ନୂଆଦିଲ୍ଲୀ: ଅଷ୍ଟ୍ରେଲିଆ ବିପକ୍ଷ ଘରୋଇ ସିରିଜ୍ରେ ଟିମ୍ ଇଣ୍ଡିଆ ୩-୨ରେ ପରାସ୍ତ ହେବା ପରେ ଚାରିଆଡ଼ୁ ସମାଲୋଚନାର ଶିକାର ହୋଇଥିଲା।
ବିଶେଷ କରି ଦଳ ୨-୦ରେ ଆଗୁଆ ରହିଥିଲେ ହେଁ ଭ୍ରମଣକାରୀ ଅଷ୍ଟ୍ରେଲିଆ ଶେଷ ୩ଟି ଯାକ ମ୍ୟାଚ୍ ଜିତି ସିରିଜ୍ କବଜା କରିଥିଲା। ତେବେ ଭାରତ ଦିନିକିଆ ସିରିଜ୍ କାହିଁକି ହାରିଲା, ତା’ର କାରଣ ଅଷ୍ଟ୍ରେଲିଆ କ୍ରିକେଟର ଡେଭିଡ୍ ୱାର୍ଣ୍ଣର କହିଛନ୍ତି। ସେ କହିଛନ୍ତି, ମହେନ୍ଦ୍ର ସିଂହ ଧୋନି ଶେଷ ଦୁଇ ମ୍ୟାଚ୍ ନ ଖେଳିବାରୁ ଭାରତକୁ ପରାଜୟ ବରଣ କରିବାକୁ ପଡ଼ିଲା।
ଏକ ଗଣାମଧ୍ୟମକୁ ୱାର୍ଣ୍ଣର କହିଛନ୍ତି, “ଏମ୍ଏସ୍(ଧୋନି) ଶେଷ ଦୁଇଟି ମ୍ୟାଚ୍ ଖେଳି ନଥିଲେ। ଏହା ହିଁ ଥିଲା ଦୁଇ ଦଳ ମଧ୍ୟରେ ସବୁଠାରୁ ବଡ଼ ପାର୍ଥକ୍ୟ। ଧୋନିଙ୍କ ଅନୁପସ୍ଥିତିରେ ଯେଉଁ ଶୂନ୍ୟସ୍ଥାନ ସୃଷ୍ଟି ହୋଇଥିଲା, ତାହା ଆମ (ଅଷ୍ଟ୍ରେଲିଆ) ପାଇଁ ସୁଯୋଗ ସୃଷ୍ଟି କରିଥିଲା। ଏହି ସୁଯୋଗର ଭରପୂର ଫାଇଦା ଆମେ ଉଠାଇଲୁ।
ତାଙ୍କ ଭଳି ଜଣେ ଖେଳାଳିଙ୍କ ଉପସ୍ଥିତି ହିଁ ଦୁଇ ଟିମ୍ ମଧ୍ୟରେ ଥିବା ବ୍ୟବଧାନକୁ ବୃଦ୍ଧି କରୁଥିଲା। ଯେହେତୁ ଧୋନି ନଥିଲେ, ତେଣୁ ଟିମ୍ ଇଣ୍ଡିଆ ଅଷ୍ଟ୍ରେଲିଆ ଠାରୁ ପରାସ୍ତ ହେଲା।”
ଧୋନିଙ୍କୁ ବିସିସିଆଇ ଅଷ୍ଟ୍ରେଲିଆ ବିପକ୍ଷ ଶେଷ ଦୁଇଟି ଦିନିକିଆରେ ବିଶ୍ରାମ ଦେଇଥିଲା। ତାଙ୍କ ବଦଳରେ ରିଷଭ ପନ୍ତ ୱିକେଟ୍ କିପିଂ କରିଥିଲେ। ହେଲେ ସେ କିପିଂରେ ସମସ୍ତଙ୍କୁ ନିରାଶ କରିଥିଲେ।