ନୂଆଦିଲ୍ଲୀ: ଚଳିତ ବିଶ୍ୱକପ୍ରେ ମାଷ୍ଟର ବ୍ଲାଷ୍ଟର ସଚିନ୍ ତେନ୍ଦୁଲକରଙ୍କ ୧୬ ବର୍ଷର ରେକର୍ଡ ଭାଙ୍ଗି ଯିବ କି? ଏବେ ଏହାକୁ ନେଇ ଚର୍ଚ୍ଚା ଜୋର ଧରିଛି। ତେବେ ସଚିନ୍ଙ୍କ ଏହି ରେକର୍ଡଟି କ’ଣ?
୧୬ ବର୍ଷ ତଳେ ଅର୍ଥାତ୍ ୨୦୦୩ ବିଶ୍ୱକପ୍ରେ ସେ ୬୭୩ ରନ୍ କରିଥିଲେ। ଏହି ବିଶ୍ୱକପ୍ରେ ଭାରତ ଫାଇନାଲ୍ରେ ହାରିଥିବା ବେଳେ ସଚିନ୍ ‘ମ୍ୟାନ୍ ଅଫ୍ ଦ ସିରିଜ୍’ ହୋଇଥିଲେ। ଏହା ପରେ ତିନୋଟି ବିଶ୍ୱକପ୍ ଖେଳା ଯାଇଥିଲେ ହେଁ ତାଙ୍କର ଏହି ରେକର୍ଡକୁ କୌଣସି ବ୍ୟାଟ୍ସମ୍ୟାନ୍ କେହି ଭାଙ୍ଗି ପାରି ନାହାନ୍ତି। ସେହିପରି ଯେକୌଣସି ବିଶ୍ୱକପ୍ରେ ଏହା ହେଉଛି ସର୍ବାଧିକ ରନ୍। କିନ୍ତୁ ଚଳିତ ବିଶ୍ୱକପ୍ରେ ସଚିନ୍ଙ୍କ ଏହି ରେକର୍ଡ ଭାଙ୍ଗିବା ପାଇଁ କିଛି ଖେଳାଳିଙ୍କ ପାଖରେ ସୁଯୋଗ ରହିଛି। କାରଣ ଏଯାବତ୍ ତିନି ଜଣ ଖେଳାଳି ୪୦୦ ରନ୍ କରି ସାରିଲେଣି। ସେମାନେ ହେଲେ ଅଷ୍ଟ୍ରେଲିଆର ଡାଭିଡ ୱାର୍ଣ୍ଣର, ବାଂଲାଦେଶର ଶକିବ୍ ଅଲ୍ ହାସନ ଓ ଇଂଲଣ୍ଡର ଜୋ ରୁଟ୍।
ଲିଗ୍ ପର୍ଯ୍ୟାୟରେ ଅଷ୍ଟ୍ରେଲିଆ, ବାଂଲାଦେଶ ଓ ଇଂଲଣ୍ଡ ଆହୁରି ତିନିଟି ଲେଖାଏ ମ୍ୟାଚ୍ ଖେଳିବାକୁ ଥିବା ବେଳେ ଏହି ଖେଳାଳିମାନେ ସଚିନ୍ଙ୍କ ରେକର୍ଡ ଭାଙ୍ଗିବାକୁ ସୁଯୋଗ ପାଇବେ। ଅନ୍ୟପକ୍ଷରେ ଅଷ୍ଟ୍ରେଲିଆର ଅଧିନାୟକ ଏରୋନ୍ ଫିଞ୍ଚ୍ ଏଯାବତ୍ ୩୯୬ ରନ୍ କରି ସାରିଲେଣି। ଭାରତ ପକ୍ଷରୁ ରୋହିତ ଶର୍ମା ସର୍ବାଧିକ ୩୧୯ ରନ୍ କରିଛନ୍ତି।