ସମ୍ୱଲପୁର: ତିନି ଦିନିଆ ଓଡ଼ିଶା ଗସ୍ତରେ ଆସିଥିବା କେନ୍ଦ୍ର ଜଳ ସମ୍ପଦ ମନ୍ତ୍ରୀ ଉମା ଭାରତୀ ଆଜି ବୁର୍ଲା ଅଶୋକ ନିବାସରେ ଜଳ ସମ୍ପଦ ବିଭାଗର ବରିଷ୍ଠ ଅଧିକାରୀଙ୍କ ସହ ଆଲୋଚନା କରିଛନ୍ତି। ଏ ଅବସରରେ ସେ ପୋଲାଭରମ୍ ସମ୍ପର୍କରେ ମତ ରଖିଛନ୍ତି। ପୋଲାଭରମ୍ ହେଉଛି ଆନ୍ତଃରାଜ୍ୟ ପ୍ରସଙ୍ଗ, କେନ୍ଦ୍ର ଏଥିରେ ହସ୍ତକ୍ଷେପ କରିବ ନାହିଁ। ଉଭୟ ଓଡ଼ିଶା ଓ ଆନ୍ଧ୍ର ଆଲୋଚନା ମାଧ୍ୟରେ ଏହାର ସମାଧାନ କରନ୍ତୁ ବୋଲି ଏକ ସାମ୍ୱାଦିକ ସମ୍ମିଳନୀରେ କେନ୍ଦ୍ର ମନ୍ତ୍ରୀ ଭାରତୀ ସୂଚନା ଦେଇଛନ୍ତି।
ସେ ଆହୁରି କହଛନ୍ତି ଯେ, ମହାନଦୀ ହେଉଛି ଓଡ଼ିଶାର ଜୀବନରେଖା। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିବା ଅବସରରେ ସେ ଗୋଦାବରୀ ଓ ମହାନଦୀ ସଂଯୋଗୀକରଣ ପ୍ରସ୍ତାବ ଦେବେ। ଏ ନେଇ ସହଯୋଗ କରିବାକୁ ସେ ମୁଖ୍ୟମନ୍ତ୍ରୀଙ୍କୁ କହିବେ। ମହାନଦୀ ଓ ଗୋଦାବରୀର ସଂଯୋଗୀକରଣ ହେଲେ ଏହା ଓଡ଼ିଶା ପାଇଁ ଲଭଦାୟକ ହେବ ବୋଲି ସେ କହିଛନ୍ତି। ଏ ନେଇ ଆଜି ଅପରାହ୍ନରେ କେନ୍ଦ୍ର ଓ ରାଜ୍ୟ ଅଧିକାରୀଙ୍କ ସହ ଆଲୋଚନା କରାଯିବ ବୋଲି ସେ କହିଛନ୍ତି।
ମହାନଦୀର ପାଣି ଧୀରେ ଧୀରେ ପ୍ରଦୂଷିତ ହୋଇଯାଇଥିବା ସମ୍ପର୍କରେ କେନ୍ଦ୍ରମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରାଯାଇଥିଲା। ଗଙ୍ଗା ସଫେଇ ଯୋଜନା ଢାଞ୍ଚାରେ ମହାନଦୀକୁ ସଫା କରିବାକୁ କେନ୍ଦ୍ରମନ୍ତ୍ରୀଙ୍କୁ ଦାବି କରାଯାଇଥିଲା।