ଦେବଦଳନ ପହି ଫାଟିଛି, ତାଳଧ୍ୱଜର ଅଖ ଦୁର୍ବଳ

ପୁରୀ(ଓଡିଶା ରିପୋର୍ଟର): ମାତ୍ର ଦିନକ ପରେ ଭଉଁରୀ । ଏପଟେ ରଥଖଳାରେ ଆଗେଇ ଚାଲିଛି ରଥ ନିର୍ମାଣ। ପରମ୍ପରା ଓ ବିଧି ମୁତାବକ ୩ ରଥର ଚକ ଓ ଅଖ ଡେରା ଯିବ ଏହି ଦିନ। ଏଣୁ ଚକ ନିର୍ମାଣ କାର୍ଯ୍ୟ ତ୍ୱରାନ୍ୱିତ କରିବାକୁ ପ୍ରଶାସନିକ ସ୍ତରରେ ଉଦ୍ୟମ ଚାଲିଥିବେ ବେଳେ ଦେଖା ଦେଇଛି ମହାବିଭ୍ରାଟ। ଚକ ନିର୍ମାଣ ଶେଷ ପର୍ଯ୍ୟାୟରେ ପହଞ୍ଚି ଥିବା କୁହାଯାଉଥିବା ବେଳେ ଦେବୀ ସୁଭ୍ରଦାଙ୍କ ଦେବଦଳନ ରଥ ପହିରେ ଫାଟ ସୃଷ୍ଟି ହୋଇଥିବା ସାମ୍ନାକୁ ଆସିଛି। ଖାଲି ଦେବଦଳନ ରଥରେ ନୁହେଁ ବଡଠାକୁର ଶ୍ରୀ ବଳଭଦ୍ରଙ୍କ ତାଳଧ୍ୱଜ ରଥର ଅଖ ମଧ୍ୟ ଦୁର୍ବଳ ଥିବା ଜଣାପଡିଛି। ୪୦ଫୁଟ ବିଶିଷ୍ଟ ଧଉରା କାଠର ଅଖ ସମ୍ପୁର୍ଣ୍ଣ ଦୁର୍ବଳ ରହିଥିବା ଆଜି ରଥ ନିର୍ମାଣ କମିଟି ଏବଂ ଇଞ୍ଜିନିୟର ଟିମ୍‌  ଯାଞ୍ଚ କରିବା ସମୟରେ ସ୍ପଷ୍ଟ କରିଛନ୍ତି।

ପହି ଓ ଅଖକୁ ପରିବର୍ତ୍ତନ କରାଯିବା ଉପରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ଗରୁତ୍ୱ ଦିଆଯାଇଥିବା ବେଳେ ବିଶ୍ୱକର୍ମା ପହି ଯୋଗାଣକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି। ପହିରେ ଯଦି ଫାଟ ଥିଲା ତା ହେଲେ କାହିଁକି ଏହା ଯୋଗାଯାଇଥିଲା ବୋଲି ସେ ପାଲଟା ଅଭିଯୋଗ କରିଛନ୍ତି। ଏଣେ ଯଦି ଇଞ୍ଜିନିୟରଙ୍କ ନିର୍ଦ୍ଦେଶ ଉପରେ କାର୍ଯ୍ୟ କରାଯିବ ତା ହେଲେ ରଥ ଗଡିବା ସମୟରେ ଯଦି କୌଣସି ଦୁର୍ଘଟଣା ଘଟେ ତା ହେଲେ ବିଶ୍ୱକର୍ମା ମହରଣା ଦାୟୀ ହେବେ ନି ବୋଲି ଚେତାବନୀ ଦିଆଯାଇଛି।

ଉଭଁରୀ ଯାତ୍ରାରେ ବିଧିମୁତାବକ ଚକ ଡେରିବା କାର୍ଯ୍ୟ ସମ୍ପନ୍ନ ହୋଇଥାଏ। ଏହାକୁ ଅଖ ସହ ଏହି ଦିନ ସଂଯୋଗ କରାଯାଇଥାଏ। ତାବେ ଏହି ପର୍ବକୁ ଆଉ ମାତ୍ର ଦିନୁଟିଏ ବାକି ଥିବା ବେଳେ ଚକରେ ଶେଷ ସ୍ପର୍ଷ ଦେବା ପୂର୍ବରୁ ଏଭଳି ଯାଞ୍ଚ କରାଯାଇଛି । ଏବେ ପହିକୁ କାଢି ଦିଆଯିବ ଏବଂ ନୂତନ ପହି ସଂଯୋଗ କରାଯିବ ବୋଲି କହିଛନ୍ତି ଶ୍ରୀମନ୍ଦିର ପ୍ରଶାସନର ନିର୍ବାହୀ ଯନ୍ତ୍ରୀ ।

ସେପଟେ ବିଶ୍ୱକର୍ମା ମହାରଣାମାନେ ପହି ଯୋଗାଇ ଦିଆଯିବା ପୂର୍ବରୁ କାହିଁକି ଇଞ୍ଜିନିୟରମାନେ ଯାଞ୍ଚ କରିଲେ ନାହିଁ ବୋଲି ପ୍ରଶ୍ନ କରିଛନ୍ତି।  ଗତବର୍ଷ ଯେଉଁଭଳି ଭାବେ ମହାରଣାମାନଙ୍କୁ ଶ୍ରୀମନ୍ଦିର ପ୍ରଶାସନ ପକ୍ଷରୁ ଦୋଷ ଲଦାଗଲା ଏଥର ସେଭଳି ହୋଇପାରିବ ନାହିଁ।  ଇଞ୍ଜନିୟର ଟିମ୍‌ ଯେଉଁ ଭଳି ଭାବେ ନିର୍ଦ୍ଦେଶ ଦେବ ସେହି ଅନୁଯାୟୀ କାର୍ଯ୍ୟ କରାଯିବ ଆଉ ରଥ ଗଡିଲା ବେଳେ ଅସୁବିଧା ହେଲେ ସେମାନେ ହିଁ ଦାୟୀ ରହିବେ ବୋଲି ଚେତାବୀନ ଦେଇଛନ୍ତି ବିଶ୍ୱକର୍ମା ମହାରଣା।

ସୂଚନାଯୋଗ୍ୟ, ଗତବର୍ଷ ଜୁନ ୨୧ ତାରିଖରେ ରଥନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ଚାଲିଥିବା ସମୟରେ ଦେବଦଳନ ରଥ ଅଖରେ ଫାଟ ସୃଷ୍ଟି ହୋଇଥିଲା । ଏପରିକି ଦେବଦଳନ ରଥ ଅଖକୁ ଲୁହାଚେନ ମାଧ୍ୟମରେ ବାନ୍ଧିରଖାଯାଇଥିଲା। ଏ ସମ୍ପର୍କରେ ଖବର ପ୍ରକାଶ ପାଇବା ପରେ ରଥର ଅଖକୁ ଜୁନ ୨୨ତାରିଖରେ ଯୁଦ୍ଧକାଳନୀ ଭିତ୍ତିରେ ପରିବର୍ତ୍ତନ କରାଯାଇଥିଲା ।

Previous ArticleNext Article

Send this to a friend