କଲ୍ୟାଣସିଂହପୁରରେ ବର୍ଷା ବିପତ୍ତି: ନାଗାବଳୀ ଓ କଲ୍ୟାଣୀ ନଦୀରେ ବନ୍ୟା, ଘର ଭିତରେ ୫ ଫୁଟ୍‌ ପାଣି

କଲ୍ୟାଣସିଂହପୁର:

ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକରେ ବନ୍ୟା ସ୍ଥିତି ଗମ୍ଭୀର ରହିଛି। ନାଗାବଳି ଓ କଲ୍ୟାଣୀ ନଦୀରେ ଆସିଥିବା ବନ୍ୟା ଯୋଗୁଁ ବ୍ଲକର  ପ୍ରାୟ ୭୦ ପ୍ରତିଶତ ଅଞ୍ଚଳ ବାହ୍ୟଜଗତରୁ ବିଚ୍ଛିନ୍ନ ହୋଇପଡ଼ିଛି। ଉଦ୍ଧାର ଓ ରିଲିଫ୍ କାର୍ଯ୍ୟରେ ୪ଟି ହେଲିକପ୍ଟର ସହ ଓଡ୍ରାଫ୍, ଅଗ୍ନିଶମ ଓ ସିଆରପିଏଫ୍‌ ଟିମ୍ ବି ନିୟୋଜିତ ହୋଇଛନ୍ତି। ଖୋଦ୍ ମୁଖ୍ୟମନ୍ତ୍ରୀ ବନ୍ୟା ପରିସ୍ଥିତିର ସମୀକ୍ଷା କରି ଯୁଦ୍ଧକାଳୀନ ଭିତ୍ତିରେ ରିଲିଫ୍ ଓ ଉଦ୍ଧାର କାର୍ଯ୍ୟ ତ୍ୱରାନ୍ୱିତ କରିବାକୁ ନିର୍ଦ୍ଦେଶ ଦେଇଛନ୍ତି।

ନାଗାବଳି ଓ କଲ୍ୟାଣୀ ନଦୀରେ ଅଚାନକ୍ ବନ୍ୟା ଆସିବା ପରେ ଯେଉଁ ଆଡ଼େ ଦେଖିବେ ପାଣି ଆଉ ପାଣି। ପାଣି ଘେରରେ ବ୍ଲକର ପ୍ରାୟ ୭୦ ପ୍ରତିଶତ ଅଞ୍ଚଳ। ପ୍ରଭାବିତ ହୋଇଛନ୍ତି ପ୍ରାୟ ୭ ହଜାର ଲୋକ। ବିଲୁଣ୍ଡା, ବାଲିପଦର, ମାଝିଗୁଡ଼ା, କୁମ୍ଭାରୀଗୁଡା ଆଦି ଅଞ୍ଚଳରେ ବନ୍ୟା ପାଣି ପଶିଯାଇଛି। କଲ୍ୟାଣସିଂହପୁର ସଦର ମହକୁମା ବି ଜଳବନ୍ଦୀ। ଅଧିକାଂଶ ଅଞ୍ଚଳରେ ପାଣି ପଶିବା ପରେ ଲୋକେ ତହସିଲ ଅଫିସ୍‌ରେ ଆଶ୍ରୟ ନେଇଛନ୍ତି। ରାୟଗଡ଼ା ବ୍ଲକର କଟାପେଟା ଗାଁରେ ନାଗାବଳିର ବନ୍ୟା ପାଣି ପଶିବା ପରେ ଆସବାବପତ୍ର ଧରି ସୁରକ୍ଷିତ ସ୍ଥାନକୁ ଚାଲିଯାଇଛନ୍ତି ସ୍ଥାନୀୟ ବାସିନ୍ଦା। ଗୁଡ଼ାରୀ ବ୍ଲକର ବାଇନାଗୁଡ଼ାର କରାନାଳ ସେତୁ ଦବି ଯିବାରୁ ଏଠାରେ ଯାତାୟତ ପ୍ରଭାବିତ ହୋଇଛି।

ସରକାରୀ ସୂଚନା ଅନୁସାରେ ଫ୍ଲାସ୍ ଫ୍ଲେଡରେ ୩ଟି ପୋଲ କ୍ଷତିଗ୍ରସ୍ତ ହୋଇଛି। ଥେରୁବାଲି-ରାୟଗଡ଼ା ରୁଟ୍‌ର କାର୍ତ୍ତିକାଗୁଡା ନିକଟରେ ରେଲେୱେ ବ୍ରିଜ୍ ଭାଙ୍ଗି ଯିବା ଫଳରେ ଡାଉନ୍ ଲାଇନ୍‌ରେ ଟ୍ରେନ୍ ଚଳାଚଳ ପ୍ରଭାବିତ ହୋଇଛି। ସେହିପରି କଲ୍ୟାଣସିଂପୁର-ରାୟଗଡ଼ା ଓ କଲ୍ୟାଣସିଂପୁର-ଭବାନୀପାଟଣା ମଧ୍ୟରେ ଯୋଗାଯୋଗ ବିଛିନ୍ନ ହୋଇଯାଇଛି।

ପ୍ରଭାବିତ ଅଞ୍ଚଳରେ ସରକାରୀ ଅଧିକାରୀଙ୍କ ଛୁଟି ବାତିଲ୍ କରାଯାଇଥିବା ବେଳେ ଆସନ୍ତା  ୩ ଦିନ ଶିକ୍ଷାନୁଷ୍ଠାନ ବନ୍ଦ ରହିବ ବୋଲି ଘୋଷଣା କରାଯାଇଛି।