଭର କରିବ। ଏହି ଦୁଇଜଣ ମଧ୍ୟରୁ ଯଦି କୌଣସି ବ୍ୟାଟ୍ସମ୍ୟାନ୍ ଫର୍ମକୁ ଫେରିବେ ତେବେ ମ୍ୟାଚ୍ ଭାରତ ସପକ୍ଷରେ ରହିବ। ସେପଟେ ଆଜି ଭାରତର ବାକି ୭ଟି ଓ୍ୱିକେଟ୍ ନେଇ ବିଜୟ ହାସଲ କରିବାକୁ ଲକ୍ଷ୍ୟ ରଖିଛି ଦକ୍ଷିଣ ଆଫ୍ରିକା।
