ମାଉଣ୍ଟ ମାଉଙ୍ଗାନୁଇ: ଭାରତ ପଞ୍ଚମ ଟି-୨୦ ମ୍ୟାଚରେ ନ୍ୟୁଜିଲ୍ୟାଣ୍ଡକୁ ହରାଇ ପାଞ୍ଚମ୍ୟାଚ୍ ବିଶିଷ୍ଟ ସିରିଜକୁ ୫-୦ରେ ପୋଛି ନେଇଛି। କିନ୍ତୁ ଏହି ମ୍ୟାଚକୁ ଅଲରାଉଣ୍ଡର ଶିବମ୍ ଦୁବେ ବ୍ୟକ୍ତିଗତ ଭାବେ ଆଦୌ ମନେ ରଖିବାକୁ ଚାହିଁବେ ନାହିଁ। ଦୁବେ ଟି-୨୦ ଅନ୍ତର୍ଜାତୀୟ ମ୍ୟାଚରେ ଗୋଟିଏ ଓଭରରେ ସର୍ବାଧିକ ରନ୍ ଦେବାରେ ଭାରତୀୟ ବୋଲର ହୋଇଛନ୍ତି। ଦୁବେ ଆଜିର ମ୍ୟାଚରେ ଏକ ଓଭରରେ ୩୪ ରନ୍ ଦେଇଛନ୍ତି।
ରସ୍ ଟେଲର ଓ ଟିମ୍ ସିଫର୍ଟ ଇନିଂସର ୧୦ମ ଓଭରରେ ଏହି ଯୁବ ବୋଲରଙ୍କୁ ନିର୍ଧୁମ୍ ଧୂଲେଇ କରିଥିଲେ। ସିଫର୍ଟ ଓଭରର ଶୁଭାରମ୍ଭ ଲଗାତର ଦୁଇଟି ଛକା ସହ ଆରମ୍ଭ କରିଥିଲେ ଏବଂ ତୃତୀୟ ବଲରେ ଚୌକା ମାରିଥିଲେ। ଏହା ପରେ ସେ ୧ ରନ୍ ନେଇ ଟେଲରଙ୍କୁ ଷ୍ଟ୍ରାଇକ୍ ଦେଇଥିଲେ। ଟେଲର୍ ଏହା ପରେ ଦୁବେଙ୍କୁ ଆକ୍ରମଣ କରିଥିଲେ। ଟେଲର ପ୍ରଥମେ ନୋ' ବଲରେ ଚୌକା ମାରିଥିଲେ।
ଏହା ପରେ ପଞ୍ଚ ଓ ଷଷ୍ଠ ବଲରେ ଲଗାତାର ଛକା ମାରିଥିଲେ। ଫଳରେ ଦୁବେଙ୍କ ଏହି ଓଭରରେ ୩୪ ରନ୍ ହୋଇଥିଲା ଏବଂ ତାଙ୍କ ନାଁରେ ଅଲୋଡା ରେକର୍ଡ ଯୋଡ଼ି ହୋଇଛି। ସେ ଟି-୨୦ରେ ଅନ୍ତର୍ଜାତୀୟ କ୍ରିକେଟରେ ଭାରତର ସବୁଠାରୁ ମହଙ୍ଗା ବୋଲର ହୋଇଛନ୍ତି। ୨୦୧୬ରେ ଷ୍ଟୁଆର୍ଟ ବିନ୍ନି ୱେଷ୍ଟଇଣ୍ଡିଜ୍ ବିପକ୍ଷରେ ଗୋଟିଏ ଓଭରରେ ୩୨ ରନ୍ ଦେଇଥିଲେ। ସେହିପରି ୨୦୧୨ରେ ଜୋହାନସବର୍ଗରେ ସୁରେଶ ରାଇନା ଦକ୍ଷିଣ ଆଫ୍ରିକା ବିପକ୍ଷରେ ୨୬ ରନ୍ ବ୍ୟୟ କରିଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
