ପାଇକ ପଲିଟିକ୍ସ: ୨୦୦ ବର୍ଷର ଇତିହାସରୁ ଫାଇଦା ନେବାକୁ ବିଜେପି-ବିଜେଡି ଟଣାଓଟରା

ଭୁବନେଶ୍ୱର: ଦଳିତ ପରେ ବିଜେପି ଖେଳିବାକୁ ଚେଷ୍ଟା କରିଛି ପାଇକ କାର୍ଡ। ଆସନ୍ତା ୨୦ରେ ଦିଲ୍ଲୀର ବିଜ୍ଞାନ ଭବନରେ ପାଇକ ବିଦ୍ରୋହର ୨୦୦ ବର୍ଷ ପୂର୍ତ୍ତି ସମାରୋହ ହେବାକୁ ଯାଉଛି। ଏଥିପାଇଁ ପାଇକ ବିଦ୍ରୋହର ସହିଦଙ୍କ ଦାୟାଦ ଆଜି ଦିଲ୍ଲୀ ଯାଇଛନ୍ତି। ଏହି ସମାରୋହକୁ ଉଦ୍‌ଘାଟନ କରିବେ ରାଷ୍ଟ୍ରପତି ପ୍ରଣବ ମୁଖାର୍ଜୀ। ଏଥିରେ ଯୋଗଦେବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ମଧ୍ୟ ନିମନ୍ତ୍ରଣ କରାଯାଇଛି। ବିଜେପିର ଏପରି ଚାଲକୁ କାଉଣ୍ଟର କରିବା ଲାଗି ରାଜ୍ୟ ସରକାର ଗତ ମାର୍ଚ୍ଚରେ ଖୋର୍ଦ୍ଧାରେ ପାଇକ ବିଦ୍ରୋହ ସମାରୋହ ପାଳିଥିବା ବେଳେ ଆସନ୍ତା ସେପ୍ଟେମ୍ୱରରେ ଆଉ ଏକ ଉତ୍ସବ ଆୟୋଜନ ପାଇଁ ଲକ୍ଷ୍ୟ ରଖିଛନ୍ତି ସରକାର।

ପାରମ୍ପରିକ ଅସ୍ତ୍ରଶସ୍ତ୍ର ଧରି ପାଇକଙ୍କ ଦାୟାଦ ଦିଲ୍ଲୀ ଯାତ୍ରା କରୁଛନ୍ତି। ଆସନ୍ତା ଗୁରୁବାର ଆୟୋଜିତ ହେଉଥିବା ପାଇକ ବିଦ୍ରୋହର ୨୦୦ ବର୍ଷ ପୂର୍ତ୍ତି ଉତ୍ସବରେ ଯୋଗଦେବାକୁ ଏମାନେ ଦିଲ୍ଲୀ ଯାଇଛନ୍ତି। ସ୍ୱାଧୀନତା ଆନ୍ଦୋଳନର ପ୍ରଥମ ରକ୍ତାକ୍ତ ସଂଘର୍ଷ କୁହାଯାଉଥିବା ପାଇକ ବିଦ୍ରୋହ ଓ ବକ୍ସି ଜଗବନ୍ଧୁଙ୍କ ବୀରତ୍ୱର ଗାଥା ମନେପକାଇ ପାଇକ କାର୍ଡ ଖେଳିଛି ବିଜେପି। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ କେନ୍ଦ୍ର ସଂସ୍କୃତି ବିଭାଗ ଏହି ଉତ୍ସବର ଆୟୋଜନ କରୁଛି। ଏଥିପାଇଁ କେନ୍ଦ୍ରୀୟ ବଜେଟ୍‌ରେ ସ୍ୱତନ୍ତ୍ର ଭାବେ ଅର୍ଥ ବରାଦ ମଧ୍ୟ କରାଯାଇଥିଲା। ପୂର୍ବରୁ ଭୁବନେଶ୍ୱରଗସ୍ତ ବେଳେ ପାଇକ ବୀରଙ୍କ ଦାୟାଦଙ୍କୁ ସମ୍ବର୍ଦ୍ଧିତ କରିଥିଲେ ପ୍ରଧାନମନ୍ତ୍ରୀ। ଓଡ଼ିଶା ଗସ୍ତ ଅବସରରେ ଏନଡିଏର ରାଷ୍ଟ୍ରପତି ପ୍ରାର୍ଥୀ ରାମନାଥ କୋବିନ୍ଦ ବି ବକ୍ସି ଜଗବନ୍ଧୁଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିଥିଲେ। ବିଜେପି ନେତା ଓ ମନ୍ତ୍ରୀ ଦଳିତ ପରିବାରଙ୍କ ଘରେ ଭୋଜନ କରି ସଂପ୍ରଦାୟକୁ ନିଜ ଆଡ଼କୁ ଆକୃଷ୍ଟ କରିବା ଲାଗି ଉଦ୍ୟମ ଚଳାଇଥିବା ବେଳେ ଏବେ ପାଇକ ବିଦ୍ରୋହ ସମାରୋହ ଜରିଆରେ ପାଇକ ପୁଅଙ୍କ ସମର୍ଥନ ହାସଲ ଲାଗି ପ୍ରୟାସ କରୁଥିବା ଚର୍ଚ୍ଚା ହେଉଛି।

