‘ଉଜାଲା’କୁ କାଉଣ୍ଟର କରିବ ‘ଆମ ଘରେ ଏଲ୍‌ଇଡି ଲାଇଟ୍‌’

ଭୁବନେଶ୍ୱର (ଓଡ଼ିଶା ରିପୋର୍ଟର): ଓଡ଼ିଶାରେ ଆରମ୍ଭ ହେଲା ଆଲୁଅ ରାଜନୀତି। କେନ୍ଦ୍ର ସରକାରଙ୍କ ‘ଉଜାଲା’ ଯୋଜନାକୁ କାଉଣ୍ଟର କରିବା ପାଇଁ ରାଜ୍ୟ ସରକାରଙ୍କ ନୂଆ ଯୋଜନା। “ଆମ ଘରେ ଏଲ୍‌ଇଡି ଲାଇଟ୍‌” ନାଁରେ ନୂଆ ଆଲୁଅ ଯୋଜନା ପାଇଁ ବଜେଟରେ ହୋଇଛି ୧୨୫ କୋଟିର ବ୍ୟୟବରାଦ। ଆଗକୁ ନିର୍ବାଚନ ଥିବାରୁ ଭୋଟରଙ୍କୁ ନିଜ ଆଡ଼କୁ ଢଳେଇବାକୁ ବିଜେଡିର ଏହା ଯୋଜନା ବୋଲି ଚର୍ଚ୍ଚା ହେଉଛି।

ରାଜ୍ୟରେ ଆଲୁଅକୁ ନେଇ ରାଜନୀତି। ଚଳିତ ବଜେଟ୍‌ରେ ରାଜ୍ୟ ସରକାର ‘ଆମ ଘରେ ଏଲଇଡି ଲାଇଟ୍’ ଯୋଜନାରେ ପ୍ରତି ଗରିବ ପରିବାରକୁ ମାଗଣାରେ ୪ଟି ଏଲଇଡି ବଲ୍‌ବ ଯୋଗଇବାକୁ ଘୋଷଣା କରିଛନ୍ତି। ବିଜୁଳି ଅପଚୟ ରୋକିବା ପାଇଁ ରାଜ୍ୟ ସରକାର ଏହି ଯୋଜନା କାର୍ଯ୍ୟକାରୀ କରିବେ। ମାତ୍ର ଏହା ପଛରେ ନିର୍ବାଚନୀ ଚାଲ୍ ଥିବା ଚର୍ଚ୍ଚା ହେଉଛି। କାରଣ କେନ୍ଦ୍ର ସରକାର ୨୦୧୫ ଜାନୁଆରୀରେ ଆଣିଥିଲେ ଉଜାଲା ଯୋଜନା। ଏହି ଯୋଜନାରେ ସମସ୍ତଙ୍କୁ ଏଲ୍ଇଡି ବଲ୍‌ବ ପିଛା ୭୦ ଟଙ୍କାରେ ଯୋଗାଇ ଦିଆଯାଉଛି। ତେବେ ଏହି ଯୋଜନା ଜରିଆରେ କେନ୍ଦ୍ରର ବିଜେପି ସରକାର ଘରେ ଘରେ ପହଞ୍ଚି ଯାଉଥିବା ଅନୁଭବ କରି ତାର କାଉଣ୍ଟର ପାଇଁ ରାଜ୍ୟ ସରକାର ଆଣିଛନ୍ତି ଏଲ୍ଇଡି ଆଲୁଅ ଯୋଜନା। ଏହାକୁ ନେଇ ବିଜେପି ଓ ବିଜେଡି ମୁହାଁମୁହିଁ ହୋଇଛନ୍ତି।

କେନ୍ଦ୍ରର ଉଜାଲା ଯୋଜନା ଅନୁସାରେ ଓଡ଼ିଶାରେ ଏବେ ସୁଦ୍ଧା ୧ କୋଟି ୨୬ ଲକ୍ଷ ୮୫ ହଜାର ଏଲଇଡି ବଲ୍‌ବ ବଣ୍ଟା ହୋଇଛି। ହେଲେ ରାଜ୍ୟର ଯୋଜନା ଅନୁଯାୟୀ କେବଳ ଗରିବ ପରିବାରକୁ ଏହା ମିଳିବାର ଯୋଜନା ଥିବା ବେଳେ ଗରିବୀର ଆଧାର କଣ ହେବ ତାକୁ ନେଇ ଉଠିଛି ପ୍ରଶ୍ନ। ଏଲ୍ଇଡି ଲାଇଟକୁ ନେଇ ରାଜ୍ୟରେ ଦୁଇଟି ଯୋଜନା କାର୍ଯ୍ୟକାରୀ ହେଲେ ଦ୍ୱନ୍ଦ୍ୱ ସୃଷ୍ଟି ହେବ। ତେଣୁ ଏନେଇ ଗାଇଡ୍ ଲାଇନ୍ ଆଣିବାକୁ ଦାବି କରିଛନ୍ତି ବିଦ୍ୟୁତ ଉପଭୋକ୍ତା ମହାସଂଘ।

Previous ArticleNext Article

Send this to a friend