କଳାହାଣ୍ଡିରେ ବାଦଲ ଫଟା ବର୍ଷା: ପାହାଡ଼ ଧସିଲା, ଗଛ ଉପୁଡ଼ିଲା

<p>ରାୟଗଡ଼ା ନୁହେଁ, କଳାହାଣ୍ଡି ଜିଲ୍ଲାରେ ବି ବନ୍ୟା ସ୍ଥିତି ସାଂଘାତିକ। ବିଶେଷ କରି ଥୁଆମୂଳ-ରାମପୁର ବ୍ଲକରେ ବ୍ୟାପକ କ୍ଷୟକ୍ଷତି ହୋଇଛି। ଜିଲ୍ଲାର ଅଧିକାଂଶ ଅଞ୍ଚଳକୁ ଯୋଗାଯୋଗ ବିଛିନ୍ନ ହୋଇଯାଇଛି। ଜୁନାଗଡ଼ ନିକଟ ହାତୀନଦୀ ପୋଲ ଉପରେ ପାଣି ଚାଲୁଥିବାରୁ ଯାନବାହନ ଚଳାଚଳ ପ୍ରଭାବିତ ହୋଇଛି।</p> <p>ବର୍ଷାରେ ବେହାଲ୍ କଳାହାଣ୍ଡିର କେଉଁଠି ଟଳି ପଡ଼ିଛି ବଡ଼ ବଡ଼ ଗଛ ତ ଆଉ କେଉଁଠି ଓଲଟି ପଡ଼ିଛି ଟ୍ରକ୍। ଥୁଆମୂଳ-ରାମପୁର ବ୍ଲକ ଅଞ୍ଚଳରେ ୨୪ ଘଣ୍ଟାରୁ ଅଧିକ ସମୟ ଧରି ଲଗାଣ ବର୍ଷା ଯୋଗୁ ଥୁଆମୂଳ-ରାମପୁର ବ୍ଲକର ଅଧିକାଂଶ ପଞ୍ଚାୟତରେ ଜୀବନଯାତ୍ରା ସମ୍ପୂର୍ଣ୍ଣ ପ୍ରଭାବିତ ହୋଇଛି। ଗୁଣପୁର, ନବରଙ୍ଗପୁର, କଲମପୁର ଓ ଭବାନୀପାଟଣା ସହ ଯୋଗାଯୋଗ ବିଛିନ୍ନ ହୋଇଯାଇଛି। ଚୁଲିବାଡ଼ି ଗାଁରେ ମାଟି ଅତଡ଼ା ଧସିବା ପରେ ଗୋଟିଏ ପରିବାରକୁ ଉଦ୍ଧାର କରିବାକୁ ଯାଇ ଜଣଙ୍କର ମୃତ୍ୟୁ ଘଟିଥିବା ସୂଚନା ମିଳିଛି।</p> <p>ଜୁନାଗଡ଼ ନିକଟ ହାତୀ ନଦୀ ପୋଲ ଉପରେ ଆଜି ଅପରାହ୍ନରୁ ପାଣି ଚାଲୁଥିବାରୁ ଏହି ରାସ୍ତା ଦେଇ ଭବାନୀପାଟଣା, ଧର୍ମଗଡ଼, ନବରଙ୍ଗପୁରକୁ ଗମନାଗମନ ପ୍ରଭାବିତ ହୋଇଛି।</p>