ନୂଆଦିଲ୍ଲୀ: ଚଳିତ କ୍ରିକେଟ୍ ବିଶ୍ୱକପ୍ରେ ଭାରତୀୟ ଟିମ୍ ଆଜିଠାରୁ ତା’ର ଅଭିଯାନ ଆରମ୍ଭ କରିବ। ପ୍ରଥମ ମ୍ୟାଚ୍ରେ ଦଳ ଦକ୍ଷିଣ ଆଫ୍ରିକା ସହିତ ମୁହାଁମୁହିଁ ହେବ।
ଅଧିନାୟକ ବିରାଟ କୋହଲି ଏକ ସନ୍ତୁଳିତ ଟିମ୍ ନେଇ ଇଂଲଣ୍ଡ ଯାଇଥିବା ବେଳେ ଏଥିରେ ଭଲ ବ୍ୟାଟିଂ ଲାଇନ୍ ସହିତ ପେସ୍ ଓ ସ୍ପିନ୍ ବୋଲରଙ୍କ ଏକ ଭଲ ମିଶ୍ରଣ ରହିଛି। ଆଉ ସେମାନଙ୍କ ମଧ୍ୟରେ ଏମିତି ଜଣେ ଖେଳାଳି ଅଛନ୍ତି, ଯିଏ ଚେସ୍ ଖେଳ ଛାଡ଼ି କ୍ରିକେଟ୍ ବଲ୍ ପ୍ରେମରେ ପଡ଼ି ଯାଇଥିଲେ। ସେ ଚେସ୍ରେ ଭଲ ଚାଲ୍ ଚଲାଇ ପାରୁଥିଲେ, ଆଉ ଏବେ ବଲ୍ରେ ବି ଚକ୍ମା ଦେଇପାରୁଛନ୍ତି। ସେ ହେଉଛନ୍ତି, ସ୍ପିନର ୟୁଜବେନ୍ଦ୍ର ଚହଲ।
ୟୁଜବେନ୍ଦ୍ର କହିଛନ୍ତି,“ଚେସ୍ରୁ କ୍ରିକେଟ୍କୁ ଆସିବା ଏକ ସ୍ୱପ୍ନ ସଦୃଶ। ଯେତେବେଳେ ବି ଟିଭିରେ ବିଶ୍ୱକପ୍ରେ ଭାରତର ମ୍ୟାଚ୍ ଦେଖୁଥିଲି, ଦିନେ ନା ଦିନେ ମୁଁ ବି ଏଥିରେ ସାମିଲ ହେବି ବୋଲି ଭାବୁଥିଲି। ୨୦୧୭ରୁ ମୁଁ ଲଗାତାର ଭାବେ ଟିମ୍ ସହିତ ଅଛି। ତେବେ ବିଦେଶରେ ଭଲ ପ୍ରଦର୍ଶନ କରିବା ପରେ ବିଶ୍ୱକପ୍ ଟିମ୍ରେ ସାମିଲ ହେବା ନେଇ ସ୍ୱପ୍ନ ଦେଖିବା ଆରମ୍ଭ କରିଥିଲି। ଏବେ ମୋ ସ୍ୱପ୍ନ ପୂରଣ ହୋଇଛି। ବିଦେଶରେ ଭଲ ପ୍ରଦର୍ଶନ କରି ମୋ ଆତ୍ମବିଶ୍ୱାସ ବଢ଼ିଛି।”
ସୂଚନାଯୋଗ୍ୟ ଏଥର ବିଶ୍ୱକପ୍ ଖେଳିବାକୁ ଇଂଲଣ୍ଡ ଯାଇଥିବା ଟିମ୍ରେ ବିରାଟ କୋହଲି (ଅଧିନାୟକ), ଶିଖର ଧୱନ୍, ରୋହିତ୍ ଶର୍ମା, ଲୋକେଶ ରାହୁଲ, ମହେନ୍ଦ୍ର ସିଂହ ଧୋନି (ୱିକେଟ୍ କିପର୍), ହାର୍ଦ୍ଦିକ ପାଣ୍ଡ୍ୟା, କେଦାର ଯାଦବ, ବିଜୟ ଶଙ୍କର, କୁଲଦୀପ ଯାଦବ, ୟୁଜବେନ୍ଦ୍ର ଚହଲ, ଯଶପ୍ରୀତ ବୁମ୍ରା, ମହମ୍ମଦ ଶାମି, ଭୁବନେଶ୍ୱର କୁମାର, ଦିନେଶ କାର୍ତ୍ତିକ ଓ ରବୀନ୍ଦ୍ର ଜାଡେଜା ଅଛନ୍ତି।