ଦେବଗଡ଼ ଜିଲ୍ଲାପାଳ ବିଜେଡି ସରକାର ସପକ୍ଷରେ କାମ କରୁଛନ୍ତି: ବିଜେପି

ଦେବଗଡ଼: ଦେବଗଡ଼ ଜିଲ୍ଲାପାଳ ବିଜେଡି ସରକାରଙ୍କ ସପକ୍ଷରେ କାମ କରୁଥିବା ଅଭିଯୋଗ କରିଛି ବିଜେପି। ଆଜି ଏକ ସାମ୍ବାଦିକ ସମ୍ମିଳନୀରେ ବିଜେପି ରାଷ୍ଟ୍ରୀୟ ସମ୍ପାଦକ ସୁରେଶ ପୂଜାରୀ ଏପରି ଅଭିଯୋଗ ଆଣିଛନ୍ତି। ସେ କହିଛନ୍ତି,“ଜିଲ୍ଲାପାଳ ସରକାରୀ କାମ ସହ ନିର୍ବାଚନ ସୁପରିଚାଳନା କରିବା ପରିବର୍ତ୍ତେ ବେସରକାରୀ ଗାଡିରେ ବୁଲି ସ୍ୱୟଂ ସହାୟକ ଗୋଷ୍ଠୀର ମହିଳା ସଦସ୍ୟଙ୍କୁ ବିଜେଡି ସପକ୍ଷରେ ଭୋଟ ଦେବାକୁ କହୁଛନ୍ତି। ତେଣୁ ଦେବଗଡ଼ରେ ନିରପେକ୍ଷ ନିର୍ବାଚନ ପାଇଁ ଆସନ୍ତା ୧୩ ତାରିଖ ସୁଦ୍ଧା ଜିଲ୍ଲାପାଳଙ୍କୁ ଅପସାରିତ କରିବାକୁ ରାଜ୍ୟ ନିର୍ବାଚନ କମିଶନଙ୍କ ନିକଟରେ ଦାବି କରିଛୁ।”

୧୪ ତାରିଖରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଦେବଗଡ଼ ଜିଲ୍ଲା ଗସ୍ତ କାର୍ଯ୍ୟକ୍ରମ ରହିଛି। ବୁଢାପାଳ ଠାରେ ପଡିଆ ପାଇଁ ତହସିଲ ନିର୍ଦ୍ଦେଶ ଅନୁସାରେ ଫି’ ଦାଖଲ କରାଯିବା ପରେ ଏହାକୁ ପୁଣି ବାତିଲ କରାଯିବା ନେଇ ବିଜେପି ପ୍ରଶ୍ନ ଉଠାଇଛି।