ଇପୋ(ମାଲେସିଆ): ସୁଲତାନ ଆଜଲାନ ଶାହ କପ୍ର ଫାଇନାଲରେ ଆଜି ଭାରତକୁ ୪-୦ରେ ହରାଇ ନବମ ଥର ପାଇଁ ଚାମ୍ପିଅନ୍ ହୋଇଛି ଅଷ୍ଟ୍ରେଲିଆ।
ଅଷ୍ଟ୍ରେଲିଆର ୱିଲିୟମ୍ କ୍ରେଗ୍(୨୫ ଓ ୩୫ ମିନିଟ୍) ଓ ମାଟ୍ ଗୋହଡେସ୍( ୪୩ ଓ ୫୭ ମିନିଟ୍)ଙ୍କ ଦୁଇଟି ଲେଖାଏଁ ଗୋଲ ବଳରେ ଦଳ ଚାମ୍ପିଅନ୍ ହୋଇଛି।
ଭାରତ ଭଲ ଆରମ୍ଭ କରିଥିଲେ ମଧ୍ୟ ମଧ୍ୟାନ୍ତର ଓ ଶେଷାର୍ଦ୍ଧରେ ଏହାକୁ ବଜାୟ ରଖିପାରି ନ ଥିଲା। ଫଳରେ ଦଳ ପରାଜୟ ବରଣ କରିଛି।
ଗତକାଲି ମାଲେସିଆକୁ ୬-୧ରେ ହରାଇ ସପ୍ତମ ଥର ପାଇଁ ଭାରତୀୟ ଦଳ ଏହି କପ୍ର ଫାଇନାଲ୍ରେ ପ୍ରବେଶ କରିଥିଲା।
ଭାରତ ୫ ଥର ଏହି କପ୍ ଜିତିଛି। ଦଳ ୧୯୮୫, ୧୯୯୧, ୧୯୯୫, ୨୦୦୯ ଓ ୨୦୧୦ ମସିହାରେ ଏହି କପ୍ ହାତେଇ ଥିଲା। ୨୦୦୮ରେ ଭାରତୀୟ ଦଳ ଏହି କପ୍ରେ ରନର୍ସଅପ୍ ହୋଇଥିଲା। ସେହିପରି ୧୯୮୩, ୨୦୦୦, ୨୦୦୬, ୨୦୦୭, ୨୦୧୨ ଓ ୨୦୧୫ରେ ଦଳ ତୃତୀୟ ସ୍ଥାନରେ ରହିଥିଲା।
ଅନ୍ୟପକ୍ଷରେ ଅଷ୍ଟ୍ରେଲିଆ ଏହାକୁ ମିଶାଇ ମୋଟ ୯ ଥର ଏହି ଟାଇଟଲ୍ ଜିତିଛି। ୧୯୮୩, ୧୯୯୬, ୨୦୦୪, ୨୦୦୫, ୨୦୦୭, ୨୦୧୧, ୨୦୧୩ ଓ ୨୦୧୪ରେ ଦଳ ଏହି କପ୍ ଜିତି ଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
