ପଣ୍ଡା ଇନ୍‌ଫ୍ରା ଆଉ ପୂର୍ତ୍ତ ବିଭାଗ ମଧ୍ୟରେ ମଧୁଚନ୍ଦ୍ରିକା !

ଭୁବନେଶ୍ୱର(ଓଡିଶା ରିପୋର୍ଟର): ବାରମ୍ବାର ଅଘଟଣ, ନିମ୍ନମାନର କାମ ନେଇ ଅଭିଯୋଗ ପରେ ବି ପୂର୍ତ୍ତ ବିଭାଗର ଗେହ୍ଲା ପୁଅ ପଣ୍ଡା ଇନ୍‌ଫ୍ରା କଳା ତାଲିକାଭୁକ୍ତ ହେବା ପରେ ବି କେମିତି ଏହି ସଂସ୍ଥାକୁ ବମିଖାଲ ଓଭରବ୍ରିଜ୍ କାମ ସମ୍ପୁର୍ଣ୍ଣ କରିବାକୁ ଦାୟିତ୍ୱ ଦିଆଗଲା ତାକୁ ନେଇ ଉଠିଛି ପ୍ରଶ୍ନ। ଏହି ସଂସ୍ଥାରେ କିଛି ବିଧାୟକ ଓ ପୂର୍ତ୍ତ ବିଭାଗ ଅଧିକାରୀଙ୍କ ଅର୍ଥ ଲାଗିଥିବା ନେଇ ପୂର୍ବରୁ ଅଭିଯୋଗ ଆସିଥିଲା । ପୂର୍ତ୍ତ ସଚିବଙ୍କ ଭୂମିକା ବି ସନ୍ଦେହ ଘେରକୁ ଆସିଥିଲା । ତେବେ ପୂର୍ତ୍ତ ସଚିବଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ କଣ, ସରକାର ଓଲଟା ପୁରସ୍କାର ସ୍ୱରୂପ ତାଙ୍କ କାର୍ଯ୍ୟକାଳକୁ ୟା ଭିତରେ ବର୍ଷେ ବଢାଇ ଦେଇଛନ୍ତି। ଯାହାକି ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି।

ଠିକାସଂସ୍ଥା ପଣ୍ଡା ଇନ୍‌ଫ୍ରା ଓ ପୂର୍ତ୍ତ ବିଭାଗ ମଧ୍ୟରେ ମଧୁଚନ୍ଦ୍ରିକା ଚାଲିଛି ବୋଲି ଚର୍ଚ୍ଚା ହେଉଛି। କୁହାଯାଉଛ, ଏହି ସଂସ୍ଥାରେ କୁଆଡେ ଜଣେ ପ୍ରଭାବଶାଳୀ ବିଧାୟକଙ୍କ ଟଙ୍କା ଲାଗିଛି। କେବଳ ବିଧାୟକ ନୁହନ୍ତି ପୂର୍ତ୍ତ ସଚିବ ମଧ୍ୟ ସଂସ୍ଥାକୁ ଯେଭଳି ଅହେତୁକ ଅନୁକମ୍ପା ଦେଖାଇ ଚାଲିଛନ୍ତି।  କାରଣ ୨୦୧୭ ସେପ୍ଟମ୍ବର ୧୦ ଅଘଟଣ ପରେ ପଣ୍ଡା ଇନ୍‌ଫ୍ରାକୁ ସରକାର କଳା ତାଲିକାଭୁକ୍ତ କରିଥିଲେ । କର୍ତ୍ତବ୍ୟରେ ଅବହେଳା ପାଇଁ ପୂର୍ତ୍ତ ବିଭାଗର ୩ ଇଂଜିନିୟରଙ୍କ ବିରୋଧରେ କାର୍ଯ୍ୟାନୁଷ୍ଠାନ ବି ଗ୍ରହଣ କରିଥିଲେ।  ପୂର୍ତ୍ତ ସଚିବଙ୍କ ବିରୋଧରେ ବି କୋର୍ଟରେ  ମାମଲା ଲାଗି ଆବେଦନ ହୋଇଥିଲା। ତେବେ ବିଡମ୍ବନା, ଏ ଘଟଣାର ୨ମାସ ପରେ ସମସ୍ତେ ସବୁ କିଛି ଭୁଲି ଗଲେ । ଆଉ ଥରେ ଟେଣ୍ଡର କଲେ କାମରେ ବିଳମ୍ବ ହେବା ବାହାନାରେ ପୁଣି ସେଇ କଳାତାଲିକାଭୁକ୍ତ ସଂସ୍ଥାକୁ କାମ ଦିଆଗଲା। ପୂର୍ତ୍ତ ବିଭାଗ ବହୁ ଅଭିଯୋଗ ସତ୍ତ୍ୱେ ପୂର୍ତ୍ତ ସଚିବଙ୍କୁ ପୁରସ୍କୃତ କଲା ଭଳି ଅବସର ଦିନ ତାଙ୍କ କାର୍ଯ୍ୟକାଳକୁ ସରକାର ଆଉ ବର୍ଷେ ବଢେଇ ଦେଲେ।

