ଆଇଡିବିଆଇ ଋଣ ଠକେଇ: ବିଜୟ ମାଲ୍ୟାଙ୍କୁ ଇଡିର ତୃତୀୟ ସମନ

ନୂଆଦିଲ୍ଲୀ/ମୁମ୍ବାଇ: ଆଇଡିବିଆଇ ଋଣ ଠକେଇ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ମଦ ବ୍ୟବସାୟୀ ବିଜୟ ମାଲ୍ୟାଙ୍କୁ ଆଜି ପୁଣି ସମନ ଜାରି କରିଛନ୍ତି। ଏହି ମାମଲାରେ ଏହା ହେଉଛି ଇଡିର ତୃତୀୟ ସମନ। ଏପ୍ରିଲ୍ ୯ ତାରିଖରେ ମୁମ୍ବାଇରେ ତଦନ୍ତକାରୀ ଅଧିକାରୀଙ୍କ ସମ୍ମୁଖରେ ହାଜର ହେବା ପାଇଁ ମାଲ୍ୟାଙ୍କୁ ସଦ୍ୟ ସମନରେ ଇଡି ନିର୍ଦ୍ଦେଶ ଦେଇଛି। ସୂଚନାଯୋଗ୍ୟ, ମାଲ୍ୟା ଆଇଡିବିଆଇରୁ ୯୦୦ କୋଟିରୁ ଅଧିକ ଟଙ୍କା ଋଣ ନେଇ ପରିଶୋଧ କରି ନ ଥିବା ଅଭିଯୋଗ ହୋଇଛି।

ଏହାକୁ ଇଡିର ଶେଷ ସମନ୍ ବୋଲି ମଧ୍ୟ କୁହାଯାଉଛି। ଏହା ପରେ ଇଡି ଅନ୍ୟ ପ୍ରକାରର କାର୍ଯ୍ୟପନ୍ଥା ଗ୍ରହଣ କରିବ ବୋଲି ଜଣାପଡ଼ିଛି।

ଅନ୍ୟପକ୍ଷରେ ଗତକାଲି ମାଲ୍ୟା ମେ’ ପର୍ଯ୍ୟନ୍ତ ସମୟ ମାଗିଥିଲେ। ବର୍ତ୍ତମାନ ଭାରତ ଯିବା ସମ୍ଭବ ନୁହେଁ ବୋଲି ସେ କହିଥିଲେ।

ଚଳିତ ବର୍ଷ ସେପ୍ଟେମ୍ବର ସୁଦ୍ଧା ୬,୯୦୩ କୋଟି ଋଣ ଟଙ୍କାରୁ ୪୦୦୦ କୋଟି ଜମା କରିବାକୁ ମାଲ୍ୟା ସୁପ୍ରିମକୋର୍ଟଙ୍କୁ ଜଣାଇଛନ୍ତି। ଗତ ମାର୍ଚ୍ଚ ୩୦ ତାରିଖରେ କୋର୍ଟଙ୍କୁ ଏହି ପ୍ରସ୍ତାବ ଦେଇଥିଲେ।

ମାର୍ଚ୍ଚ ୨ରେ ମାଲ୍ୟା ଭାରତ ଛାଡ଼ି ପଳାଇଥିଲେ। ସେ ଏବେ ଇଂଲଣ୍ଡରେ ରହୁଛନ୍ତି।