ମାଓ ଭୟରେ ଗାଁ ଛାଡ଼ିଲେ

ଚିତ୍ରକୋଣ୍ଡା: ମାଲକାନଗିରି ଜିଲ୍ଲା ଚିତ୍ରକୋଣ୍ଡା ଅଞ୍ଚଳରେ କିଛି ଦିନର ନିରବତା ପରେ ପୁଣି ମାତିଲେ ମାଓବାଦୀ। ମାଓବାଦୀଙ୍କ ଧମକ ଯୋଗୁଁ ଗତକାଲି ବିଚ୍ଛିନ୍ନାଞ୍ଚଳର ଯନ୍ତ୍ରୀ ଗାଁର ପୁଣି ଗୋଟିଏ ପରିବାର ଭିଟାମାଟି ଛାଡ଼ି ଦେଇଛନ୍ତି। ପୁଅ ଆନ୍ଧ୍ରକୁ କାମ କରିବା ପାଇଁ ଯିବାରୁ ମାଓବାଦୀ଼ଙ୍କ ଟାର୍ଗେଟରେ ରହିଥିଲେ ଏହି ପରିବାର।

ଗତ ଗୁରୁବାର ରାତିରେ ମାଓବାଦୀମାନେ ପ୍ରଜାକୋର୍ଟ କରିଥିଲେ। ପୋଲିସ୍‌କୁ ସାହାଯ୍ୟ କରୁଥିବା ଅଭିଯୋଗ ଆଣି ମାଓବାଦୀମାନେ ଏହି ପରିବାରକୁ ଧମକ ଦେଇଥିଲେ। ଧମକ ପାଇବା ପରେ ଏହି ପରିବାର ଗାଁ ଛାଡ଼ିଛି।  ଏହି ପରିବାରରେ ଅଛନ୍ତି ସ୍ୱାମୀସ୍ତ୍ରୀ ଓ ସେମାନଙ୍କର ୧୦ ବର୍ଷର ଝିଅ। ଭିଟାମାଟି ଛାଡ଼ିବା ପରେ ଏ ପରିବାର ଏବେ ଭାରି ଚିନ୍ତାରେ ଅଛି। କେଉଁଠି ରହିବେ ଓ କେମିତି ଗୁଜରାଣ ମେଣ୍ଟାଇବେ ସେନେଇ ଚିନ୍ତାରେ ଅଛନ୍ତି।

maoo

ବର୍ଷକ ମଧ୍ୟରେ ମଧ୍ୟ ମାଓ ଧମକରେ ଏହି ଗାଁରୁ ୫ଟି ପରିବାର ଗାଁ ଛାଡ଼ି ସାରିଲେଣି।

ଗତ ଗୁରୁବାର ଦିନ ପପୁଲୁର ପଞ୍ଚାୟତ ମୁରଲିଗୁଡ଼ା ଗାଁରେ ରହୁଥିବା ପୂର୍ବତନ ସମିତି ସଭ୍ୟ ରାମଚନ୍ଦ୍ର ସିସାକୁ ମାଓବାଦୀ ଅପହରଣ କରିନେଇ ତା’ପରଦିନ ଛାଡ଼ି ଦେଇଥିଲେ।  ମାଓବାଦୀଙ୍କଠାରୁ ଛାଡ଼ ପାଇବା ପରେ ରାମଚନ୍ଦ୍ର ମଧ୍ୟ ନିଜ ପରିବାର ସହିତ ଗାଁ ଛାଡ଼ି ଦେଇଛନ୍ତି। ଘରେ କେବଳ ତାଙ୍କ ମା’ ଅଛନ୍ତି। ସେ କୁଆଡ଼େ ଗଲେ କେହି ଜାଣି ନାହାନ୍ତି।

ଅନ୍ୟପକ୍ଷରେ ମାଲକାନଗିରି ଏସପି କହିଛନ୍ତି,“ପୋଲିସ୍ ପାଖରେ ଏ ନେଇ ସୂଚନା ନାହିଁ। ଘଟଣାର ଅନୁଧ୍ୟାନ କରାଯିବ।”