ନଜର ପକାନ୍ତୁ ଠିକା ସଂସ୍ଥାର କାରନାମା ଉପରେ

  • ୨୦୧୨ରୁ ଆରମ୍ଭ ହୋଇଥିବା ବମିଖାଲ ଓଭରବ୍ରିଜ୍ କାମ। ୨୦୧୪ରେ ସରିବାର ଟାର୍ଗେଟ୍ ଥିଲା । ତେବେ ତିନି ବର୍ଷର ବିଳମ୍ବ ପରେ ୨୦୧୭  ଡିସେମ୍ବର ମାସ ସୁଦ୍ଧା କାମ ସାରିବାକୁ ହଠାତ୍ ତତ୍ପରତା ଦେଖାଇଥିଲା ଠିକା ସଂସ୍ଥା। ଏବେ ପ୍ରଶ୍ନ ୨୦୧୪ରୁ ୨୦୧୭, ଏକାଥରକେ ଡେଡ୍ଲାଇନ୍‌କୁ ତିନି ବର୍ଷ ବୃଦ୍ଧି କରାଯାଇଥିଲା କେମିତି ? ସେହିପରି ଅଘଟଣ ପରେ ଡେଡ୍‌ଲାଇନ ଥିଲା ୨୦୧୮ ମାର୍ଚ୍ଚ । କିଛି ଦିନ ତଳେ ପୂର୍ତ୍ତମନ୍ତ୍ରୀ ବିଧାନସଭାରେ କହିଥିଲେ ଯେ, ଜୁନ୍‌ରେ ଓଭରବ୍ରିଜ୍ ଉଦ୍‌ଘାଟିତ ହେବ।
  • କେବଳ ବମିଖାଲ୍ ନୁହେଁ,  ଜଟଣୀରେ ସଂସ୍ଥା ଦ୍ୱାରା କରାଯାଉଥିବା ନିମ୍ନମାନର କାମ ଧରାପଡିଥିଲା ସିସିଟିଭି ଫୁଟେଜ୍‌ରୁ। ୪୦ ଫୁଟ୍ ବଦଳରେ ୨୦ ଫୁଟ୍ ତଳୁ ପିଲର ନିର୍ମାଣ କରିବା ସହ ଚଞ୍ଚକତା କରି ଏହାକୁ  ୪୦ ଫୁଟ୍ ଦେଖାଇବା ଲାଗି ରାତିରେ ହେଉଥିବା କାରସାଦିକୁ କ୍ୟାମେରା ଲଗାଇ ଧରିଥିଲା ସ୍ଥାନୀୟ ବ୍ୟବସାୟୀ ମହାସଂଘ ।
  • ସେହିପରି ବମିଖାଲ ଓଭରବ୍ରିଜ୍‌ର ନିମ୍ନମାନର କାମ, ଶ୍ରମିକ ଓ ଜନସାଧାରଣଙ୍କ ସୁରକ୍ଷାକୁ ନେଇ ବାରମ୍ବାର ପ୍ରଶ୍ନ ଉଠିଛି ଏସବୁ ସତ୍ତ୍ୱେ ଗୋଟିଏ ସଂସ୍ଥା ପ୍ରତି ସରକାରଙ୍କର  କାହିଁକି ଏତେ ପ୍ରୀତି? ଏ ରହସ୍ୟ ଉପରୁ ପର୍ଦ୍ଦା ଉଠାଇବାକୁ ସରକାର ତତ୍ପର ହେଉଛନ୍ତି କି ନାହିଁ, ତାକୁ ଅପେକ୍ଷା ରହିଲା।

Previous ArticleNext Article

Send this to a friend