ଦିଲ୍ଲୀ ଉତ୍ସବକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଆମନ୍ତ୍ରଣ କରାଯାଇଛି। ସେ ମଧ୍ୟ ସମାରୋହରେ ସାମିଲ ହେବେ ବୋଲି ସୂଚନା ମିଳିଛି। ତେବେ ରାଜ୍ୟ ସଂସ୍କୃତି ମନ୍ତ୍ରୀ ଅଶୋକ ପଣ୍ଡାଙ୍କୁ ଉତ୍ସବକୁ ଡକାଯାଇନଥିବାରୁ ଦେଖା ଦେଇଛି ବିବାଦ।

ଏପଟେ ବିଜେପିର ପାଇକ କାର୍ଡକୁ କାଉଣ୍ଟର କରିବା ଲାଗି ବିଜେଡି ମଧ୍ୟ ଉଦ୍ୟମ ଜାରି ରଖିଛି। ରାଜ୍ୟ ସରକାର ଗତ ମାର୍ଚ୍ଚ ମାସରେ ଖୋର୍ଦ୍ଧାଗଡ଼ରେ ୩ ଦିନ ଧରି  ପାଇକ ବିଦ୍ରୋହ ସମାରୋହ ଉତ୍ସବ ଆୟୋଜନ କରିଥିଲେ। ଏଥିରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୁଖ୍ୟଅତିଥି ହୋଇଥିବା ବେଳେ ବିଜେପି ଓ କଂଗ୍ରେସ ନେତାଙ୍କୁ ମଧ୍ୟ ଡାକିଥିଲେ। ସେହିପରି ବରୁଣେଇରେ ଆଉ ଏକ ଉତ୍ସବ ଆୟୋଜନ ଲାଗି  କାର୍ଯ୍ୟକ୍ରମ ରହିଛି। ତେବେ ପାଇକ କାର୍ଡରୁ କାହାକୁ କେତେ ଫାଇଦା ମିଳୁଛି ତାହା ସମୟ କହିବ।

ଅନ୍ୟପକ୍ଷରେ ଆଜି ରାଜ୍ୟ କ୍ୟାବିନେଟ୍‌ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି। ପାଇକ ବିଦ୍ରୋହକୁ ଦେଶର ପ୍ରଥମ ସ୍ୱାଧୀନତା ସଂଗ୍ରାମ ଘୋଷଣା ପାଇଁ କେନ୍ଦ୍ରକୁ ପ୍ରସ୍ତାବ ଦିଆଯିବ। ଏନେଇ ସଂପୂର୍ଣ୍ଣ ତଥ୍ୟ ସହ କେନ୍ଦ୍ର ନିକଟରେ ପ୍ରସ୍ତାବ ଉପସ୍ଥାପନ ହେବ ବୋଲି ସାମ୍ବାଦିକ ସମ୍ମିଳନୀରେ ସଂସ୍କୃତି ମନ୍ତ୍ରୀ ଅଶୋକ ପଣ୍ଡା ସୂଚନା ଦେଇଛନ୍ତି। ଦେଶର ପ୍ରଥମ ସ୍ୱାଧୀନତା କୁହାଯାଉଥିବା ୧୮୫୭ ସିପାହୀ ବିଦ୍ରୋହର ୪୦ ବର୍ଷ ତଳୁ ଖୋର୍ଦ୍ଧାରେ ପାଇକ ବିଦ୍ରୋହ ହୋଇଥିବାର ବିସ୍ତୃତ ପ୍ରମାଣ ରହିଛି। ଘୁମୁସରରୁ ଆରମ୍ଭ ହୋଇଥିବା ଏହି ବିଦ୍ରୋହ ପରବର୍ତ୍ତୀ ସମୟରେ ବାଣପୁର, ଖୋର୍ଦ୍ଧା, ପିପିଲି, ପୁରୀ, କୁଜଙ୍ଗ, ପଟ୍ଟାମୁଣ୍ଡାଇ ଓ କେନ୍ଦୁଝରକୁ ବ୍ୟାପୀଥିବାର ପ୍ରମାଣ ରହିଛି ବୋଲି ମନ୍ତ୍ରୀ କହିଛନ୍ତି।