ନୂଆଦିଲ୍ଲୀ: ତାଇପେଇର ତାଓୟୁଆନଠାରେ ଚାଲିଥିବା ଦ୍ୱାଦାଶ ଏସିଆନ୍ ଏୟାରଗନ୍ ଚାମ୍ପିଅନଶିପରେ ଭାରତର ସରବଜୋତ୍ ସିଂହ ଓ ଈଶା ସିଂହ ଯଥାକ୍ରମେ ୧୦ ମିଟର ଏୟାର ପିସ୍ତଲ ପୁରୁଷ ଓ ମହିଳା ଜୁନିୟର ଇଭେଣ୍ଟରେ ସ୍ୱର୍ଣ୍ଣ ପଦକ ଜିତିଛନ୍ତି। ସରବଜୋତ୍ ମଧ୍ୟ ଅର୍ଜୁନ ଚୀମା ଓ ବିଜୟବୀର ସିଦ୍ଧୁଙ୍କ ସହ ମିଶି ଜୁନିୟର ଟିମ୍ ଇଭେଣ୍ଟରେ ସ୍ୱର୍ଣ୍ଣ ପଦକ ଜିତିଛନ୍ତି।
ଭାରତ ଏପର୍ଯ୍ୟନ୍ତ ଏହି ଚାମ୍ପିଅନଶିପରେ ୮ ସ୍ୱର୍ଣ୍ଣ, ୪ ରୌପ୍ୟ ଓ ୨ ବ୍ରୋଞ୍ଜ ପଦକ ଜିତିଛି। ସରବଜୋତ୍ କ୍ୱାଲିଫାୟରରେ ୫୭୯ ସ୍କୋର ସହ ଶୀର୍ଷରେ ରହିଥିଲେ। ଏହା ପରେ ସେ ଫାଇନାଲରେ ୨୩୭.୮ ସ୍କୋର ସହ ସ୍ୱର୍ଣ୍ଣ ପଦକ ଜିତିଥିଲେ। ତାଙ୍କ ପରକୁ କୋରିଆର ୨୩୬.୬ ସ୍କୋର ସହ ରୌପ୍ୟ ପଦକ ହାସଲ କରିଥିଲେ।
ଏହି ଇଭେଣ୍ଟରେ ଭାରତର ଅନ୍ୟତମ ଶୁଟର ବିଜୟବୀର ୨୧୭.୫ ସ୍କୋର ସହ ବ୍ରୋଞ୍ଜ ପଦକ ଜିତିଥିବା ବେଳେ ଅର୍ଜୁନ ଚୀମା ଚତୁର୍ଥ ସ୍ଥାନରେ ରହିଥିଲେ। ଏହି ଭାରତୀୟ ଯୋଡ଼ି ୧୭୧୮ ସ୍କୋର ସହ ଟିମ ଇଭେଣ୍ଟରେ ସ୍ୱର୍ଣ୍ଣ ଓ ତାଇପେଇ ଯୋଡ଼ି ୧୬୯୯ ସ୍କୋର ସହ ରୌପ୍ୟ ପଦକ ଜିତିଥିଲେ।
ଜୁନିୟର ମହିଳା ବର୍ଗରେ ଈଶା କ୍ୱାଲିଫାଇଙ୍ଗରେ ୫୭୬ ସ୍କୋର ସହ ଶୀର୍ଷରେ ରହିଥିଲେ। ଫାଇନାଲରେ ସେ ୨୪୦.୧ ସ୍କୋର ସହ ସ୍ୱର୍ଣ୍ଣ ଓ କୋରିଆର ୟୁନ୍ ସିଅନଜିଅଙ୍ଗ ୨୩୫ ସ୍କୋର ସହ ରୌପ୍ୟ ପଦକ ଜିତିଥିଲେ। ଏହି ଇଭେଣ୍ଟରେ ଅନ୍ୟ ଭାରତୀୟ ଶୁଟର ଯଥା ହର୍ଶଦା ନିଥାବେ ଓ ଦେବାଂଶୀ ଧାମା ଯଥାକ୍ରମେ ପଞ୍ଚମ ଓ ଅଷ୍ଟମ ସ୍ଥାନରେ ରହିଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
